Ika a fis ena, chón ewe mwichefel repwe ekieki pwe a fen wes an we pwúpwúlú akkomw pokiten a pwúpwúlúsefál, me an na mineféén pwúpwúlú a wor péchékkúlan. Ren ach sipwe weweiti ekkewe popun sia tongeni apasa ena, sipwe etittina minne Jesus a apasa usun mufesen me pwúpwúlúsefál.

Jesus a affata lón Mateus 19:9 ewe eú chék mettóch a tongeni áwesi pwúpwúlú. A erá: “Are eman mwän a mwü seni pwülüan fän iten och popun, nge esap fän iten an kirikiringau ngeni, ätewe a lisowu are a pwülüenisefäli pwal eman fefin.” Seni alon Jesus kana, sia káé pwe (1) án emén kirikiringaw ngeni pwúlúwan are an tipisin lisowumwáál, ina chék met a tongeni áwesi ewe pwúpwúlú me ra tongeni mufesen me ren ewe Paipel, me (2) ika emén mwán a mu seni pwúlúwan we nge ese mumutá me ren ewe Paipel, me a pwúlúweni pwal emén, a tipisin lisowumwáál. *

Alon Jesus kana a itá wewe ngeni pwe emén mwán mi tipisin lisowumwáál me mu seni pwúlúwan, mi mumutá me ren ewe Paipel an epwe pwúpwúlúsefál? A lóngólóng wóón ekkóch mettóch. Ika emén mwán a tipisin lisowumwáál, iwe pwúlúwan we ese féri tipis a tongeni filatá ika epwe omusaaló tipisin pwúlúwan na are esap. Ika a filatá an esap omusaaló tipisin, nge ra mufesen fán pwúngún allúkún mwú, iwe ra tongeni pwúpwúlúsefál ika a fen pwúngúló ewe taropween mufesen.

Nge áwewe chék, eli ena fefin ese wor tipisin a enletin mochen ar repwe chúen pwúpwúlú, iwe a ereni pwúlúwan na pwe a mochen omusaaló tipisin. Nge met epwe fis ika pwúlúwan na mi kirikiringaw ngeni ese chúen mochen ar repwe pwúpwúlú, me a pwisin ló féri ewe taropween mufesen me ren allúkún mwú? Pokiten ewe fefin a tipemecheres le omusaaló tipisin me mochen ar repwe chúen pwúpwúlú, iwe ese mumutá me ren ewe Paipel án ena mwán epwe pwúpwúlúsefál. Nge ika átena a chék pwúpwúlú ngeni pwal emén inaamwo ika ese mumutá me ren ewe Paipel, iwe a tipisin lisowumwáál. Iwe ekkewe mwán mi ásimaw lón ena mwichefel repwe fératá sefál eú kúmiin chón apwúng pwe repwe angang wóón án eménna féffér ese pwúng.​—1 Kor. 5:1, 2; 6:9, 10.

Ika emén mwán a pwúpwúlúsefál fiti pwúngún allúkún mwú inaamwo ika Paipel ese mutatá, itá epwe ifa ekiekin chón ewe mwichefel usun an we pwúpwúlú minen lóóm me an na minefé? Iwe me ren ewe Paipel, itá a chúen wor péchékkúlen an we pwúpwúlú akkomw? Itá pwúlúwen átena we akkomw, a chúen wor an kefil ika epwe omusaaló tipisin are esap? Itá chón mwichefel repwe eáni ekiek pwe inaamwo ika átena me pwúlúwan na minefé ra fen pwúpwúlú fán pwúngún allúkún mwú, nge iir mi chúen chék chón lisowumwáál?

Me lóóm, chón ewe mwichefel ra eáni ewe ekiek pwe ena mineféén pwúpwúlú iir mi chúen chék chón lisowumwáál ika pwúlúwen ewe mwán me akkomwan mi chúen manaw, ese pwúpwúlúsefál, me ese féri tipisin lisowumwáál. Iwe nge, atun  Jesus a fós usun mufesen me pwúpwúlúsefál, i ese fósun ewe emén ese féri tipis. Nge a áweweei pwe ika emén mwán a mu seni pwúlúwan we ren och popun ese mumutá me ren ewe Paipel, mwirin a pwúpwúlúsefál, iwe átena a tipisin lisowumwáál. Me ren Jesus, án átena mu seni pwúlúwan we me pwúpwúlúsefál a wewe ngeni tipisin lisowumwáál, iwe ina met a áwesi an we pwúpwúlú me akkomw.

Atun emén mwán a mu seni pwúlúwan me pwúpwúlúsefál, ese chúen wor án pwúlúwan akkomw kefil ika epwe omusaaló are esap. Ina minne, neminna esap chúen eáni ena kefil mi áweires. Pwal eú, án chón mwichefel ekiek usun ewe mineféén pwúpwúlú ese lóngólóng wóón ika pwúlúwen átena akkomw a máló, a pwúpwúlúsefál, are ika a féri tipisin lisowumwáál. *

Lón ena kapas áwewe sia fós usun, ewe mwán pwúpwúlú a tipisin lisowumwáál, iwe ra mufesen. Nge met epwe fis ika ewe mwán pwúpwúlú ese tipisin lisowumwáál nge a mu seni pwúlúwan we, me mwirin a pwúpwúlúsefál? Are ewe mwán ese féri tipisin lisowu me mwen an mu seni pwúlúwan we, nge mwirin ar mufesen me pwúlúwan we, a lisowu ngeni pwal emén, mwirin iir ra pwúpwúlú inaamwo ika pwúlúwan we akkomw a mochen omusaaló tipisin? Lón ekkena pwóróus, ar mufesen me án átena pwúpwúlúsefál, ina eú féfférún tipisin lisowumwáál me a áwesi ewe pwúpwúlú akkomw. Ewe mineféén pwúpwúlú a wor péchékkúlan fán pwúngún allúkún ewe mwú. Iei met The Watchtower minen November 15, 1979, pekin taropwe 32 a apasa: “Iei a fen pwúpwúlúsefál, iwe esap tongeni mwittir chék áwesi me liwiniti pwúlúwan we akkomw. Ewe pwúpwúlú akkomw a fen wes pokiten ewe mufesen, tipisin lisowumwáál me pwúpwúlúsefál.”

Ei siwil lón ach weweiti ei mettóch esap weween pwe me rech Chón Kraist ese chúen pin ewe kkótun pwúpwúlú are ewe féfférún lisowu lúkún pwúpwúlú esap eú tipis watte. Atun emén mwán a mu seni pwúlúwan we ren och popun ese mumutá me ren ewe Paipel, me mwirin a pwúpwúlúsefál nge ese mumutá me ren Paipel, iwe ekkewe mwán mi ásimaw repwe fératá eú kúmiin chón apwúng pokiten átena a féri tipisin lisowumwáál. (Ika pwúlúwen átena minefé pwal i emén Chón Kraist, iwe epwe pwal nóm lón kapwúng wóón tipisin lisowumwáál.) Inaamwo ika sise erá pwe ena mineféén pean pwúpwúlú iir mi chúen chék chón lisowumwáál, nge átena esap tongeni wiseni och wis mi kkóló aúchean lón ewe mwichefel ren fite fite ier tori án aramas resap chúen meefi osukosuk ren minne a féri, are tori án aramas rese chúen ekieki itengawan. Me mwen án ekkewe mwán mi ásimaw ewisa ngeni och wis, repwe lóóm ekieki nónnómun pwúlúwan we akkomw eli átena a fen otupu, me néúr kewe semirit eli a fen likitiireló.​—Mal. 2:14-16.

A mmen fókkun watte pwúnúngawen án emén mu seni pwúlúwan me mwirin pwúpwúlúsefál, nge ese mumutá me ren Paipel. Ina popun, fán tipachem ekkewe Chón Kraist repwe ákkeáni án Jiowa ekiek usun pinin ewe kkótun pwúpwúlú me túmúnúéchú ar ririin pwúpwúlú.—SalAf. 5:4, 5; Ipru 13:4.