Mhiko “kupikira kuita ciro camunonga magondesa kuita, uye amweni anopika na Mwari kajinji . . . kuti agare mupupuri.” Mhiko iyona ingaizwa ngekureketa kana kuita zvekutara.

Anhu amweni angarangarira kuti zvakashata kuita mhiko ngekuti Djesu akabhuya kuti: “Musatombopike . . . Soko renyu rekuti ‘Honde’ ngarindogare honde, ‘Haiwa’ wenyu, haiwa, ngekuti zvinodarika izvi zvinobva kune wakashata.” (Mat. 5:33-37) Zvezvirokwazvo, Djesu aiziya kuti Mutemo wa Mozesi waida kuti Aisraeri aite mhiko pa migariro imweni ye zviro, uye kuti aseenzi akagondeka a Mwari akazviita. (Gen. 14:22, 23; Eki. 22:10, 11) Ayena aiziyawo kuti Djehovha wene aiita mhiko. (Ahe. 6:13-17) Hino Djesu Ainga asikabhuyi kuti atidikani kuita mhiko. Pano kudaro, ayena Ainga ecireketa kuti munhu aadikani kuita mhiko nge ciro ce nhando. Tinodikana kudzadzisa mhiko yese yatinonga taita ngekuti ndizvona zvinodiwa na Djehovha kuti tiite.

Hino, mungaitei kana akamukumbira kuti muite mhiko? Musati maita ciri cese, munodikana kugara no rugondo rekuti mucadzadzisa mhiko. Kana mukaona kuti amuzokwanisi kuidzadzisa, zviri nani kutama kuiita. Soko ra Mwari rinoti: “Zviri nani kusama kupika pano kupika wosama kuripa.” (Mup. 5:5) Mukapedza, ongororai mazano e Bhaibheri akaringana no mhikodzo, pedzepo, itai cisananguro maererano no hana yenyu yakafundiswa. Hino mazano api e mu Bhaibheri angakwanisa kutibetsera?

Mhiko dzimweni dzinopindirana no zviya zvinodiwa na Mwari. Ngo muezaniso, Apupuri a Djehovha anoita mhiko paanoenda kocata. Mhiko idzi i mushobo umweni wekupika. Kuna Djehovha no aya anonga aripo, anhu aya anonga ecicata anopika kuti acadana, acareremedzana nokukoshesana no mwoyo uye kuti acazviita “[awona] paanonga aciri apenyu.” (Anhu amweni akawakana angasama hawo kubhuya masoko akaita hingana aya kamare paanowakana, asi kunyazi zvakadaro, awona anonga aita mhiko kuna Mwari.) Anozobvunzwa kuti aa mwamuna no mukadzi, uye anodikana kugara ese kwenda no kwenda. (Gen. 2:24; 1Ako. 7:39) Mhiko dze mucato dzinopindirana no zviya zvinodiwa na Mwari.

Mhiko dzimweni adzipindirani no zvinodiwa na Mwari. Mukristu wezvirokwazvo aaiti mhiko kuti atsigire nyika yake mu hondo kana kuti kusiya kutenda kake muna Mwari. Kuita izvona kaizopesana no mitemo ya Mwari. Akristu aaiti “dii re nyika,” ndiyo ndaa aabatanidzwi mu hondo uye pakurhwisana.—Juau 15:19; Isa. 2:4; Tg. 1:27.

Mhiko dzimweni dzinoenderana no hana ye munhu. Nguwa dzimweni, tisati taita mhiko tinodikana kunyasa kurangarira nge zve zano ra Djesu rekuti “hwirinzai kuna Sezari zviro zva Sezari,  asi zviro zva Mwari kuna Mwari.”—Ruka 20:25.

Ngo muezaniso, pamweni muKristu urikuda maphepha kuti aite mugari we nyika imweni kana kuti unonga ecida pasaporti, asi iyena unozoona kuti kana ecida maphepha aya unodikana kuita mhiko yekugondeka. Pa mhiko iyona, muKristu ecidikana kuita zviro zvinopesana no mitemo ya Mwari, hana yake yakafundiswa no Bhaibheri aimutenderi. Asi pamweni anyautongi angatendera kuti munhuwo acinje masoko e mhikoyo kuti aenderane no hana yake.

Kucinja masoko e mhiko pamweni zvingapindirana no mazano ari pana Aroma 13:1, anoti: “Munhu wese ngaadzikande pasi pe anhu ano masimba makuru.” Nge mushobo uu, pamweni muKristu ungaona kuti azvizi kushata kuita mhiko ii ngekuti inopindirana no zvinodiwa na Mwari.

Tinodikanawo kuzwira hana yedu yakafundiswa no Bhaibheri patinokumbirhwa kuti tiseenzese ciro kana kuti tiite majesto patinonga teciita mhiko. Aroma e kare no Asitiya aipikira mapanga awo, ecikumbira simba ku mwari we hondo zvecipangidza kuti arikubhuya zvirokwazvo. Agrego aimutsa nyara imwe paainga eciita mhiko. Nge mushobo uu, awona aitendera kuti kuno simba rinokwanisa kuona zvese zvinonga zveciitika, raanodikana kuzodzidairira.

Zviri pamhene kuti muKristu wezvirokwazvo, aazoiti mhiko eciseenzesa ciro kana kuti simboro inobatanidzwa nokunamata kekunyepa. Asi zvakadini kana tribhunari ikamukumbira kuti mukande nyara pa musoro pe Bhaibheri uye moita mhiko yekuti mucareketa cokwadi basi? Pakadaropo imwimwi mungazviita ngekuti Bhaibheri rinobhuya nge zve aseenzi a Djehovha akaita mhiko eciseenzesa jesto. (Gen. 24:2, 3, 9; 47:29-31) Asi zvinokosha kuedzurira kuti pamunoita mhiko yakadaro, imwimwi munopika pa mberi pa Mwari kuti mucareketa cokwadi. Munodikana kugara makagadzirira kudaira cokwadi pa mibvunzo yese yamunonga mecipaswa.

Ushamwari wedu na Djehovha unokosha maningi katiri. Ndiyo ndaa tinodikana kuita munamato uye tonyasa kurangarira tisati taita mhiko ipi hayo. Tinodikana kungwarira kuti tisakuwadze hana yedu yakafundiswa no Bhaibheri. Kana imwimwi mukasanangura kuita mhiko, munodikana kugara no cokwadi cekuti mucadzadzisa mhiko iyona.—1 Pe. 2:12.