Adi erjabu ka ia mulihi, ianggap runggun perjabunna si sebelumna enggo dung janah perjabunna si mbaru e ianggap sah. Gelah siangkai engkai maka bage, mari sibahas kai si kataken Jesus kerna kalak si cerai ras si erjabu mulihi.

Bas Matius 19:9, ijelasken Jesus maka menurut Pustaka sada ngenca alasenna banci cerai. Nina, “Ise pe si nceraiken diberuna, adi labo perban perbahanen seks si salah, janah erjabu ia ras kalak si deban, ia enggo erlua-lua.” Arah kata-kata Jesus e siteh maka (1) bas Pustaka perbahanen seks si salah ngenca alasen si erban sekalak jelma banci cerai janah (2) adi sekalak dilaki ceraikenna diberuna tapi alasenna la sesuai ras Pustaka janah erjabu ka ia ras si deban, e ertina ia erlua-lua. a

Tuhu nge maksud Jesus maka dilaki si ngelakoken perbahanen seks si salah ras ceraikenna diberuna bebas erjabu mulihi? Lenga tentu. Adi sekalak dilaki erlua-lua, banci iban diberuna keputusen ampunina ntah lang dilakina e, perban diberuna e pihak si la ersalah. Adi la ia nggit ngampuni dilakina e janah cerai kalak e secara hukum, duana kalak e bebas erjabu mulihi ras si deban adi enggo dung proses cerai e.

Tapi diberuna si la ersalah e banci saja la nggit cerai janah ikatakenna maka nggit ia ngampuni dilakina e. Uga adi dilakina si enggo erlua-lua tetap ceraikenna diberuna e secara sepihak amin pe nggit diberuna e ngampuni ia? Menurut prinsip Pustaka, dilaki e la bebas erjabu mulihi perban situhuna diberuna e nggit ngampuni ia ras la nggit cerai ras ia. Adi erjabu dilakina e ras si deban padahal la ia bebas erjabu, e ertina erlua-lua ka ia. Emaka arus iban pertua mulihi panitia pengadilen.​—1 Kor. 5:1, 2; 6:9, 10.

Adi sekalak dilaki erjabu ka mulihi padahal menurut Pustaka la ia bebas erjabu, uga nge tanggapen runggun nandangi perjabunna si sebelumna ras perjabunna si mbaru e? Menurut Pustaka lenga nge dung perjabunna si sebelumna e? Banci nge iban diberuna si la ersalah e keputusen guna ngampuni dilakina ntah lang? Ianggap nge perjabunna si mbaru e perjabun si erlua-lua?

Mbarenda, perjabun si mbaru e ianggap perjabun si erlua-lua. Maksudna, dilaki e lalap ianggap erlua-lua adi nggeluh denga diberuna si la ersalah e, lenga ia erjabu, ras la ilakokenna perbahanen seks si salah. Tapi sanga ijelasken Jesus kerna kalak si cerai ras erjabu mulihi, la lit ikatakenna kai pe kerna teman geluhna si la ersalah. Si ijelasken Jesus eme adi lit kalak si ceraikenna diberuna janah alasenna la sesuai ras Pustaka nce erjabu ka ia, ia enggo erlua-lua. Sanga cerai ia ras erjabu mulihi, perjabunna si sebelumna enggo dung. Engkai? Perban menurut Jesus kai si ilakokenna e eme erlua-lua.

Adi sekalak dilaki ceraikenna diberuna janah erjabu ka ia mulihi, diberuna si ceraikenna e lanai banci erban keputusen guna ngampuni ia  ntah lang, perban perjabun kalak e enggo dung. Emaka diberuna si la ersalah e lanai latih ukurna perban arus ibanna keputusen si mberat e. Kenca si e, ianggap runggun me perjabun si mbaru e selaku perjabun si sah amin pe diberuna si la ersalah ndai nggeluh denga, lenga erjabu, ras la ngelakoken perbahanen seks si salah. b

Bas contoh si ibahas ndai eme sekalak dilaki si erlua-lua janah dungna ceraikenna diberuna. Uga adi dilaki e la erlua-lua tapi ceraikenna diberuna nce erjabu ka ia? Ntah, uga adi kenca cerai maka lakoken dilaki e perbahanen seks si salah, nce erjabu ia ras si deban amin pe nggit diberuna ndai ngampuni ia? Bas kerina contoh e, dilaki e enggo erlua-lua perban ceraikenna diberuna, erjabu ka ia mulihi, janah perjabunna si sebelumna enggo dung. Emaka, perjabunna si mbaru eme perjabun si sah. Bali bagi si ikataken bas The Watchtower, 15 November 1979, halamen 32, “gundari enggo lit perjabunna si mbaru janah la banci ate-atena ndungi perjabunna e nce mulihken ia ku diberuna si sebelumna. Perjabunna si sebelumna enggo dung perban enggo ceraikenna diberuna, erlua-lua ia, janah erjabu ka ia mulihi.”

Perubahen pemahamenta enda labo erban perjabun lanai siakap badia. Perbahanen erlua-lua pe tetap sianggap dosa si serius. Adi lit sekalak dilaki si ceraikenna diberuna tapi alasenna la sesuai ras Pustaka, nce erjabu ia ras si deban padahal la ia bebas erjabu, ia enggo erlua-lua janah arus iban panitia pengadilen guna ia. (Adi diberuna si mbaru e kalak Kristen, ia pe enggo erlua-lua janah arus iban panitia pengadilen man bana.) Amin pe perjabun si mbaru e la ianggap perjabun si erlua-lua, tapi dilaki e la banci ncukupi syarat guna dat tugas tambahen bas runggun, adi lenga ia banci iergai kalak ntah pe lenga akap kalak mejile gelarna perban perbahanenna e, janah enda banci terjadi ertahun-tahun dekahna. Sanga iukuri pertua-pertua banci ntah lang dilaki e dat tugas tambahen, perlu ukuri pertua-pertua keadan mantan diberuna sange. Perban mbarenda banci saja sengaja dilaki e erlua-lua gelah banci kalak e cerai. Selain si e, perlu ka ukuri pertua kerna keadan anak-anakna si kitik denga, perban banci saja la diate dilaki e anak-anakna e.​—Mal. 2:14-16.

Jelas me maka serius kel akibatna adi sekalak jelma cerai janah erjabu ka ia mulihi tapi alasenna la sesuai ras Pustaka. Emaka, kalak Kristen arus ngusih Jahwe si nganggap perjabun e badia.​—Peng. 5:4, 5; Heb. 13:4.