Словарьдан алырга, даңгырак дээрге «бир-ле чүүлдү албан күүседирин аазаары-дыр. Даңгырак берип турар кижиге ол аазаашкын ыдыктыг болгаш эң чугула болур» a. Даңгыракты сөс кырынга чугаалап азы бижээш, берип болур.

Иисус мынча дээн: «А Мен силерге шуут-ла даңгыраглаваңар деп чугаалап тур мен... [...] Чүгле ылап „ийе“ болза, „ийе“ деп, ылап „чок“ болза, „чок“ деп чоруңар. А аңаа немей чугаалаан бүгү чүве — эрликтен келген боор» (Мф. 5:33—37). Ынчаарга даңгырак бээри шын эвес дээни ол бе? Моисейниң хоойлузу ёзугаар чамдык байдалдарда израильчилер даңгырак бээр ужурлуг турган база Бурганның шынчы бараалгакчылары даңгырактарны берип чораан деп, Иисус билир турган (Э. д. 14:22, 23; Хост. 22:10, 11). Оон аңгыда, Иегова Боду база даңгыраглап турган деп, ол билир чораан (Евр. 6:13—17). Ынчап кээрге, Иисус даңгырак бээри шын эвес дивээн. Херек кырында ол кевин херекчок даңгырак бээринден оваарындырып турган. Аксы-сөзүвүстү тудары дээрге Бурганның мурнунга хүлээлгевис-тир. Аазаан чүүлүвүстү кезээде күүседир ужурлуг бис.

Силерден даңгырак бээрин негеп турар болза, канчаар? Баштай ону күүседип шыдаар силер бе деп боданыңар. Бир эвес шыдавас хире болзуңарза, даңгырак бербээни дээре. Бурганның Сөзүнде мынча дээн: «Даңгыраглааш, күүсетпезиниң орнунга, даңгыраглавааның дээре» (Эккл. 5:4). Оон ыңай даңгырактар дугайында библейжи дүрүмнерни кичээнгейге алыңар. Ооң соонда Библияның аайы-биле өөреттинген арын-нүүрүңер ёзугаар хөделиңер. Кандыг дүрүмнерниң дугайында боданыр херек?

Чамдык даңгырактар Бурганның күзел-соруунга дүгжүп турар. Чижээ, Иегованың Херечилери өгленип тургаш, бот-боттарынга аазаашкын бээр. Аазаашкын, даңгырак дег, күштүг боор. Душтук оол биле душтук кыс «Бурганның тургусканы өг-бүле бооп каттышкаш, черге кады чурттаар үезинде» бот-боттарынга ынак болурун база ханы хүндүлежирин Бурганның болгаш кижилерниң мурнунга аазаар. (Өгленишкен аныяктар шак бо сөстерни чугаалавас-даа болза, олар дөмей-ле Бурганның мурнунга аазаашкынны берип турар). Ооң соонда оларны ашак-кадай кылдыр чарлаар. Бурганның күзел-бодалы-биле алырга, оларның эвилели өлүмүнге чедир уламчылаар ужурлуг (Э. д. 2:24; 1 Кор. 7:39). Мындыг даңгырактар Бурганның күзел-соруунга долузу-биле дүгжүп турар.

Чамдык даңгырактар Бурганның күзел-соруунга дүүшпес. Бир эвес Бурганның бараалгакчызындан боо-чепсек тудуп алгаш, чуртун  камгалаар азы Бурганга бүзүрелинден ойталаар даңгырак бээрин негээр болза, ол ону кылбас. Ол дээрге Бурганның хоойлу-дүрүмнерин үрээри-дир. Бурганның чону бо делегейге хамаарышпас болганда, ооң чөрүлдээлеринге болгаш дайыннарынга киришпес (Ин. 15:19; Иса. 2:4; Иак. 1:27).

Чамдык байдалдарда даңгырак бээр-бербези арын-нүүрден хамааржыр. Чамдыкта даңгырак бээриниң мурнунда, Иисустуң «императорга — императорнуун, а Бурганга — Бурганныын бериңер» дээн сөстерин кичээнгейге алыры чугула (Лк. 20:25).

Чижээ, христиан кижи чурттуң хамаатызы болур эрге алыр дээш азы паспорт алыр дээш билдириишкин киирер дээн дижик. Аңаа чеде бээрге, оон даңгырак бээрин негээн. Бир эвес даңгыракта Бурганның хоойлузунга удур чүүл бижээн болза, ол Библияның аайы-биле өөреттинген арын-нүүрүн дыңнап, чөпшээрешпес. Чамдыкта эрге-чагырга улузу даңгырактың сөзүглелин арын-нүүрүнге таарыштыр өскертип алырын кижиге чөпшээреп болур.

Римчилерге 13:1-де: «Кижи бүрүзү үстүнден башкарган эрге-чагыргага чагыртып чорзун» — дээн. Ынчангаш христиан кижи эде бижээн даңгыраан берип, Бурган ону черле негеп турар болганда, ында багай чүве чок деп шиитпирлеп болур.

Бир эвес даңгырак бээрде, силерден кандыг-бир чүвени ажыглаарын азы холду көдүрерин дилээр болза, арын-нүүрнү дыңнаары чугула. Бурунгу римчилер болгаш скифтер даңгырак берип тургаш, сөзүнге ээ болур демдээ кылдыр, дайынның бурганын кыйгырбышаан, селемелеринге даңгыраглаар турган. А гректер даңгырак берип тургаш, холдарын дээрже өрү көдүрер турган. Ынчалдыр олар шупту кижилерни хайгаарап көрүп орар күш бар деп чүүлге бүзүрелин илередип турганнар.

Чугаажок, Иегованың бараалгакчылары чурттуң тугунга азы меге шажын-биле холбашкан бир-ле чүүлге сөгүрүп, ону ошкавас. А бир эвес суд үезинде холуңарны Библияның кырынга салгаш, чүгле шынын сөглээр даңгырак бээрин дилээр болза, канчаар? Чамдык улус аңаа чөпшээрежип болур. Чүге дизе Бурганның шынчы бараалгакчылары даңгырак берип тургаш, холу-биле бир-ле шимчээшкинни көргүзүп турган (Э. д. 24:2, 3, 9; 47:29—31). Ындыг таварылгада силер Бурганның мурнунга чүгле шынны чугаалаарын даңгыраглап турар силер. Салган айтырыгларның шуптузунга шын харыылаар ужурлуг силер.

Иегова-биле найыралывыс биске дыка үнелиг. Ынчангаш кандыг-ла бир даңгырак бээриниң мурнунда, баштай мөргүп алгаш: «Бо даңгырак библейжи дүрүмнерге дүгжүп турар бе? Арын-нүүрүм арыг боор бе?» деп хандыр боданыр ужурлуг бис. Даңгыракты берген болзуңза, ону күүседир ужурлуг сен (1 Пет. 2:12).