Egbe emwi vbenian gha sunu, ọ khẹke ne etẹn ni rre iko rẹn wẹẹ, orọnmwẹ ne ọtẹn na ka gha ye sẹ ufomwẹ nẹ, nọ ghi ye nian, ẹre a ghi rẹn ọnrẹn ginna. Ne ima mieke na rẹn emwi nọ ya ima kha vberriọ, gi ima ziro yan emwi ne Jesu tae vbekpa ebe orọnmwẹ na sọ kevbe ne ọmwa dọlegbe ru orọnmwẹ.

Vbe ebe Matiu 19:​9, e Jesu keghi gi ima rẹn emwi ọkpa kẹkan nọ gha sẹtin ya ọmwa sọ ebe orọnmwẹ. Ọ khare wẹẹ: “Ne I tama uwa nian, ọmwa nọ rhirhi khu amwẹ ọnrẹn vbe ẹi re te ọ ru oghẹ, ighẹ ọ na vbe rhie okhuo ọvbehe, ọ ghẹ re.” Emwi eva ma miẹn ruẹ vbe ẹmwẹ ne Jesu ta na: (1) Deghẹ okpia ra okhuo na fi owẹ ye oha, ẹre iran khian na sẹtin sọ ebe orọnmwẹ. (2) Okpia gha sọ ebe orọnmwẹ vbene ọvbokhan rẹn ma na fi owẹ ye oha, ọ na ya rhie okhuo ọvbehe, te okpia nii ghẹ re. *

Te Jesu ghi ya ọna kha wẹẹ, okpia gha ghẹ, ọ na vbe sọ ebe orọnmwẹ, ọ mwẹ asẹ nọ khian ya dọlegbe rhie okhuo ọvbehe ra? Ẹn o, ẹi wa erriọ. Okpia gha fi owẹ ye oha, ọvbokhan rẹn nọ ma rẹn ọkpa rẹn eva sẹtin kha wẹẹ, irẹn gha yabọ ẹre ra irẹn i khian yabọ ẹre. Deghẹ ọ ma yabọ ọdafẹn ọnrẹn, iran na ghi ya sọ ebe orọnmwẹ, iran eva gha sẹtin dọlegbe gu ọmwa nọ rhirhi khọn iran ru orọnmwẹ, ọni ọre deghẹ ekọtu na kpasẹ ye ebe orọnmwẹ ne iran sọ re.

Sokpan, ne okhuo sẹtin kha wẹẹ, irẹn i khian sẹ ọdafẹn irẹn rae, irẹn gha ya ekhọe hia yabọ ẹre. Deghẹ ọdafẹn ọnrẹn nọ fi owẹ ye oha ma kue ghi vbo? Ọ na ya tobọre sọ ebe orọnmwẹ vbe ekọtu, vbọ khian ghi sunu? Ugbẹnvbe a miẹn wẹẹ, okhuo nii te mu egbe nọ ya yabọ ẹre kevbe wẹẹ, ọ ma te hoo nọ sẹ rae, e Baibol ma kpasẹ yọ ne okpia nii werriegbe rhie okhuo ọvbehe. Sokpan deghẹ okpia nii na rhie owẹ gberra ilele ọghe Baibol, ọ na ya dọlegbe rhie okhuo ọvbehe, te ọ dọlegbe ru oghẹ, ẹghẹ nii, agbaziro ọghe ediọn ni bu ohiẹn vbe iko, ghi dọlegbe bu ohiẹn ọnrẹn.​—1 Kọr 5:​1, 2; 6:​9, 10.

Deghẹ okpia na rhie owẹ gberra ilele ni rre Baibol, ọ na ya dọlegbe rhie okhuo ọvbehe, de aro nọ khẹke ne etẹn ni rre iko ya gha ghee orọnmwẹ nọ ka gha ye, kevbe nọ ghi ye nian? E Baibol kue yọ na ye gha tie irẹn vbe okhuo nọ ka rhie nii, ọdọ vbe amwẹ ra? Okhuo nọ ka rhie nii, nọ ma rẹn ọkpa rẹn eva gha ye sẹtin yabọ arowa ẹre ra, ra ẹi khian ghi sẹtin yabọ ẹre? Te iko khian ghi gha ghee ẹre wẹẹ, te okpia na kevbe okhuo nọ da rhie na ru oghẹ ra?

Vbe ẹghẹ nọ gberra, te etẹn vbe iko te gha ghee ẹre wẹẹ, te okpia na kevbe okhuo nọ da rhie ru oghẹ, ugbẹnvbe a miẹn wẹẹ, okhuo nọ ka rhie nọ ma rẹn ọkpa rẹn eva ye rre agbọn, ọ ma he rọnmwẹ okpia ọvbehe, kevbe wẹẹ, ọ ma vbe ru oghẹ. Vbọrhirhighayehẹ, e Jesu ma guan kaẹn ne okhuo nọ ma rẹn ọkpa rẹn eva nọ rrọọ, vbe ọ ta ẹmwẹ ebe orọnmwẹ na sọ kevbe ne ọmwa dọlegbe ru orọnmwẹ. Nọghayayerriọ, ọ keghi rhan otọ re wẹẹ, okpia gha sọ ebe orọnmwẹ vbene ọvbokhan rẹn ma na fi owẹ ye oha, ọ na ya rhie okhuo ọvbehe, te  okpia nii ru oghẹ. Emwi vbenian gha sunu, ne okpia nii na sọ ebe orọnmwẹ, nọ na vbe ya rhie okhuo ọvbehe, te ọ ru oghẹ. Nọnaghiyerriọ, orọnmwẹ nọ ka ru nii sẹ ufomwẹ nẹ.

Deghẹ okpia na sọ ebe orọnmwẹ, ọ na vbe ya rhie okhuo ọvbehe, okhuo nọ ka rhie nọ ma rẹn ọkpa rẹn eva i khian ghi sẹtin kha wẹẹ, irẹn yabọ ẹre ra irẹn ma yabọ ẹre. Ẹi khian ghi gha kpokpo egbe ba ẹmwẹ irẹn gha yabọ ọdafẹn irẹn ra irẹn i khian ghi yabọ ẹre. Yevbesọni, etẹn ni rre iko gha sẹtin tie okpia nii kevbe okhuo nọ da rhie, ọdọ vbe amwẹ, ọ gha khọnrẹn wẹẹ, okhuo nọ ka rhie nọ ma rẹn ọkpa rẹn eva ma he wu, ọ ma re dọlegbe rọnmwẹ okpia ọvbehe kevbe wẹẹ, ọ ma vbe ru oghẹ. *

Vbe igiemwi ne ima guan kaẹn ban, ne okpia nọ rrọọ ẹre ọ fi owẹ ye oha, nọ ghi ya iran sọ ebe orọnmwẹ. Sokpan deghẹ a na ghi miẹn wẹẹ, ne okpia ma fi owẹ ye oha, sokpan ọ na sọ ebe orọnmwẹ, ọ na vbe ya rhie okhuo ọvbehe ghi vbo? Adeghẹ a na vbe miẹn wẹẹ, ne okpia ma fi owẹ ye oha, a te miẹn wẹẹ, ọ sọ ebe orọnmwẹ ghi vbo, sokpan ọ na ghi fi owẹ ye oha vbe ọ ghi sọ ebe orọnmwẹ nẹ, ọ na ghi ya rhie okhuo ọvbehe, agharhemiẹn wẹẹ, ọvbokhan rẹn te mu egbe nọ ya yabọ ẹre? Emwi vbenian gha sunu, te okpia nii ghẹ re, nọ na sọ ebe orọnmwẹ kevbe nọ na ya rhie okhuo ọvbehe, nọnaghiyerriọ, orọnmwẹ nọ ka ru sẹ ufomwẹ nẹ. Arriọba kpasẹ ye orọnmwẹ nọ ghi dọlegbe ru.  The Watchtower ọghe November 15, 1979, ipapa 32, khare wẹẹ, “ugbẹnvbe a miẹn wẹẹ, ọ dọlegbe rhie okhuo ọvbehe nẹ, ẹi khian sẹtin bizugbe okhuo nọ rhie re na, nọ bu enọ ka rhie; ebe orọnmwẹ nọ sọ re, oghẹ nọ ru, kevbe nọ na ya rhie okhuo ọvbehe, mu orọnmwẹ nọ ka ru sẹ ufomwẹ nẹ.”

Irẹnmwi ne ima ghi mwẹ nian, ma rhie ma wẹẹ, ẹmwẹ orọnmwẹ ma ru ekpataki vbe aro e Jehova, ra ọ ma de emwi nọ rhiae deghẹ ọmwa na fi owẹ ye oha. Okpia gha sọ ebe orọnmwẹ, vbene ọvbokhan rẹn ma na fi owẹ ye oha, ọ na rhie owẹ gberra ilele ọghe Baibol, ọ na ya rhie okhuo ọvbehe, agbaziro ọghe ediọn ni bu ohiẹn, gha bu ohiẹn ọnrẹn zẹvbe ọmwa nọ fi owẹ ye oha. (Deghẹ Ovbiotu e Kristi ẹre okhuo nọ ghi ya rhie khin, te agbaziro ọghe ediọn ni bu ohiẹn khian vbe bu ohiẹn ọnrẹn zẹvbe ọmwa nọ ghẹ re.) Agharhemiẹn wẹẹ, a gha sẹtin tie irẹn vbe okhuo nọ da rhie ọdọ vbe amwẹ, kevbe wẹẹ ai khian gha ghee ẹre wẹẹ te iran ru oghẹ, okpia nii i khian sẹtin gha ru iwinna ne kpataki vbe uwu iko vbe ọwara ukpo nibun, a te do miẹn wẹẹ emwa hia suẹn gha rhie ọghọ nẹẹn kevbe wẹẹ, ohu i ghi vbe mu iran ye ozere nọ te do. Vbene ọ te suẹn gha ru iwinna eso vbe uwu iko, ediọn ghi ka vbe muẹn roro nẹ, vbene emwi ghi ye hẹ ne okhuo nọ ka rhie, kevbe ivbi iran ne giẹrẹ nọ bizugbe.​—Mal 2:​14-16.

Ọmwa gha sọ ebe orọnmwẹ, ọ na vbe ya rhie okhuo ọvbehe vbe odẹ nọ ma gu ilele ọghe Baibol ro, ọlọghọmwa nibun ẹre ọ si. Rhunmwuda ọni, te ọ khẹke ne Ivbiotu e Kristi gha ya egbe taa e Jehova, ne iran gha ya aro nọ ghaan ghee orọnmwẹ.​—Asan 5:​4, 5; Hib 13:4.