Faanra ke mow be’, ma aram e “ke yog bbugithin nrib ga’ fan ni be micheg ni nge rin’ ban’en mab ga’ ni ma fanay Got . . . ni nge mang mich riy.” Re n’ey e rayog ni ban’en ni ka nog nga l’uguney ara kan yoloy nga but’.

Rayog ni nge lemnag boch e girdi’ nib kireb ni ngan mow ni bochan e gaar Jesus: “Dab mmicheged [mmownaged] ngak be’ u p’eowchen Got e tin ni ka mogned ngak faanem ni bay mu rin’ed . . . Ke mus ni nge lungum ‘Er rogon’ fa reb e nge lungum ‘Dangay’​—ma faanra yugu ban’en e nga mog ma aram e yib rok Faanem nib Kireb.” (Matt. 5:33-37) Riyul’ ni manang Jesus ni be yog fare Motochiyel rok Moses ni bay boch ban’en ni ma rin’ piyu Israel nthingar ra mowgad riy, maku bay boch e tapigpig rok Got ni yad ba yul’yul’ ni ur mowgad. (Gen. 14:22, 23; Ex. 22:10, 11) Ku manang ni mus ngak Jehovah maku bay boch ban’en ni i mownag. (Heb. 6:13-17) Ere n’en ni yog Jesus e der yip’ fan nib kireb ni ngad mowgad. Ya be yog nsusun e dab da mownaged boch ban’en nde ga’ fan ara dariy rogon. Gubin ngiyal’ nsusun e ngad ted u gil’ e n’en kad micheged ni ngad rin’ed, ya aram e n’en baadag Jehovah ni ngad rin’ed.

Ere mang e susun ni ngam rin’ ni faanra ka nog ngom ni ngam mownag ban’en? Som’on e ngam guy rogon ni ngari mich nrayog rom ni ngam rin’ e n’en kam micheg. Faanra gathi rib mich u wan’um nrayog rom fare n’em ma kab fel’ ndab mmicheg ban’en. Be ginangey e Thin rok Got ni be gaar: “Kab fel’ e bin ndab mmicheg ban’en ko bin ni ngam micheg ban’en ma dab mu rin’.” (Ekl. 5:5, BT) Bin migid e ngam yaliy boch i kenggin e motochiyel u Bible ni bay rogon ko n’en ngam micheg, ngemu’ mag dugliy e n’en ni ngam rin’ nib puluw ko nangan’ rom ni kan skulnag ko thin nu Bible. Mang boch i kenggin e pi motochiyel nem ni bay u Bible?

Bay boch ban’en ni yima mownag nde togopuluw ko n’en nib m’agan’ Got ngay. Bod nnap’an nra mabgol l’agruw e Pi Mich Rok Jehovah, ma bay boch ban’en ni yow ma micheg ngorow. Yow ra micheg u p’eowchen Got nge girdi’ ni yow ra t’ufegew yow mar tew farow u “n’umngin nap’an e yafos [rorow].” (Yu wu’ e mabgol e sana dab rogned e pi thin ney nri bod rogon ni bay u roy, machane ku yad ma micheg ban’en u p’eowchen Got.) Tomuren ma aram e rayog ni nga nog ni kar mabgolgow ma susun e ngar parew ni yow mabgol u n’umngin nap’an e yafos rorow. (Gen. 2:24; 1 Kor. 7:39) Re n’ey ni kar michegew ngorow e ba fel’ mab puluw ko n’en nib m’agan’ Got ngay.

Bay boch ban’en ni yima mownag nib togopuluw ko n’en nib m’agan’ Got ngay. Reb e tin riyul’ e Kristiano e dabi un i micheg ni nge fanay talin e cham ni nge ayuweg reb e nam ara nge digey e michan’ rok ngak Got. Ya faanra rin’ e re n’ey, ma aram e ke th’ab e motochiyel rok Got. Piin Kristiano e thingar dab ra manged bang ko “fayleng,” ere dabiyog ni ngad uned ko maluagthin nge cham ni ma  tay e girdi’ nu fayleng.​—John 15:19; Isa. 2:4; Jas. 1:27.

Bay boch ban’en ni yima mownag nra be’ ma nge dugliy ni be yan u rogon e nangan’ rok. Yu ngiyal’ e ba t’uf ni ngad fal’eged i lemnag fare fonow ni pi’ Jesus ni be yog ni ‘ngad pied ngak e pilung nu Roma e tirok ban’en, ma gad pi’ ngak Got e tirok Got ban’en’ u m’on ni ngad micheged ban’en.​—Luke 20:25.

Bod nsusun e ke yan i ngongliy reb e Kristiano e babyor rok ni nge mang girdien reb e nam ara ke yan i fal’eg e passport rok me yan i nang ni bay ban’en nthingari mownag. Faanra re n’ey e be yip’ fan ni nge micheg ni nge rin’ ban’en nib togopuluw ko motochiyel rok Got, ma aram e dabi pag e nangan’ rok ni kan skulnag ko thin nu Bible ni nge micheg nra rin’ fare n’em. Machane sana rayog ni nge pag e am ni ngan thilyeg boch ban’en u rogon e tin nge micheg ya nge yag ni pag e nangan’ rok ni nge micheg fare n’em.

Re n’ey nra rin’ e rayog nib puluw ko fare kenggin e motochiyel ni bay ko Roma 13:1 ni be gaar: “Gubin e girdi’ ma thingar ra folgad ko am.” Ere rayog ni nge dugliy fare Kristiano ndariy ban’en nib kireb riy ni nge micheg ni nge rin’ ban’en ni ke mu’ Got i yog u m’on riy nib t’uf ni nge rin’ e piin Kristiano.

Faanra ka nog ngom ni ngam fanay ban’en ara ngam rin’ ban’en nga paam u nap’an ni ngam micheg ban’en, ma kub ga’ fan ni ngam fol ko nangan’ rom ni kan skulnag ko thin nu Bible. Piyu Roma nge pi Scythian kakrom e yad ma mownag ban’en ni yad be fanay e sayden rorad, ma re n’ey e be yip’ fan ni yad be fanay e pow u reb e got ko mahl ni ngar micheged nrayog ni ngan pagan’uy ngorad. Piyu Greece e yad ma tining barba’ i pa’rad nga lang u nap’an ni yad be mownag ban’en. Yad manang ni bay reb e kan nib gel gelngin ni be motoyil ko n’en yad be yog, ma be guy e n’en yad be rin’, ma ra yan i tomur ma ra be’ ma nge weliy ngak rogon e tin i rin’.

Bin riyul’ riy e, reb e tapigpig rok Jehovah e dabi mownag ban’en ni be fanay ban’en ni pow ko nam ni bay rogon ko liyor ni googsur. Machane uw rogon ni faanra ka nog ngom u tagil’ e puf oloboch ni ngam tay paam nga daken e Bible mag micheg ndab mu ban ko tin yira fith ngom? Faanra arrogon, ma rayog ni ngam dugliy ni ngam rin’ e re n’ey ni bochan e be yog e Bible murung’agen boch e girdi’ ni yad ba yul’yul’ nrin’ed boch ban’en nga pa’rad u nap’an ni yad be micheg ban’en. (Gen. 24:2, 3, 9; 47:29-31) Machane ba ga’ fan ndab mu pagtalin ni faan ga ra rin’ ban’en ni aray rogon, ma aram e ga be micheg u p’eowchen Got ni ga ra yog e tin riyul’. Ba t’uf ni nge m’agan’um ngay ni ngam pi’ e fulweg u gubin e deer ni yira fith ngom u fithik’ e yul’yul’.

U m’on ni ngad mownaged ban’en, ma susun e ngad meybilgad ma gad fal’eg i lemnag e n’en ngad mownaged, ma gad guy rogon ndabi togopuluw ko nangan’ rodad ara pi kenggin e motochiyel u Bible ni bochan e ba ga’ fan u wan’dad e tha’ u thildad Jehovah. Faanra kam dugliy ni ngam micheg ban’en, ma thingar mu tay u gil’ e n’en kam micheg.​—1 Pet. 2:12.