Одӥг словарья, адями кыл сётыкуз, калык азьын вера, со мае ке туж кулэзэ одно ик быдэстоз шуыса a. Куддыръя кыл сёто вераса гинэ, нош куддыръя гожтыса но.

Иисус шуиз: «Кылдэ чик но эн сёт... [...] Тӥляд кылды „озьы, озьы“, „ӧвӧл, ӧвӧл“ гинэ мед луоз; талэсь тросэз — шайтанлэсь луэ» (Матф. 5:33—37). Вераз-а Иисус, кылэз сётыны уг яра шуыса? Иисус тодӥз, Моисейлэн законэзъя куд-ог учыръёсын израиль калык кылзэ сётыны кулэ вал но вашкала дыръя Инмарлэн оскымон ужась-тыршисьёсыз кылзэс сётъязы шуыса (Ул.-выл. 14:22, 23; Пот. 22:10, 11). Озьы ик Иисус тодӥз, Иегова но кылзэ сётъяз шуыса (Евр. 6:13—17). Соин ик Иисус ӧз вера, кылэз сётыны уг яра шуыса. Солэн дышетэмез потэ вал, малпаськытэк кылэз сётоно ӧвӧл шуыса. Ми сётэм кылъёсмес котьку но быдэсъяны кулэ, малы ке шуоно со понна Инмар азьын кыл кутӥськомы.

Мар кароно, тӥледыз кылдэс сётыны куро ке? Нырысь ик малпаське, быгатоды-а тӥ сётэм кылдэс быдэстыны. Тӥ уд ке тодӥське, быгатоды-а, уд-а шуыса, кылдэс эн сётэ. Инмарлэн Кылаз вераське: «Сӥзиськыны но сое быдэстытэк кельтыны сярысь, умойгес тыныд сӥзиськытэк улыны» (Екк. 5:4). Со сяна, эскере Библиысь возетъёсты, кудъёсыз кыл сётонэн герӟаськемын, но собере ужпум кутэ. Кыӵе возетъёсты эскерыны умой луысал?

Куд-ог кылсётонъёс Инмарлэн эрикезлы пумит уг мыно. Кылсярысь, Иеговалэн Адӟись-Ивортӥсьёсыз кузпалъяськыкузы ог-огзылы кыл сётонъёс верало. Та кылсётонъёслэн но туж бадӟым кужымзы вань. Эмеспи но выль кен Инмар азьын но адямиос азьын музъем вылын вань улытозязы ог-огзэс яратыны но гажаны кылзэс сёто. (Кузпалъяськисьёс пӧртэмгес кылъёс вераны быгато ке но, соос Инмар азьын кыл сёто.) Та бере соос карт но кышно луо. Соос вань улытозязы ӵош улыны кулэ (Ул.-выл. 2:24; 1 Кор. 7:39). Таӵе кылсётон Инмарлэн эрикезлы пумит уг мыны.

Куд-ог кылсётонъёс Инмарлэн эрикезлы пумит мыно. Куке Иеговалэсь Адӟись-Ивортӥсьсэ кылзэ сётыны куро, со ожтӥрлыкен кияз шаерзэ утёз яке Инмарезлы уз оскы ини шуыса, со сое уз лэсьты. Та учырын кылзэ сётыса, со Инмарлэсь курон-косонъёссэ тӥясал. Христианъёс та дуннелэн ӧвӧл (Иоанн 15:19). Соин ик ми споръяськонъёсы но ожмаськонъёсы ум пыриськиське (Ис. 2:4; Иак. 1:27).

Куд-ог кылсётонъёс возьытлыкен герӟаськемын. Куддыръя кыл сётэмлэсь азьло малпаськоно  Иисуслэн кылъёсыз вылын: «Кесарьлэсьсэ кесарьлы сётэлэ, нош Инмарлэсьсэ — Инмарлы» (Лука 20:25).

Шуом, Адӟись-Ивортӥсь заявление гожтэ, гражданство яке паспорт басьтон понна. Собере со тодэ, солы присяга сётоно луоз шуыса. Присягалэн кылъёсыз Инмарлэн курон-косонъёсызлы пумит мыно ке, христиан муртлэн Библияя дышетэм возьытлыкез та присягаез сётыны уз лэзьы. Но куддыръя кивалтӥсьёс присягалэсь кылъёссэ воштыны лэзё, со христиан муртлэн возьытлыкезлы пумит медаз мыны шуыса.

Куке христиан мурт малпа, тупатэм присягаез сётоно-а, ӧвӧл-а шуыса, со лыдэ басьтоз, дыр, возетэз, кудӥз гожтэмын Римъёслы 13:1: «Котькудӥз адями вылӥ властьёслы-кивалтӥсьёслы тэрытскись мед луоз». Соин ик христиан мурт ужпум кутоз, дыр, номыр умойтэмез ӧвӧл шуыса быдэстыны сое, мае Инмар ужась-тыршисьёсызлэсь куре.

Со сяна, Библияя дышетэм возьытлыкез лыдэ басьтоно соку но, куке тӥледыз кылдэс сётыны куро, кыӵе ке арбериез кутыса яке киыныды мае ке возьматыса. Вашкала дыръя римлянъёс но скифъёс кылзэс сётӥзы, мечъёссэс сётыса но ожмаськонлэн Инмарезлы вазиськыса. Озьы соос возьматӥзы, соос уг пӧясько шуыса. Нош грекъёс кизэс инме ӝутыса кылзэс сёто вал. Озьы соос валамзэс возьматӥзы, инмын кин ке но вань шуыса, кин ваньзэ чакла но кин азьын вань адямиос кыл куто.

Валамон, Иеговалэн ужась-тыршисьёсыз уз йыбыртъялэ нокыӵе арберилы, кудӥз зэмос луисьтэм религиен герӟаськемын. Нош мар кароно, судын тӥледыз куризы ке кидэс Библия вылэ поныны но кылдэс сётыны, тӥ уд пӧяське шуыса. Куд-ог христианъёс соглаш кариськозы, дыр, малы ке шуоно вашкала дыръя но Инмарлэн оскымон ужась-тыршисьёсыз, кылзэс сётыкузы, киынызы мае ке возьмато вал (Ул.-выл. 24:2, 3, 9; 47:29—31). Но тодамы возёно: сыӵе учыре тӥ Инмар азьын кылдэс сётӥськоды шонерзэ вераны. Тӥледлы кыӵе ке юанъёс сётӥзы ке, пӧяськыны уг яра.

Иеговаен кусыпъёсмы милемлы туж дуно пото. Соин ик кыл сётэмлэсь азьло вӧсяськоно но Библиысь возетъёсты но возьытлыкмес лыдэ басьтыса малпаськоно, быгатомы-а ми сое быдэстыны. Кылдэс сётӥды ке, сое быдэстыны кулэ (1 Пётр 2:12).