Quando una persona la fà un giuramento, la ze drio far una promessa tanto importante e la vol che Dio el sìpia la testimònia de quel che la ze drio prometer. La persona la pol parlar o scriver un giuramento.

Gesù el ga dito: ‘No sté mai far un giuramento. . . El vostro si el ga de esser si e el vostro nò el ga de esser nò, parché quel che se dise de pi de queste parole el vien del Perverso.’ (Mat. 5:33-37) Par quela che tanti i pensa che no se pol mai far un giuramento. Sicuro che Gesù el savea che la Lege de Moisè la disea che i israeliti i gavea de far giuramenti e che anca altri servi de Geovà li gavea fato. (Éso. 22:10, 11; Gén. 14:22, 23) Anca el savea che Geovà el gavea fato giuramenti. (Ebr. 6:13-17) Alora, cossa Gesù el ga volesto dir con quele parole? Che una persona no la ga mia de giurar par una roba che no la ze tanto importante, e nò che no la podaria mai far un giuramento. E sempre ghemo de far quel che ghemo prometesto parché Geovà el vol che lo femo.

Ma cossa te ghè de far se qualchedun el te domanda par far un giuramento? Te ghè de esser sicuro che te sarè bon de far quel che te ndarè prometer. Se nò, l’è meio che no te fae el giuramento. La Bìblia la dise: “L’è meio no far un voto che farlo e dopo no far quel che te ghè dito.” (Ecl. 5:5) Alora, dopera la to cossiensa insieme coi prinsipi dela Bìblia par dessider se te vè far el giuramento o nò. Che prinsipi dela Bìblia i pol giutarte?

Arquanti giuramenti ghe piase a Dio. Par esémpio, le Testimònie de Geovà le fà un voto quando le va maridarse e questo voto l’è un giuramento. In questo giuramento, el omo e la dona i promete che i ndarà amar e rispetar un al altro intanto che i vive. Altri fursi no i parle pròpio queste parole, ma anca cossita i ze drio far un giuramento davanti de Dio e de tute le persone che le ze drio veder el matrimònio. Alora, lori i ga de restar maridadi par tuta la so vita. (Gén. 2:24; 1 Cor. 7:39) A Dio ghe piase un voto che un omo e una dona i fà quando i se marida.

Arquanti giuramenti no i ghe piase a Dio. Una persona che la fà quel che ghe piase a Dio no la ndarà far un giuramento che el dise che la ga de fermarse de servirlo o che la ga de difender la so nassion nte una guera. Se la fesse cossita, la ndaria desobedir ai comandamenti de Dio. Par esémpio, la Bìblia la dise che i servi de Dio no i fà parte del mondo, e par quela, no i va ale guere e no i se mete in tante robe del mondo. — Gioani 15:19; Isa. 2:4; Tiago 1:27.

 Podemo doperar la nostra cossiensa par dessider far un giuramento. Pol esser che vanti de far un giuramento, ghemo de pensar sora le parole de Gesù: ‘Gavé de dar a César quel che l’è de César, ma a Dio quel che l’è de Dio.’ — Luc. 20:25.

Metemo dir che ghe ocore a un fradel gaver una permission par viaiar o ndar de star in nantro paese. Ma par gaver questa permission, el ga de far un giuramento de lealtà. Se in questo giuramento el prometesse far una roba che no la ze de acordo cola Bìblia, lu no’l ndaria farlo par causa dela so cossiensa. Ma pol esser che el governo lo asse cambiar le parole del giuramento de acordo cola so cossiensa.

Quando femo un giuramento, anca che lo cambiemo de acordo cola nostra cossiensa, saremo drio far quel che dise Romani 13:1: ‘Tuti i ga de obedir ale autorità.’ Alora, fursi un servo de Dio el capisse che l’è giusto far un giuramento che lo giutarà a obedir a questo comandamento.

Cossa ghemo de far se i ne domanda de doperar qualcossa o far estri nte un giuramento? Podemo doperar la nostra cossiensa che la ze de acordo cola Bìblia par dessider se ndemo farlo o nò. Nel passà, i romani e i cita i doperea le so spade par giurar. Cossita, i domandea el poder de Dio nela guera. E i grechi i levea su la man al cielo quando i fea giuramenti. Cossita, lori i mostrea che ghen’era qualchedun che el vedea tuto quel che i fea e che i gavaria de renderghe conto.

Metemo dir che un servo de Geovà el ndarà far un giuramento e i ghe domanda de basar o indenociarse davanti dela bandiera de un paese o de qualcossa che la ze dela religion falsa. Sicuro che no saria giusto farlo. Ma cossa el gavaria de far se i ghe domandesse par meter la man sora la Bìblia e giurar che el ndarà parlar sol la verità? Nela Bìblia, ghen’è esempi de servi de Geovà che i ga metesto la man sora qualcossa par far un giuramento. (Gén. 24:2, 3, 9; 47:29-31) Ma ghemo de ricordarse che se lo femo, semo drio giurar davanti de Dio che ndaremo parlar sol quel che l’è vero. Alora, ghemo de risponder a tute le domande che i ne fae.

La nostra amicìssia con Geovà la ze tanto importante par noantri. Par quela, ghemo de pregar a Geovà, pensarghe sora e doperar la nostra cossiensa par dessider se ndaremo far un giuramento o nò. Se dessidimo far un giuramento, ghemo de esser sicuri che saremo boni de far quel che ghemo prometesto. — 1 Pie. 2:12.