Lidan kesi le, harihubei lílana damuriguaü gumuha lan wügüri le lau furumiñeti lamarieidun dan le lamarieidun luagu libiaman wéiyaasu, ani le iseri lamarieidun ligíaali gebegi ligibugiñe lúrudu. Lun gunfurandawa lan katei le, ariha waméi ka lan lariñagubei Hesusu libügürü ígiraguni lúmaya lamarieidun gürigia ábaya wéiyaasu.

Lidan Matéu 19:9, ariñaga lumuti Hesusu ábanrügüñein lan ébunaü tidan Bíbülia lun hígiragun maríeitiña. Ariñagati ñein: “Furumiñeguarügü lan le ígirutu lúmari aba lagamaridun amu —mámarügaali ligía ladüga tagamaridun ligibuagu— ladügüña agabarahani”. Lídangiñe dimurei le lariñagubei Hesusu furendeitiwa 1) ábanrügüñein lan ébunaü tíchugun Bíbülia lun hígiragun maríeitiña dan le hagamaridun maríeitiña amu gürigia ani 2) anhein mama lubéi luagu ébunaü le tariñagubei Bíbülia lígiroun wügüri maríeiti lani weiriou lun lamarieidun tuma amu lagabarahaña. a

Mini lan san dimurei le lariñagubei Hesusu ánhein lan agabaraha maríeiti ani aba lígirunu lani weiriou gébuna lan según Bíbülia lunya lamarieidun tuma amu gürigia? Uá mítaranti. Dan le lagabarahan aban maríeiti, to madurunboun tuguyaba anúadira anhein tígiraguba lubéi o mígiragunboun lan. Anhoun anúadira lun tígiragun ligibugiñe lúrudu, biángubei hagía gayara halime hamarieidun hama amu gürigia lárigiñe hibihinu hagaradan to lánina ígiraguni.

Luéigiñe le aban oubaü, másiñati mabusenrun tan to madurunboun lun tígiragun ani busentu lun feruduna tani tani weiriei. Kábati asusereda anhein mabusenrun lubéi agabarahati larandarun tuma lani weiriou ani aba lígirunu lau sun mabusenrun tan? Ladügati mabusenrun tan lun tígiragun busenrügütu larandarun tani weiriei tuma, adügati le lun mébuna lan lunya lamarieidun wügüri le tuma amu würi según le tariñagubei Bíbülia. Anhein meberesen lubéi lau le tariñagubei Bíbülia ani aba lamarieidun tuma amu, ábanya lagabarahan. Mósuya hóundaragun wéiyaaña lidan afiñeni luma lun harihin libügürü figóu le (1 Ko. 5:1, 2; 6:9, 10).

Anhein mébuna lubéi lamarieidunya aban gürigia según le tariñagubei Bíbülia, ida luba harihini lílana damuriguaü furumiñeti lamarieidun wügüri le luma iseri lamarieidun? Magumuchagungili san furumiñeti maríei le según le tariñagubei Bíbülia? Gayaraagili san tanúadirun to madurunboun lun tígiragun o lun tarandarun luma tani weiriei? Larihúba hamuga san iseri maríei le kei agabarahani?

Ariha hamuti meha lílana damuriguaü iseri maríei le kei agabarahani dan le wínwangiru lan to madurunboun, mamarieidungiru lan o madügün tan magíaguni. Gama lumoun, mayanuhanti Hesusu tuagu to madurunboun dan le layanuhanbei luagu ígiraguni luma luagu lamarieidunya gürigia. Lubaragiñe lira, afuranguagüdati Hesusu anhein lan mébuna lubéi lígiragun aban gürigia según le tariñagubei Bíbülia ani ábaya lamarieidun tuma  amu lagabarahaña lan. Lidan kesi le, ígiraguni luma iseri maríei le uágubei layanuha Hesusu, le ítarabei kei agabarahani, adügati lun lagumuchun lau furumiñeti maríei.

Dan le lígiragun aban gürigia ani ábaya lamarieidun tuma amu, to furumiñetu lani weiriou siñaali tálugun lun feruduna tani o tarandarun luma. Mámaaru tuguya lun tanúadirun anhein tígiraguba lubéi o mígiragunboun lan. Lanwoun lira, ligaburi harihini lílana damuriguaü iseri maríei le, úati dipeni lan luagu anhein wínwangiru lubéi to madurunboun, mamarieidungiru lan o madügün tan magíaguni. b

Lidan hénpulu le uágubei wayanuha lidan lagumeseha arütíkulu le, wügüri agabarahabei ani aba lígiragun tuma lani weiriou. Kaba asusereda anhoun lígira aban wügüri lani weiriou lau sun magabaraha lan ani aba lamarieidun tuma amu? Kábati asusereda anhein madügün lubéi wügüri maríeiti magíaguni lubaragiñe lígiragun gama lumoun adüga lumuti lárigiñe lígiragun, ani aba lamarieidun tuma amu lau sun busén tan lani weiriou feruduna tani? Lidan kesi burí le, dandu ígiraguni luma iseri maríei —le ítarabei kei agabarahani—adügati lun lagumuchun furumiñeti maríei. Iseri maríei le, ligíaali lariha lúrudu kei maríei. Afuranguagüdatu garüdia La Atalaya to lánina 15 lidan bián-hati irumu 1980, páhina 30, gürigia lan leeya amarieidubei “siñá lan lígirunu iseri lani weiriou lun lagiribudun tun to furumiñetu lani weiriou, gumugua furumiñeti maríei ladüga agabarahani, ígiraguni, luma lamarieidunya gürigia ligía”.

Magida lumuti iseri afuranguagüdüni le sagüráu lan maríei, magida lumuti giñe warihini agabarahani kei aban figóu wéiriti. Anhein ígiragua aban wügüri tuéi lani weiriou mébunouga según le tariñagubei Lererun Bungiu ani aba lamarieidun tuma amu gürigia, mósume hóundaragun wéiyaña lidan afiñeni luma ladüga lagabarahan. (Anhein Gefentu lubéi luagu Heowá iseri lani weiriou mosu hóundaragun wéiyaña lidan afiñeni tuma ladüga gadurun tan lidan agabarahani ligía). Lau sun marihinwali lan iseri maríei kei agabarahani, chóuruti múaran lan le hadügübei luma le tariñagubei Lererun Bungiu. Ábaya katei mosu lásügürün saragu irumu, lubá lichugún dasi lun íbiri ligía lidan damuriguaü. Mosu lagurabahóun lun lasansirun ligaburi hasaminan gürigia luagu le ladügübei. Lanwoun lira, mosu gabaroun hamani le gádanbarun to furumiñetu lani weiriou, gayaraati gari lan tun ladüga lau lan lichú lau ladügei wuribani le ani másiñati chagá lániña lirahüñü ha ñǘbürigiñabaña (Mal. 2:14-16).

Lau harihini wuribani le lanügübei lígiragun gürigia mébunouga según le tariñagubei Lererun Bungiu, luma lamarieidunya, adügatiña kristiánugu buiti háyeihani Heowá lau harihini maríei kei aban katei sagüráuti (Apur. 5:4, 5; Ebü. 13:4).