Dan en sityasyon koumsa, kongregasyon i konsider sa premye maryaz konman fini ler sa msye i remarye e zot pou konsider sa nouvo maryaz valid dapre lalwa. Pour nou konpran sa bann rezon, annou vwar sa ki Zezi ti dir konsernan divors ek remarye.

Dan Matye 19:9, Zezi i donn sa sel rezon dapre Labib ki en dimoun i kapab divorse. I ti dir: “Nenport zonm ki divors son madanm, eksepte si i’n komet imoralite seksyel e i marye avek en lot i komet adilter.” Sa ki Zezi ti dir i montre (1) ki imoralite seksyel i sa sel rezon dapre Labib ki en dimoun i kapab divorse e (2) ki en zonm ki divors son madanm menm si son madanm pa’n komet imoralite seksyel e sa zonm i marye avek en lot madanm, i komet adilter. a

Eski sa ki Zezi ti dir i vedir ki en msye ki komet imoralite seksyel e divors son madanm i lib dapre Labib pour remarye? Pa neseserman. Ler sa msye i komet adilter, sa madanm i inosan e i bezwen deside si i pou pardonn son msye oubyen non. Si i pa pardonn li e i deside pour divorse, tou le de konzwen i lib pour remarye ler bann prosedir divors i fini.

De lot kote, i kapab ki sa madanm i anvi reste marye avek son msye e i dir li ki i pare pour pardonn li. Me ki pou arive si sa msye ki’n komet adilter pa anvi reste marye avek sa madanm e sa msye i reisi fer lakour donn li son divors? Vi ki son madanm i pare pour pardonn li e i anvi reste marye avek li, sa msye pa lib dapre Labib pour remarye. Si kantmenm sa, sa msye i deside pour marye avek en lot madanm, menm si i pa lib dapre Labib pour remarye, sa msye i komet adilter ankor. Sa pou fer ki bann ansyen pou bezwen form en komite disiplin ankor pour adres sa sityasyon.​—1 Kor. 5:1, 2; 6:9, 10.

Ler en msye ki pa lib dapre Labib pour remarye, i marye avek en lot madanm, ki mannyer kongregasyon i konsider sa premye maryaz ek sa enn nouvo? Dapre Labib, eski sa premye maryaz i ankor valid? Eski sa madanm dan sa premye maryaz i ankor kapab deside si i pou pardonn sa msye oubyen non? Eski kongregasyon pou konsider sa nouvo maryaz konman en maryaz adilter setadir ki sa de dimoun pe kontinyen komet imoralite seksyel?

Dan lepase, kongregasyon ti konsider sa nouvo maryaz konman en maryaz adilter tan ki sa madanm dan sa premye maryaz i ankor vivan, i pa marye e i pa’n komet imoralite seksyel. Me Zezi pa ti koz lo sa konzwen inosan ler i ti pe koz lo divors e remarye. O kontrer, i ti eksplike ki en msye ki divors son madanm menm si son madanm pa’n komet imoralite seksyel e sa msye i remarye avek en lot madanm, sa msye i komet adilter. Zezi ti eksplike ki dan en ka koumsa, ler sa msye i divorse e remarye i vedir  ki sa msye pe komet adilter e sa i termin sa premye maryaz.

Ler en msye i divors son madanm e remarye avek en lot madanm, i nepli posib pour sa madanm dan sa premye maryaz deside si i pou pardonn sa msye oubyen non. Sa i fer ki i pa pou bezwen fer sa desizyon difisil. Osi, ki swa sa madanm dan sa premye maryaz i mor, remarye ouswa komet imoralite seksyel, sa pa sanz lafason ki kongregasyon i vwar sa nouvo maryaz. b

Dan sa legzanp ki nou’n vwar, sa msye in komet adilter e apre sa i’n divorse avek son madanm. Me ki ti pou arive si sa msye pa’n komet adilter me i’n divorse avek son madanm e apre in remarye? Oubyen ki ti pou arive si sa msye pa komet imoralite seksyel avan i divorse me i fer sa apre ki i’n divorse e apre i remarye menm si son madanm i pare pour pardonn li? Dan sa bann legzanp, ler sa msye i divorse e remarye, sa i vedir ki sa msye pe komet adilter e sa i termin sa premye maryaz. Sa nouvo maryaz i valid dapre lalwa. Parey i ganny mansyonnen dan Latour Veyer le 15 Novanm 1979, paz 32 an Angle: “Aprezan sa msye i dan en nouvo maryaz. I pa kapab termin sa nouvo maryaz e retourn avek son premye madanm parski sa premye maryaz ti terminen ler sa msye ti divorse, komet adilter e remarye.”

Sa azisteman dan nou konprenezon pa vedir ki Temwen Zeova i krwar ki maryaz nepli sakre oubyen ki adilter pa sitan en pese grav. Si en msye i divorse avek son madanm pour en rezon ki pa dan Labib e i marye avek en lot madanm ler i pa lib dapre Labib pour remarye, bann ansyen pou bezwen form en komite disiplin akoz i’n komet adilter. (Si sa nouvo madanm i en Temwen Zeova, bann ansyen pou bezwen form en komite disiplin akoz li osi i’n komet adilter.) Menm si sa nouvo maryaz pa pou ganny konsidere konman en maryaz adilter, sa msye pa pou kalifye pour ganny okenn responsabilite dan kongregasyon pour plizyer lannen tan ki dimoun pa aret ankoler ouswa santi ki i pa merit ganny respe pour sa move keksoz ki i’n fer. Bann ansyen pou bezwen reflesir lo sityasyon sa premye madanm ki’n ganny trai e osi lo sityasyon okenn zanfan ki anba laz ki petet in ganny abandonnen par sa msye.​—Mal. 2:14-16.

Parey nou’n vwar, ler en msye i divorse avek son madanm pour en rezon ki pa dan Labib e i marye avek en lot madanm, sa i anmenn bann move konsekans. Alor, i pou saz pour nou annan menm pwennvi avek Zeova e vwar maryaz konman en laranzman sakre.​—Ekle. 5:4, 5; Ebr. 13:4.