Kacokke myero oter ni nyomme mukwongo ogik woko i kare ma en onyomme odoco, dok nyomme manyen-ni tye ma rwatte ki cik. Me niang tyen lok mumiyo wamoko kit man, kong wanenu gin ma Yecu owaco i kom keto keny ki nyomme odoco.

Kit ma kicoyo kwede i Matayo 19:9, Yecu otito tyen lok acel keken ma Ginacoya miyo me keto keny. En owaco ni: “Dano mo ma oryemo dakone, ma pe pi tim me tarwang, ce onyomo dako mukene, nongo otimo abor.” Ki i lok pa Yecu, wapwonyo ni (1) tim tarwang aye obedo tyen lok acel keken ma Ginacoya miyo me keto keny dok (2) laco ma oketo nyomme kun dakone pe otimo abor ci onyomo dako mukene nongo otimo abor. *

Tika lok pa Yecu-ni tyen lokke ni laco ma otimo abor dok oketo nyomme nongo tye agonya me nyomme i yo ma Ginacoya cwako? Pe tye kit meno. Ka laco otimo abor, dakone, ma pe otimo bal-li, twero moko ka ce ebitimo kica ki cware nyo pe. Ka dakone okwere woko, ce ocako yub me keto nyomgi ma lubbe ki cik, ci gin aryo ducu gibedo agonya me nyomme odoco teke dong kityeko keto kenygi woko.

Ki tungcel, twero bedo ni dakone tye ki miti me gwoko nyomgi, dok owaco ki cware ni etye atera me timme kica. Ento ket kong ni laco ma otimo abor-ni okwero kica ma dakone onyutte ci odide wang ma oketo kenygi kono? Kit macalo dakone tye atera me timme kica ki me medde ki nyomgi, man biweko laco-ni pe bedo agonya me nyomme odoco ma lubbe ki Ginacoya. Ka en omoko tamme me nyomo ngat mukene kadi bed pe tye agonya, ci nongo en otimo abor doki. Bimitte ni luelda me kacokke dok guket komitti me ngolo kop odoco pi neno balle manyen-ni.—1 Kor. 5:1, 2; 6:9, 10.

Ka laco ma pe tye agonya me nyomme ma lubbe ki Ginacoya onyomme odoco, kacokke myero onen nyomme macon ki nyomme manyen-ni nining? Ma lubbe ki Ginacoya, tika nyomme macon ca pud cung? Tika dakone ma onongo pe otimo bal-li pud twero kwero nyo timo kica ki cware macon-ni? Tika omyero kimedde ki neno nyomme manyen-ni calo en tye ka timo tim me abor?

I kare mukato, onongo kacokke medde ki neno nyomme manyen calo en tye ka medde ki timo abor teke dakone ma pe otimo bal-li onongo pud kwo, pe onyomme ki ngat mukene, dok pe otimo tim tarwang. Ento i kare ma Yecu oloko i kom keto keny ki nyomme odoco, en pe oloko tutwal i kom laco nyo dako ma pe otimo bal-li. Me ka meno, en otito ni laco ma oketo nyomme kun dakone pe otimo abor ci onyomo dako mukene, nongo otimo abor. Ka tye kit meno, ci keto keny ki nyomme odoco, ma Yecu  owaco ni rom ki timo abor, nongo ogiko nyomme macon ca woko.

Ka laco oketo kenye ci onyomo dako mukene, nongo dong pe twere pi dakone macon, ma pe otimo bal-li, me timo kica nyo kwero cware macon-ni. Pi meno, pe dong mitte ni en omok tam matek man me kwero nyo timo kica ki cware macon-ni. Medo i kom meno, kacokke bineno nyomme manyen-ni ni tye atir i te cik kadi bed dakone macon ca pe oto, onyomme odoco, nyo otimo abor. *

I labol ma kinyamo malo-ni, laco otimo abor, ci kenygi oket woko. Ento ket kong ni laco pe otimo abor ento odide oketo kenygi ci onyomme odoco. Nyo ket kong ni laco pe otimo abor ma peya nyomgi oket ento otimo i nge ketone ci onyomme odoco kadi bed dakone onongo mito timme kica. I labol magi ducu, keto keny ki nyomme odoco rom ki timo abor, dok meno giko nyomme macon woko. Nyomme manyen-ni obedo gin ma nongo cik omoko. Watchtower me Novemba 15, 1979, pot karatac 32 otito kit man ni: “Kombeddi dong en odonyo i nyom manyen dok pe twero gikone ci dok cen bot dakone macon; timme me keto keny, abor kacel ki nyom odoco dong ogiko nyomme macon woko.”

Niango man manyen-ni pe weko Lukricitayo gineno nyom calo pe obedo gin maleng nyo ni timo abor pe obedo bal madit. Ka laco oketo kenye kun dakone pe otimo abor ci onyomo dako mukene ma en pe tye agonya me nyomone ma lubbe ki Ginacoya, ci bimitte ni luelda guket komitti me ngolo kop pien laco-ni otimo abor. (Ka dakone manyen-ni bene obedo Lacaden, ci en bene kibingolo kop i wiye pi abor.) Kadi bed pe kineno nyom manyen man calo gitye ka medde ki timo abor, laco-ni pe bibedo mupore me nongo mot me tic mo keken i kacokke pi mwaki mapol, nio wang ma jo mukene cwinygi okwe i kome pi balle nyo gucako mine woro. Ma peya kimine mot me tic mo keken, luelda bene omyero gutam i kom kit ma dakone macon-ni tye kwede. Twero bedo ni dakone macon tye ki lutino matino ma kiwekogi niyak, nyo tye ki turcwiny nyo peko me can lim ma obino macalo adwogi me keto kenye.—Mal. 2:14-16.

Kit macalo adwogi marac adada bino pi keto nyom ki nyomme odoco i yo ma Ginacoya pe cwako, bedo me ryeko ka Lukricitayo gilubo lanen pa Jehovah dok gitero nyom calo gin maleng.—Latit. 5:4, 5; Ibru 13:4.