Sɛ i sɔ sa liɛ’n ju’n, ɔ fata kɛ aniaan’m be wun i wlɛ kɛ, kɛ yasua’n ko ja bla uflɛ’n nn aja laa’n w’a wie. Ɔ maan aja uflɛ sɔ’n su yɛ be di siɛn’n niɔn. Kɛ ɔ ko yo naan y’a wun i wlɛ kpa’n, maan e fa e ɲin e sie i be wiengu yralɛ’n nin sran uflɛ jalɛ’n be su ndɛ nga Zezi kannin’n i su.

Matie 19:9 nun’n, Zezi kannin like kunngba cenje nga ti yɛ yasua kun kwla yrɛ i yi’n i ndɛ. Ɔ seli kɛ: “Sran ng’ɔ yrɛ i yi’n, sɛ nán kɛ i yi’n w’a kunndɛ bian i bo ti’n, naan ɔ ko ja bla uflɛ’n, nn w’a kunndɛ bla i yi bo.” Ndɛ nga Zezi kannin’n kle e like nɲɔn. I klikli’n yɛle kɛ sɛ sran kun kunndɛ bla annzɛ bian i wiengu kun’n i bo’n, i sɔ’n ngunmin cɛ yɛ ɔ kwla yo maan be yra-ɔ. Kpɛkun i nɲɔn su’n, yɛle kɛ sɛ yasua kun yrɛ i yi kusu nn bla’n w’a kunndɛman bian i bo’n naan ɔ ko ja bla uflɛ’n, i bɔbɔ yɛ w’a kunndɛ bla i yi bo-ɔ. *

?Ndɛ nga Zezi kannin’n kle kɛ sɛ yasua kun kunndɛ bla i yi bo naan ɔ yrɛ i’n, Ɲanmiɛn Ndɛ’n mɛn i atin kɛ ɔ ja bla uflɛ? Cɛcɛ, nán blɛ kwlaa nun-ɔn. Kɛ yasua kun kunndɛ bla i yi bo’n, i yi’n kwla se kɛ ɔ́ yáci cɛ́ i annzɛ ɔ́ yrɛ́ i. Sɛ i yi’n waan ɔ́ yrɛ́ i naan be ko yra awa ja su’n, be nɲɔn’n be kwla ja sran uflɛ siɛn’n.

Sanngɛ i yi’n kwla se kɛ ɔ kunndɛ kɛ be ja titi naan ɔ́ yáci cɛ́ i. ?Yɛ sɛ i yi’n yaci cɛ i naan i waan ɔ kplinman su kpɛkun ɔ ko yrɛ i awa ja su nin? Kɛ mɔ i yi’n yaci cɛli i’n ti’n, Ɲanmiɛn Ndɛ’n mɛnmɛn i atin kɛ ɔ ja bla uflɛ. Afin be te ja. Sɛ i waan saan fii ɔ́ já bla uflɛ naan ɔ ko jɛ i sakpa’n, nn w’a kunndɛ bla i yi bo ekun. Ɔ maan asɔnun kpɛnngbɛn’m bé yíɛ i wun ekun yɛ bé tú i fɔ.—1 Kor. 5:1, 2; 6:9, 10.

?Sɛ Ɲanmiɛn Ndɛ’n manman yasua kun i atin kɛ ɔ ja bla uflɛ naan ɔ ko ja bla uflɛ’n, wafa sɛ yɛ ɔ fata kɛ aniaan’m be bu aja laa’n nin aja uflɛ’n niɔn? ?Ɲanmiɛn ɲrun’n, be te di aja laa’n su? ?Bla nga i wun’n kunndɛli bla i bo’n, ɔ kwla se kɛ ɔ́ yáci cɛ́ i naan be ja ekun? ?Bla uflɛ ng’ɔ ko jɛli i’n, ɔ ti kɛ ɔ su kunndɛ bla i yi bo sa?

Laa nun’n, e seli kɛ sɛ i yi’n i ɲin te o su’n, annzɛ ɔ nin-a jaman bian uflɛ’n annzɛ ɔ nin-a kunndɛman bian uflɛ’n, nn ɔ te kunndɛ bla i yi bo. Kusu nn kɛ Zezi kán be wiengu yralɛ nin sran uflɛ jalɛ’n be ndɛ’n, w’a kanman bla nga be yoli i sa’n i ndɛ wie. Ɔ seli kɛ sɛ yasua yrɛ i yi kusu nn Ɲanmiɛn Ndɛ’n mɛnmɛn i atin kɛ ɔ yo sɔ naan ɔ ko ja bla uflɛ’n, nn w’a kunndɛ bla i yi sɔ’n i bo. Zezi ɲrun’n, kɛ ɔ yrɛli i yi ko jali bla uflɛ’n, ɔ kunndɛli bla i yi bo. Ɔ maan aja laa’n wieli.

Sɛ yasua kun yrɛ i yi naan ɔ ko ja bla uflɛ’n, kɛ ɔ fɛ i lɛ’n i yi laa’n kwlá seman kɛ ɔ́ yáci cɛ́ i kun. Ɔ maan i sɔ trɔ’n nunman i yi sɔ’n i ti su kun. I sɔ’n ti’n, ɔ fataman kɛ  aniaan’m be se kɛ, kɛ mɔ i yi laa’n nin-a wuman annzɛ ɔ nin-a jaman bian uflɛ annzɛ ɔ nin-a kunndɛman bian uflɛ’n ti’n, i wun laa’n te kunndɛ bla i bo. *

Sunnzun ase nga e fali’n nun’n, yasua’n kunndɛli bla i yi bo kwlaa naan w’a yrɛ i. ?Yɛ sɛ yasua’n w’a kunndɛman bla i yi bo kpɛkun ɔ yrɛ i ko ja bla uflɛ nin? ?Annzɛ sɛ w’a kunndɛman bla i yi bo naan ɔ yrɛ i kpɛkun i sin’n ɔ ko kunndɛ bla i yi bo kpɛkun ɔ ko ja bla uflɛ kusu nn i yi’n waan ɔ kplinman su nin? Sa kwlaa sɔ’n nun’n, kɛ mɔ yasua’n yrɛli i yi ko jali bla uflɛ’n ti’n, ɔ kunndɛli bla i yi bo. Ɔ maan aja laa’n w’a wie. I sɔ’n ti’n, awa’n i ɲrun’n, aja uflɛ’n yɛ be di su siɛn’n niɔn. Afuɛ 1979, Novanblu 15 Sasafuɛ Tranwlɛ’n i bue 32 su’n, e seli kɛ: “Kɛ mɔ yasua’n w’a ja bla uflɛ’n ti’n, ɔ kwlá sɛmɛn i sin i yi laa’n i sin kun. Kɛ ɔ yrali bla’n m’ɔ ko jali bla uflɛ’n, yɛ aja laa’n wieli-ɔ.”

Ndɛ’n i nun yiyilɛ uflɛ sɔ’n kleman kɛ e buman aja’n i like cinnjin annzɛ kɛ yasua kun kunndɛ bla i yi bo’n e bumɛn i like tɛ. Sɛ yasua kun yrɛ i yi kusu nn Ɲanmiɛn Ndɛ’n mɛnmɛn i atin kɛ ɔ yo sɔ naan ɔ ko ja bla uflɛ’n, asɔnun kpɛnngbɛn’m bé yíɛ i wun bé tú i fɔ. (Sɛ i yi uflɛ sɔ’n ti Zoova i Lalofuɛ’n, ɔ fata kɛ asɔnun kpɛnngbɛn’m be yiɛ i wun wie.) Kannzɛ aja uflɛ sɔ’n timan i yi bo bla kunndɛlɛ’n, sanngɛ be su manman yasua’n i junman fi asɔnun’n nun. Yɛ ɔ́ ká sɔ afuɛ kpanngban kpa. Asa’n, sɛ sa sɔ’n te sanngan aniaan wie’m be akunndan’n annzɛ sɛ i ti’n be ɲin yimɛn i kun’n, be su mɛnmɛn i junman. Kwlaa naan asɔnun kpɛnngbɛn’m b’a kplin su kɛ be mɛn i junman asɔnun’n nun ekun’n, ɔ fata kɛ be bu i yi laa’n i akunndan. Asa ekun’n, ɔ fata kɛ be nian sɛ kɛ ɔ́ yáci i yi’n, nn ba’m be te yo kanngan-o.—Mal. 2:14-16.

Kɛ nga e fa wunnin i lɛ’n sa’n, sɛ aniaan kun yrɛ i yi kusu nn Ɲanmiɛn Ndɛ’n mɛnmɛn i sɔ yolɛ’n i wun atin naan ɔ ja bla uflɛ’n, i bo’n su guaman kpa mɛnmɛn i. I sɔ’n ti’n, maan e kwlaa e bu aja’n kɛ nga Zoova fa bu i’n sa.—Aku. 5:3, 4; Ebr. 13:4.