Caaqoy “gitaba, higgiyan oyshissiyaaba woy issibaa oottanawu darotoo Xoossaa . . . markkadan xeesiyoogan geliyo qaala.” Hegee haasayan woy xuufiyan gidana danddayees.

Yesuusi, “Wordduwan [caaqqoppite] . . . SHin intte, ‘Ee’ woi, ‘CHii’ giite; hageetuppe hara caaqoi xalahe halaqaappe yees” giido gishshawu, amarida asay caaqqiyoogee bala giidi qoppana danddayees. (Maa. 5:33-37) Muuse Higgiyaa maaran, issi issi hanotatun Israaˈeelati caaqqana koshshidoogaanne ammanettida Xoossaa ashkkarati caaqqidoogaa Yesuusi erees. (Doo. 14:22, 23; Kes. 22:10, 11) Yihooway ba huuphen caaqqidoogaakka I erees. (Ibr. 6:13-17) Hegaa gishshawu, Yesuusi nuuni mule caaqqana koshshenna giidi yootibeenna. SHin, I asay pattennabawu woy koshshennabawu caaqqennaadan zoriis. Nuuni ubbatoo nu qaalaa naagana bessees; ayssi giikko, nuuni yaatanaadan Yihooway koyees.

Gidoppe attin, caaqqanaadan issi uri nena oychchikko, neeni waatana bessii? Koyruwan, neeni ne caaquwaa polana danddayiyaakkonne shaakka. Neeni shaakka erennaba gidikko, caaqqennan aggiyoogee loˈˈo gidana danddayees. Xoossaa Qaalay hagaadan gees: “Issibaa Xoossassi geppidi, polennan aggiyoogaappe koiro geppennan aggiyoogee lo77o.” (Era. 5:5) Kaallada, caaquwaa xeelliyaagan Geeshsha Maxaafay yootiyo maarata pilgga; qassi yaatada loohida ne kahaara maayettiyaabaa ootta. Geeshsha Maxaafay yootiyo he maaratuppe amaridaageeti awugeetee?

Amarida caaqoti Xoossaa sheniyaara maayettoosona. Leemisuwawu, Yihoowa Markkati aqo oyqqiyo wode caaqqoosona. Bullachchiyaageenne bullashettiyaara issoy issuwaa siiqanawu, bonchchanawunne issoy issuwawu koshshiyaabaa kunttanawu, qassi eti “deˈuwan deˈido wode ubban” yaatanawu Xoossaanne asaa sinttan qaalaa geloosona. (Harati aqo oyqqiyo wode hagaadan geennan aggana danddayoosona, shin etikka Xoossaa sinttan qaalaa geloosona.) Hegaappe simmin eti azinanne machcho gidoosona, qassi eti bantta deˈo laytta ubban azinanne machcho gididi deˈana koshshees. (Doo. 2:24; 1 Qor. 7:39) Aqo oyqqiyo wode caaqqiyoogee bessiyaabanne Xoossaa sheniyaara maayettiyaaba.

Amarida caaqoti Xoossaa sheniyaara maayettokkona. Leemisuwawu, tumu Kiristtaanee issi biittaa naaganawu olaa miishshaa goˈettanawu woy Xoossan ammaniyoogaa agganawu caaqqenna. Yaatiyoogee Xoossaa azazuwaara maayettenna. Kiristtaaneti ‘saˈaabaa gidokkona,’ hegaa gishshawu, nuuni ooyettananne olettana koshshenna.—Yoh. 15:19; Isi. 2:4; Yaaq. 1:27.

Amarida caaqoti kahaara gayttidaba. Issi issitoo,  nuuni caaqqana koshshiya koshshennaakko kuuyanaappe kase “Qeesaaraagaa Qeesaarassi, Xoossaagaa Xoossaassi immite” giidi Yesuusi zorido zoriyaa loytti qoppana koshshees.—Luq. 20:25.

Leemisuwawu, issi Kiristtaanee issi biittaa asa gidanawu woy pasporttiyaa kessanawu oychchiyo wode ammanettiyoogaa bessanawu caaqqana koshshiyoogaa akeekiis gaada qoppa. He biittan, ammanettiyoogaa bessanawu caaqqiyoogee Xoossaa higgiyaara maayettennabaa oottanawu geliyo qaala gidikko, Geeshsha Maxaafan loohida A kahay I caaqqennaadan diggees. SHin I ba kahaara maayettiya ogiyan caaqqanaadan caaquwaara gayttida amarida qofaa laammana mala kawotettay awu paqqadana danddayees.

Ammanettiyoogaa bessanawu caaqqiyo amaridabaa laammido caaqoy Roome 13:1n deˈiya maaraara maayettiyaaba gidana danddayees; xiqisee hagaadan gees: “Asai ubbai deriyaa heemmiyaageetuyyo haarettanau bessees.” Yaatiyo gishshawu, Kiristtaaneti oottanaadan Xoossay koyiyoobaa oottanawu issi Kiristtaanee caaqqanawu kuuyiyoogee bala gidennan aggana danddayees.

Neeni issiban caaqqanaadan woy caaqqiyo wode ne kushiyaa goˈettanaadan oyshettikko, Geeshsha Maxaafan loohida ne kahawu azazettiyoogeekka keehi koshshiyaaba. Beni Roomatinne Iskuuteti bantta bisuwan caaqqoosona; qassi hegaa giyoogee he uri ammanettiyoogaa bessanawu olaa xoossaa malaataa goˈettees giyoogaa. Giriiketi caaqqiyo wode bantta kushiyaa pude xoqqu oottoosona. Hegaa gishshawu haasayidobaanne oottidobaa beˈiya, qassi asay oyshettanaadan oottiya Xoossay deˈiyoogaa eti eroosona.

Issi Yihoowa ashkkaray worddo haymaanootiyaara gayttida ay biittaa malaatankka caaqqennaagee qoncce. SHin, neeni shilootan Geeshsha Maxaafan ne kushiyaa wottada tumaa markkattanawu caaqqanaadan issi uri nena oychchikko, neeni waatana koshshii? Ne hanotay hegaa mala gidikko, neeni hegaadan oottanawu kuuyana danddayaasa; ayssi giikko, bantta kushiyaa goˈettidi caaqqida ammanettida asatubaa Geeshsha Maxaafay yootees. (Doo. 24:2, 3, 9; 47:29-31) Neeni caaqqiyo wode Xoossaa sinttan tumaa haasayanawu caaqqiyoogaa hassayiyoogee keehi koshshiyaaba. Issi uri nena oychchana danddayiyo oyshaa ubbawu tumu zaaruwaa yootanawu neeni giigettana koshshees.

Nuuni Yihoowaara dabbotido dabbotaa xoqqu ootti xeelliyo gishshawu, issi uri nuuni caaqqanaadan oychchiyo ay caaqoykka nu kahaara woy Geeshsha Maxaafay yootiyo maaraara maayettiyaagaa gidiyoogaa eranawu loytti qoppananne woossana koshshees. Neeni caaqqanawu kuuyikko, hegaa naagana koshshees.—1 PHe. 2:12.