ფუჩაფა რე სერიოზულ, მტკიცე განაცხად ვარდა პირობაშ დოდვალა, ნამდა შეასრულენქ სიტყვას. თეცალ დროს უმენტაშო ღორონთის მიშინუანა მოწმეთ. თექ შილებე იკეთინას სიტყვიერო ვარდა ჭარილო.

ნამთინე ფიქრენს, ნამდა ფუჩაფა არასწორ რე, მუშენდა იესოქ თქუ: «მუთუნ ვედიფუჩუათ  თქვან „ქო“ რდას ქო დო „ვარ“ — ვარ! მუთ თეშე უმოს რე, უბადოშე რე» (მათ. 5:33—37). მუშო ოკო რაგად, იესოს უჩქუდ, ნამდა მოსეშ კანონ ისრაელეფშე ითხინდჷ, ნამთინე სიტუაციას დიფუჩუესკო დო ღორონთიშ ართგურ მსახურეფ ხოლო მინშა იფუჩუანდეს (დაბ. 14:22, 23; გამ. 22:10, 11). თეს გეძინელ, უჩქუდ, ნამდა იეჰოვა ხოლო იფუჩუანდჷ (ებრ. 6:13—17). თე სიტყვეფით იესოს თიშ რაგად ვაკოდ, ნამდა დღას ოკო ვედიფუფჩუათ. თიქ უბრალოთ გუმაფრთხილეს, ნამდა უმნიშვნელო საკითხეფშენ ვარდა არასწორ მოტივით ვედიფუფჩუათ. ჩქი ირიათო ოკო შევასრულათ დოდვალირ სიტყვა, მუშენდა იეჰოვა ითხინს თეს.

მუ ოკო ვაკეთათ, მუჟამსით ჩქინდე ფუჩაფას ითხინა? პირველ რიგის, დერწმუნით, ნამდა შეილებნა თიშ კეთება, მუდგაშ გურშენ იფუჩუანთ. მარა დარწმუნებულ ვა რეთ-და, ჯგირ იჸუაფ, ვა დიფუჩუათ. ღორონთიშ სიტყვა მაფრთხილენა: „უჯგუშ რე, პირობა ვა დოდვე, ვინემ პირობა ქუდოდვე დო ვეშეასრულე (ეკლ. 5:5). თეშ უკულ გეგმირკვით ბიბლიურ პრინციპეფ, ნამუთ თე საკითხწკუმა რე დაკავშირებულ დო ბიბლიათ გოწაფილ სინდისით იმოქმედით.

ნამთინე ფუჩაფა ვაწინააღმდეგ ღორონთიშ ნებას. მაგალთო, იეჰოვაშ მოწმეეფ ქორწინებაშ აღთქმას დვანა. თე აღთქმა ფუჩაფაცალ რე. ღორონთიშ დო დამსწრე საზოგადოებაშ წოხოლე სინჯა დო მოჭყუდ ართიანს პირობას არზენა, ნამდა დაფასენა დო პატის ქოცენა ართიანს სიცოცხლეშ ბოლოშახ (ნამთინე წყვილქ შილებე ქორწინებაშ დროს ზუსტას თე სიტყვეფ ვა თქუას, მარა თინეფ იშენით დვანა აღთქმას ღორონთიშ წოხოლე). თეშ უკულ თინეფ ჩილ დო ქომონჯ რენა დო მთელ ცხოვრებას თაშ ოკო იჸუან (დაბ. 2:24; 1 კორ. 7:39). თაშ ნამდა, ქორწინებაშ აღთქმა ვაწინააღმდეგ ღორონთიშ ნებას.

ნამთინე ფუჩაფა ოწინააღმდეგ ღორონთიშ ნებას. ჭეშმარიტ ქრისტიანეფ ვეფუჩუანა, ნამდა იარაღით დოთხილანა მუნეფიშ ქიანას ვარდა ვარიას ქოთქუანა მუნეფიშ რწმენაშე. თეცალ საქციელ ოწინააღმდეგ ღორონთიშ ნებას. ქრისტიანეფ ოკო ვა რდან „ქვეყნიერებაშ ნაწილ“. ათეშენ ჩქი ვა ბღებულენთ მონაწილებას დაპირისპირება დო კონფლიქტეფს (იოან. 15:19; ეს. 2:4; იაკ. 1:27).

ნამთინე ფუჩაფა სინდისიშ გინაჭყვიდირალ რე. მინშა ფუჩაფაშახ ჯგირო ოკო დეფიფქრათ იესოშ რჩევაშენ: „კეისარს კეისარიშ  ქიმეჩით დო ღორონთის — ღორონთიშ“ (ლუკ. 20:25).

მაგალთო, ქრისტიანქ ქიგეგ, ნამდა მოქალაქეობაშ ვარდა პასპორტიშ მიოღებელო თიშე ართგურობაშ პირობაშ დოდვალას ითხინა, მარა თე ქიანას თეცალ პირობაშ დოდვალა ღორონთიშ კანონს არგამათ ქაწინააღმდეგუნ-და, თის ბიბლიათ გოწაფილ სინდის ვემეჩანს თეშ კეთებაშ უფლებას. მთავრობაქ შილებე ქრისტიანეფს უფლება ქიმეჩას პირობა თიშნერ სიტყვეფიშ ქუდოდვას, ნამუთ უკულ სინდისის ვეშუწუხენს.

თეცალ პირობაშ დოდვალა შილებე რომაელეფიშ 13:1-ს მოჩამილ პრინციპიშ მეჸუნაშა მიშეშას. თექ ჭარჷ: „არძაქ დემორჩილას ხელისუფლებას“. ათეშენ ქრისტიანქ შილებე არასწორო ვემირჩქინას თე მომენტის ფუჩაფა, მუშენდა ღორონთ ქრისტიანეფშე ხელისუფლებაშ მორჩილებას ითხინს.

თეს გეძინელ, მანგარ მნიშვნელოვან რე, ურჩქილათ ბიბლიათ გოწაფილ სინდისის, მუჟამსით ფუჩაფაშ დროს ჩქინდე ითხინა ჟესტეფიშ ვარდა მუდგარენ ნივთეფიშ გიმორნაფას. ჯვეშ რომაელეფ დო სკვითეფ ფუჩაფაშ დროს ირინუანდეს მუნეფიშ ყამეფს დო მიშინუანდეს ომიშ ღორონთიშ ძალიერებას, მუთ თინეფშო თიშ გარანტია რდჷ, ნამდა აუცილებერო შეასრულენდეს დოდვალირ სიტყვას. ბერძნეფ ფუჩაფაშ დროს ხეს ჟიშე ეჭოფუნდეს დო თეშნერო აღიარენდეს, ნამდა არსებენდჷ ზებუნებრივ ძალა, ნამუთ ოკვირუდ თინეფიშ სიტყვეფ დო საქმეეფს დო თიშ წოხოლე პასუხიშმგებელეფ რდეს.

მუშო ოკო რაგად, იეჰოვაშ მსახურეფ ვეფუჩუანა ეროვნულ სიმბოლოეფიშ წოხოლე, ნამუთ ტყურა თაყვანიშმცემლობაწკუმა რე დაკავშირებულ. მარა მუჭო ოკო მიქცუათ, მუჟამსით სასამართლოს თქვანდე მითხინა, ბიბლიაშა ხეგედვალირო დიფუჩუათ, ნამდა ხვალე სიმართლეს თქუანთ? თე დროს თქვა შილებე გეგნოჭყვიდათ, ქუდაჸუნათ თინეფს, მუშენდა ბიბლია მიშინუანს ღორონთიშ ართგურ მსახურეფს, მით ფუჩაფაშ დროს მუდგარენ ჟესტეფს ირინუანდეს (დაბ. 24:2, 3, 9; 47:29—31). მნიშვნელოვან რე, ფშუდან, მუჟამსით იფუფჩუანთ, ღორონთიშ წოხოლე ბდვანთჷ სიტყვას, ნამდა სიმართლეს ფთქუანთ. თქვა მზათ ოკო რდათ, ირფელს, მუდგას რკითხენა, სიმართლე უპასუხათ.

მანგარო ვაფასენთ იეჰოვაწკუმა ჩქინ ურთიერთობას, ათეშენ ფუჩაფაშახ ოკო ქიბლოცათ დო ჯგირო დეფიფქრათ, ნამდა დებრწმუნათ, ხომ ვაწინააღმდეგ თინა ჩქინ სინდისის დო ბიბლიურ პრინციპეფს. თაშ ნამდა, მნიშვნელოვან რე, რშუდან, ფუჩაფას გეგნოჭყვიდუნთ-და, აუცილებერო ოკო შეასრულათ თინა (1 პეტ. 2:12).