Ku funga kumbe ku hlambanya “i ku yentxa xitshembiso xa xikulu xa ku nyima ni mhaka kumbe ku tshembisa ku yentxa xanchumu, naswona minkama ya yinyingi ku tirhisiwa vito la Xikwembu . . . swaku li fakaza xitshembiso lexi.” Naswona munhu a nga ha vula leswi a swi hlambanyaka kumbe a yentxa hi ku tsala.

Vanhu va vanyingi va nga ha pimisa swaku swi bihile ku hlambanya hikusa Yesu a vule leswi: “U nga tshuki u hlambanya . . . Kambe ‘Ina’ wa n’wina a a ve ina, ‘Ihim’ wa n’wina a va Ihim, hikusa swa ku tlula leswi swi ta hi ka Davulosi.” (Mat. 5:33-37) Phela Yesu a vule leswo na a swi tiva swaku hambi ka Nawu wa Moxe a ku ni swilo leswi Vayisrayele a va fanele va hlambanya ka swona naswona hambi vatirheli va Yehovha va ku tshembeka a ku ni swilo leswi a va fanele va hlambanya ka swona. (Gen. 14:22, 23; Ekso. 22:10, 11) Yesu a a swi tiva swaku hambi hi Papayi wa yena Yehovha a a hlambanya. (Heb. 6:13-17) Hi mhaka leyo Yesu a a nga vuli swona swaku a hi fanelanga hi hlambanya, kambe a wo hi basopisa leswaku hi tivonela kuva hi nga fungi ka swilo swa ku kala swi nga pfuni nchumu. Minkama hinkwayu hi fanele hi yentxa leswi hi swi tshembisaka hikusa Yehovha a lava leswaku hi yentxa swoleswo.

Hi fanele hi yentxa yini loko va hi kombela swaku hi hlambanya ka mhaka ya ku karhi? Xa ku sungula, kambisisa swaku u ta swi kota ku hetisisa xitshembiso xolexo kumbe ihim. Loko u nga tiyiseki swaku u ta swi hetisisa leswi u lavaka ku swi hlambanya, swa yampsa u nga hlambanyi, hikusa Rito la Xikwembu li li: ‘Swa yampsa u nga hlambanyi ku tlula ku hlambanya u gama u nga swi yentxi.’ (Ekl. 5:5) Xa wumbirhi, kambisisa leswi Bibele li swi vulaka hi mhaka yoleyo, u gama u tirhisa lipfalu la wena leli nga djondzisiwa hi Matsalwa swaku u yentxa xiboho. Swoswi, a hi voneni leswi Bibele li swi vulaka, leswi swi nga hi pfunaka ka mhaka leyi.

Swilo swin’wana leswi vanhu va swi hlambanyaka swi fambelana ni ku rhandza ka Xikwembu. Hi xikombiso, Timboni ta Yehovha ta hlambanya loko ti chada. Lava chadaka va yentxa leswo phambheni ka Xikwembu ni ka vanhu hinkwavu. Va tshembisa swaku va ta rhandzana va tlhela va hloniphana wutomi la vona hinkwalu. (I ntiyiso swaku van’wana loko va chada a va vuli marito lawa hi ku kongoma, kambe va hlambanya phambheni ka Xikwembu.) Ku sukela kolanu va tiviwa swaku i nuna na nsati, naswona ku nyimeliwa swaku muchadu wa vona wu tshama hi masiku ni masiku. (Gen. 2:24; 1 Kor. 7:39) Phela leswo a swi bihanga hikusa swi fambisana ni ku rhandza ka Xikwembu.

Vanhu van’wana va hlambanya ka swilo leswi kalaka swi nga fambelani ni ku rhandza ka Xikwembu. Vakreste va ntiyiso a va hlambanyi loko ku li mhaka leyi yi fambelanaka ni ku tirhisa swibamu leswi nga ta vhikela tiko, kumbe swilo swin’wana leswi nga va tshikisaka ku va Timboni ta Yehovha, hikusa loko va yentxa leswo va ta va va nga yi yingisi minawu ya Xikwembu. Leswi hi nga Vakreste va ntiyiso a hi “fani  ni vanhu va misava leyi,” hi mhaka leyo a hi fanelanga hi tipeta ka maguwa ya misava leyi. —  Yoh. 15:19; Esa. 2:4; Yak. 1:27.

Swilo swin’wana leswi vanhu va swi hlambanyaka swi fambelana ni lipfalu. Minkama yin’wana, swi nga ha lava hi kambela leswi hi lavaka ku swi hlambanya hikusa swi nga ha fambelana ni leswi Yesu a nga swi vula nkama a nga te: “Tlhelisani swa Khezari ka Khezari, kambe swa Xikwembu ka Xikwembu.” —  Luk. 20:25.

A hi nge Mukreste a ya hambisa passaporte, kumbe a ya kombela papela leli kombisaka swaku a hanya lani tikweni, a gama a tsumbula swaku ku ni swilo leswi a faneleke a hlambanya ka swona. Loko ku li swaku ka tiko lolelo ku hlambanya swi vula ku yentxa swilo leswi Xikwembu xi swi nyenyaka, Mukreste yelweyo a nga ta pfumela ku hlambanya loko a tirhisa lipfalu la yena leli nga djondzisiwa hi Bibele. Swi nga yentxeka mfumu, wu mu pfumelela ku txintxa swilo swin’wana ka ku hlambanya koloko leswaku swi fambelana ni lipfalu la yena.

Ku va Mukreste a hlambanya ka mapapela lawa ma laviwaka hi ku ya hi nawu, swi fambelana ni leswi nga ka buku la Varoma 13:1, lani ku nga ni marito lama nge: “Munhu mun’wana ni mun’wana a fanele a yingisa lava fumaka.” Se Mukreste a nga ha tiyentxela xiboho xa leswaku ku ni xa ku biha hi ku hlambanya ka swilo leswi Xikwembu xi kalaka xi nga mu yaleli swaku a swi yentxa.

I swa lisima ku tirhisa lipfalu la hina leli nga djondzisiwa kahle hi Bibele loko hi kombeliwa ku hlambanya hi miri wa hina kumbe hi nchumu wo karhi. Khale Varoma ni Vasita a va kombisa swaku va ta tshembeka hi ku tlakusa swipada swa vona va vitana Xikwembu xa nyimpi. Magriki a ma tlakusa voko la wona henhla loko ma hlambanya hikusa a ma kholwa swaku ku ni munhu wa ku kala a nga voneki lweyi a nga ni matimba, lweyi a kotaka ku twa hinkwaswu leswi vuliwaka ni hinkwaswu leswi yentxiwaka lweyi mun’wana ni mun’wana a nga ta tihlamulela ka yena.

I ntiyiso swaku vatirheli va Yehovha a va pfumeli ku hlambanya hi nchumu xin’wana ni xin’wana lexi fambelanaka ni wugandzeli la mavunhwa. Kambe u nga yentxa yini hi xikombiso loko atribunal vo ku kombela ku tlhanteka voko henhla ka Bibele kuva u hlambanya swaku u ta vulavula ntiyiso? Ka swiyimu swa ku fana ni leswo, u nga ha boha ku swi yentxa, hikusa hi xikombiso hambi hi Bibele li vulavula hi vatirheli van’wana va ku tshembeka va Yehovha lava va nga tirhisa miri wa vona kuva va hlambanya ka timhaka tin’wana. (Gen. 24:2, 3, 9; 47:29-31) I swa lisima kuva u khumbuka swaku loko u hlambanya ka mhaka ya ku fana ni leyo, u va u tshembisa phambheni ka Xikwembu leswaku u ta vulavula ntiyiso. U fanele u tilulamisela kuva u swi hlamula hi ku tshembeka swivutiso hinkwaswu leswi u nga ta vutisiwa swona.

Leswi wunghanu la hina na Yehovha li nga la lisima, hi fanele hi tiyiseka swaku leswi hi lavaka ku hlambanya ka swona a swi lwisani ni minawu ya Bibele naswona swi hi siya ni lipfalu la ku basa. Loko swi ku u hlambanyile, u fanele u swi hetisisa leswi u nga swi hlambanya. —  1 Ped. 2:12.