Loko munhu a endla xihlambanyo “u va a endla xitshembiso ni ku tlhela a tiboha ku swi endla hambiloko ko ba lexi dumaka, mikarhi yo tala u teka Xikwembu . . . ku ri mbhoni yakwe.” Xi nga ha vuriwa kunene kumbe xi tsariwa ehansi.

Van’wana va nga ha vona swi hoxile ku endla xihlambanyo hikuva Yesu u te: “Mi nga tshuki mi hlambanya . . . ‘Ina’ wa n’wina a a ve ina, ‘E-e’ wa n’wina a va e-e, hikuva leswi tlulaka leswi swi huma eka lowo homboloka.” (Mat. 5:33-37) Yesu a a swi tiva leswaku Nawu wa Muxe a wu lava leswaku vanhu va pfa va endla swihlambanyo naswona a a swi tiva leswaku ku ni malandza yo tshembeka ya Xikwembu lama swi endleke. (Gen. 14:22, 23; Eks. 22:10, 11) Nakambe a a swi tiva leswaku Yehovha na yena u swi endlile swihlambanyo. (Hev. 6:13-17) Yesu a a nga vuli swona leswaku hi nga tshuki hi endla swihlambanyo. Kambe a hi lemukisa leswaku hi nga tshuki hi endla swihlambanyo eka swilo leswi nga riki swa nkoka. Hi fanele hi endla leswi hi nga tshembisa ku swi endla hikuva Yehovha u lava hi endla tano.

U fanele u endla yini loko u komberiwa ku endla xihlambanyo? Xo sungula, tiyiseka leswaku u ta swi endla leswi u tshembisaka ku swi endla. Loko u nga tiyiseki, swi nga va kahle u nga hlambanyi. Rito ra Xikwembu ri hi lemukisa leswi: “Swa antswa u nga hlambanyi ku ri ni ku hlambanya kutani u nga swi endli.” (Ekl. 5:5) Xa vumbirhi, kambisisa milawu ya Bibele leyi fambisanaka ni xihlambanyo xolexo ivi u endla xiboho hi ku landza ripfalo ra wena leri leteriweke kahle. Hi yihi milawu ya le Bibeleni leyi nga ku pfunaka?

Swihlambanyo swin’wana swi fambisana ni ku rhandza ka Xikwembu. Hi xikombiso, Timbhoni ta Yehovha loko ti cata ti endla switshembiso. Switshembiso sweswo i muxaka wun’wana wa xihlambanyo. Vatekani va tshembisana ku rhandzana, ku hlayisana ni ku xiximana emahlweni ka Xikwembu ni timbhoni leti nga kona ni leswaku va ta endla tano “loko havambirhi [va] ha hanya.” (Vatekani van’wana a va ma vuli marito lama fanaka ni lawa kambe va xi endla xihlambanyo emahlweni ka Xikwembu.) Endzhaku ka sweswo va vuriwa nuna ni nsati naswona va fanele va tshama swin’we vutomi hinkwabyo. (Gen. 2:24; 1 Kor. 7:39) Xihlambanyo xa vukati xi fanerile hikuva xi fambisana ni ku rhandza ka Xikwembu.

Swihlambanyo swin’wana a swi fambisani ni ku rhandza ka Xikwembu. Mukreste wa ntiyiso a nge xi endli xihlambanyo xo tirhisa xibamu leswaku a lwela tiko kumbe a endla xihlambanyo xo landzula ripfumelo rakwe eka Xikwembu. Loko o endla tano, u ta va a lwisana ni milawu ya Xikwembu. Vakreste a va fanelanga va va “xiphemu xa misava” naswona a va katseki eka minjhekanjhekisano ni tinyimpi ta misava leyi.—Yoh. 15:19; Esa. 2:4; Yak. 1:27.

 Swihlambanyo swin’wana swi siyeriwa ripfalo ra munhu. Mikarhi yin’wana swi lava hi rhanga hi ehleketisisa hi marito ya Yesu lama nge, “tlheriselani swilo swa Khezari eka Khezari, kambe swa Xikwembu eka Xikwembu” hi nga si endla xiboho xa loko hi ta endla xihlambanyo kumbe doo!—Luka 20:25.

Hi xikombiso, a hi nge Mukreste u endla xikombelo xa leswaku a kuma phasipoti kumbe leswaku a va muakatiko ivi a byeriwa leswaku u fanele a endla xihlambanyo xo tiboha leswaku u ta seketela tiko. Loko ku ve etikweni rero, ku endla xihlambanyo xo tano swi vula ku tshembisa ku endla nchumu lowu lwisanaka ni milawu ya Xikwembu, ripfalo rakwe leri leteriweke hi Bibele a ri nge n’wi pfumeleli ku endla xihlambanyo xo tano. Kambe, mfumo wu nga ha n’wi pfumelela ku cinca marito ya xihlambanyo xexo leswaku a nga biwi hi ripfalo.

Ku endla xihlambanyo xo va munhu wo tshembeka etikweni lexi cinciweke marito, swi nga fambisana ni nsinya wa nawu lowu kumekaka eka Varhoma 13:1 leyi nge: “Munhu un’wana ni un’wana a yingise lava fumaka.” Hikwalaho, Mukreste a a nga ha vona swi nga hoxanga ku endla xihlambanyo mayelana ni nchumu lowu se Xikwembu xi hi pfumeleleke ku wu endla.

Nakambe ku ta tirha ripfalo ra munhu loko a komberiwa ku khoma nchumu wo karhi kumbe ku endla swo karhi loko a ri karhi a hlambanya. Varhoma va khale ni Vaskita a va hlambanya hi mabanga ya vona naswona sweswo a swi vula leswaku va tirhisa mfungho wa xikwembu xa nyimpi tanihi xitiyisekiso xo kombisa ku tshembeka ka vona. Magriki a ma yimisa voko ma ri komba etilweni loko ma endla xihlambanyo. Hikwalaho, a va swi xiya leswaku ku ni xikwembu lexi vanhu va tihlamulelaka eka xona lexi yingisaka leswi va swi vulaka ni ku vona leswi va swi endlaka.

I ntiyiso leswaku nandza wa Yehovha a nge hlambanyi eka mfungho wihi ni wihi wa tiko lowu fambisanaka ni vukhongeri bya mavunwa. Kambe ku vuriwa yini loko ekhoto u komberiwa ku veka voko ehenhla ka Bibele ivi u hlambanya leswaku u ta vulavula ntiyiso ntsena? Eka xiyimo xo tano, u nga hlawula ku endla tano hikuva na Bibele yi hi byela hi malandza yo tshembeka lama endleke swo karhi loko ma ri karhi ma hlambanya. (Gen. 24:2, 3, 9; 47:29-31) I swa nkoka ku tsundzuka leswaku loko u endla xihlambanyo xo tano, u va u tshembisa Xikwembu leswaku u ta vulavula ntiyiso. U fanele u tiyimisela ku vulavula ntiyiso loko u hlamula swivutiso leswi u nga ta vutisiwa swona.

Hikwalaho ka leswi vuxaka bya hina na Yehovha byi nga bya risima, hi fanele hi rhanga hi khongela loko hi nga si endla xihlambanyo lexi hi komberiweke ku xi endla, hi tiyiseka leswaku xihlambanyo xexo a xi nge vavisi ripfalo ra hina kumbe xi hi endla hi tshova nawu wa Bibele. Loko u hlambanya, endla leswi u nga swi tshembisa.—1 Pet. 2:12.