Ha ngéda i, mankéé nu a ntiimba biiba, likoda li nla tehe le libii jé li bisu li mal, ni le libii li mondo jon li yé. Inyu tibil nok inyuki di nkal hala, di béñge kii Yésu a bi kal inyu jam li maboha ni i tiimba bii.

I kaat Matéô 19:9, Yésu a bi yelel mpom jam u u nla tinde babiina i bos. A bi kal le: “Nu ni nu a mbos ni nwaa wé, handugi inyu malal ma nyega, ndi a bii muda numpe, wee a nke i ndéñg.” Bibañga bi Yésu bi niiga bés le (1) ndik malal ma nyega motama mon ma nla tinde babiina i bos ni le (2) munlôm nu a mbos ni nwaa ibabé le Bibel i ti nye kunde ndi a tiimba biiba a nke ndéñg. *

Baa Yésu a nsômbôl kal le i munlôm a nke ndéñg, i mbus a bos ni nwaa a yé kunde i biiba? Hala bé. I ngéda sobiina wada a nke ndéñg, nuu sobiina numpe nyen a nkit too a nwéhél too a nwéhél bé. Ibale a ntjél nwéhél sobiina nu a nke ndéñg ndi a bos, hiki sobiina a yé kunde i biiba i ngéda ngomin a mal neebe le ba bos.

Ndi, i nla pam le muda a nsômbôl yén ni nlôm, a nla kal nye le a gwé ngôñ i nwéhél nye. Kii i nla tagbe ibale munlôm nu a nke ndéñg a ntjél le nwaa a nwéhél nye, a bos ibabé le nwaa a neebe i jam li? Kiki nwaa a yé bebee i nwéhél nye ni i kena libii ni bisu, Bibel i nti bé munlôm nu kunde i tiimba biiba. Ibale munlôm a nai ndik le a mbii muda numpe, ki le Bibel i nti bé nye i kunde i, wee a ntiimba ke ndéñg, a nlama tagbe i juu li bikodlene.​—1 Korintô 5:1, 2; 6:9, 10.

I ngéda munlôm a ntiimba biiba ki le Bibel i nti bé nye kunde, lelaa likoda li nlama tehe libii jé li bisu ni libii jé li mondo? Kingéda matiñ ma Bibel, baa a ngi yii mbiibaga ni nwaa nu bisu? Baa muda nu libii li bisu a nla ki kit le a nwéhél nlôm tole a nwéhél bé nye? Baa lôk kéé i nlama tehe libii li mondo kiki maada ma ndéñg?

Mu nwii mi ntagbe, likoda li bé tehe libii li mondo kiki maada ma ndéñg ibale nwaa nu bisu a ngi yii niñ, a yé ngi ke libii lipe, tole a nke bé ndéñg. Ndi Yésu a bi pôdôl bé sobiina nu a nke bé i ndéñg i ngéda a bé pôdôl maboha ni i tiimba bii. A bi toñol le, munlôm nu a mbos ni nwaa ibabé le Bibel i ti nye kunde, ndi a biiba ni muda numpe, a nke ndéñg. Ha ngéda i, maboha ni i tiimba biiba, bi Yésu a nsébél le ndéñg, bi mélés libii li bisu.

I ngéda libii li bisu li mal inyule mut a mbos a tiimba biiba, muda nu libii li bisu a nla ha bé kal le a nwéhél nlôm tole a ntjél nwéhél nye. A gwé ha bé ki le a  yoñ i nya makidik i. U héya hala, to ibale muda nu libii li bisu a yii i niñ, a tiimba bé biiba tole a ke bé ndéñg, hala a nhéñha bé litehge li likoda inyu libii li mondo. *

Mu hihéga di nyoñ, munlôm a nke ndéñg, ndi a bos. Kii i ga tagbe ibale munlôm a mbos, a tiimba biiba ki le a nke bé ndéñg? Tole kii i ga tagbe ibale munlôm a nke bé ndéñg ilole a mbos, ndi a ke ndéñg mbus maboha, a témb a biiba tolakii nwaa nu bisu a bééna ngôñ i nwéhél nye? Mu dihéga di tjodisôna, maboha ni libii li mondo, bi yé ndéñg, jon bi mélés libii li bisu. Libii li mondo li téé i bisu bi ngomin. Nkum Ntat nu 15 février, 1980 a nkal i lipep 31 le: “Nano, a njôp i libii li mondo, a ta bé le a mélés jo a témb ni muda nu bisu; maboha, ndéñg ni libii li mondo bi mélés libii li bisu.”

I biniigana bi mondo bini bi nsômbôl bé kal le libii li yé yom i njôha tole ndéñg i ta bé béba ikeñi. Munlôm nu a mbos ni nwaa ibabé le Bibel i ti nye kunde, ndi a biiba ni muda numpe a nlama tagbe i juu li bikodlene inyule a nke ndéñg. (Ibale sobiina nu mondo a yé kristen, yak nye a ga tagbe i juu li bikodlene inyule a nke ndéñg.) Tolakii ba ntehe bé libii li mondo kiki maada ma ndéñg, munlôm a ga kôhna bé nson u tôbôtôbô wo ki wo inyu ngandak nwii letee ba ôm ha bé nye nsohi inyu jam libe a bi boñ. Ilole mimañ mi nti nye ngim nson, mi nlama wan libak li nwaa wé nu bisu nu a bi lama nok njôghe inyu béba nlôm a bi boñ nye, ni libak li boñge batitigi ba nlôm a bi tjôô.​—Malaki 2:14-16.

Bikuu bôt ba nkôs i ngéda ba mbos tole ba ntiimba biiba ibabé le Bibel i ti bo kunde i boñ hala, bi nlama tinde bikristen i kôna Yéhôva ni i tehe le libii li ta bé njôha.​—Ñañal 5:4, 5; Lôk Héber 13:4.