Ti diccionariu ná diidxaʼ, jurar riniʼni «guni prometer tuuxa nezalú Dios zuni xiixa» (Diccionario de uso del español, de María Moliner). Zanda guni tuuxa ti juramentu pa gucaa ni o guiníʼ ni.

Nuu tu riníʼ ique cadi jneza nga guni jurarnu purtiʼ Jesús guníʼ: «Cadi lica guni jurartu. […] Laguiníʼ “ya” pa zúnitu xiixa, ne laguiníʼ “coʼ” pa qué zúnitu ni. Intiica sti cosa guiníʼ binni la? maʼ de Binidxabaʼ zeeda ni» (Mat. 5:33-37). Gunna Jesús guyuu ora gunabaʼ Ley stiʼ Moisés que ca israelita guni jurarcaʼ ne laaca guyuu xpinni Dios ni bibani dxiqué ni biʼniʼ jurar (Gén. 14:22, 23; Éx. 22:10, 11). Laaca gúnnabe biʼniʼ jurar Jehová (Heb. 6:13-17). Ngue runi cadi caníʼ diʼ Jesús qué zanda guni jurar binni. Ni caniʼbe nga naquiiñeʼ guiníʼ ique chaahuinu ante guni jurarnu o cadi guni jurarnu pur ti cosa ni huaxiéʼ risaca. Siempre naquiiñeʼ guni cumplirnu né ni guni jurarnu, purtiʼ nga nga ni ribeza Jehová gúninu.

Yanna, ¿xi naquiiñeʼ gúniluʼ pa guinábacabe lii guni jurarluʼ yaʼ? Primé la? biiyaʼ pa zanda guni cumplirluʼ ni. Pa nánnaluʼ qué zanda guni cumplirluʼ ni, cadi guni diouʼ ni. Lu Stiidxa Dios zeeda conseju riʼ: «Jma galán cadi gúniluʼ ti voto que gúniluʼ ni ne qué guni cumplirluʼ ni» (Ecl. 5:5). Despué, biyubi ca principiu ni zeeda lu Biblia ni zacané lii gánnaluʼ pa jneza juramentu ni canábacabe lii gúniluʼ ne yenanda ni ná conciencia stiluʼ pur ni maʼ biziidiluʼ de lu Biblia para guicaaluʼ decisión ca. ¿Gunáʼ nga caadxi principiu ni zeeda lu Biblia yaʼ?

Nuu biaje cadi cuchéʼnenu Dios pa guni jurarnu. Ora richaganáʼ chupa binni ni naca testigu stiʼ Jehová, rúnicaʼ voto ni zeeda gaca casi ti juramentu. Runi prometer novio ne novia ca nezalú Dios ne nezalú xcaadxi binni zannaxhiicaʼ, zapasaacaʼ ne zuni respetársaacaʼ biaʼ dxi guibánicaʼ lu Guidxilayú riʼ. (Zándaca cadi sicaríʼ peʼ ca diidxaʼ ni riníʼ xcaadxi binni ora richaganáʼ, peru neca zacá rúnicabe ti voto nezalú Dios). Ne óraca maʼ ti guendaxheelaʼ guirópacabe, ne naquiiñeʼ guindaa guendaxheelaʼ stícabe guidubi xquendanabánicabe (Gén. 2:24; 1 Cor. 7:39). Jneza nga guni binni voto ora guichaganáʼ ne cadi cucheené ni ná Dios.

Nuu biaje zuchéʼnenu Dios pa guni jurarnu. Guzéʼtenu ti ejemplu, ca xpinni Cristu qué zuni jurarcaʼ zanaazecaʼ guiibaʼ para chitíndecaʼ pur xquídxicaʼ o gusaanaʼ de guni crecaʼ Dios. Pa gúnicabe ni la? maʼ cadi zinándacabe ni ná Dios. Cumu cadi «parte de guidxilayú» riʼ ca xpinni Cristu la? nga runi  qué riuucabe ora ridinde ca guidxi ca (Juan 15:19; Is. 2:4; Sant. 1:27).

Nuu juramentu maʼ cada tobi naquiiñeʼ guʼyaʼ pa qué zuchiiñaʼ conciencia stiʼ laa pa guni ni. Nuu biaje, ante guni jurar ti xpinni Cristu naquiiñeʼ guiníʼ ique chaahuiʼ conseju ni bidii Jesús ora guníʼ: «Laquixe César stiʼ César, ne lagudii Dios stiʼ Dios» (Luc. 20:25).

Guiníʼ íquenu racalaʼdxiʼ ti xpinni Cristu gacaʼ ciudadanu stiʼ ti guidxi o gudiicabe laa pasaporte peru para ganda gudiicabe ni laabe napa xidé gúnibe ti juramentu. Pa zucheenebe ley stiʼ Dios ra gúnibe juramentu ca, ni maʼ biziidibe de lu Biblia nga zacané laabe cadi gúnibe ni. Zándaca gudii gobiernu lugar guidxaa caadxi diidxaʼ ni zeeda lu juramentu ca para ganda gúnibe ni.

Pa gúninu ti juramentu ra bichaa gobiernu caadxi diidxaʼ, zinándanu ni ná Romanos 13:1, luni riete: «Naquiiñeʼ guzuubaʼ guiráʼ binni stiidxaʼ ca autoridad». Nga runi, zándaca guiníʼ ique ti xpinni Cristu cadi cuchee pa guni ti juramentu purtiʼ Dios peʼ nga canabaʼ laa gúnini.

Laaca naquiiñeʼ chinanda tuuxa ni ná conciencia stiʼ pur ni maʼ biziidiʼ lu Biblia ora guinábacabe laa iquiiñeʼ ti cosa o guni ti seña para guni jurar. Dxiqué, ca romanu ne ca binni ni runibiáʼcabe casi escitas biʼniʼ jurarcaʼ pur ca espada sticaʼ, rucaacaʼ ridxi Dios de guerra sticaʼ para gusihuínnicaʼ dxandíʼ ni caniʼcaʼ. Ca griegu la? rindisaʼ nacaʼ guibáʼ para guni jurarcaʼ. Zaqué rusihuínnicabe nuu tuuxa guibáʼ ni cayuuyaʼ ni caníʼcabe, ni cayúnicabe ne ni zanda cuidxi cuenta laacabe.

Qué zuni ti xpinni Jehová ti juramentu nezalú ti símbolo stiʼ ti guidxi o nezalú xiixa ni runi adorar binni. Peru ¿pa chebe nezalú ti tribunal ne guinábacabe laabe quixhenabe lu ti Biblia para guni jurarbe zaniʼbe ni dxandíʼ yaʼ? Zanda gúnibe ni, purtiʼ lu Biblia riete de xpinni Dios ni biʼniʼ ti juramentu casi ni bizéʼtenu riʼ (Gén. 24:2, 3, 9; 47:29-31). Pa gúninu ni la? cadi guiaandaʼ laanu nezalú Dios nga cayuni jurarnu zaninu ni dxandíʼ. Nga runi, naquiiñeʼ guininu ni dxandíʼ ora guinabadiidxacabe laanu xiixa.

Cumu nabé risaca para laanu gaca xhamígunu Jehová, nga runi naquiiñeʼ guni orarnu ne guiníʼ ique chaahuinu ante gúninu ti juramentu. Qué zuni jurarnu pa zuchiiñaʼ ni conciencia stinu ne zuchéʼnenu ca principiu zeeda lu Biblia. Nga runi, pa gúninu xiixa juramentu la? guni cumplirnu ni (1 Ped. 2:12).