Esop Abasi ẹdida ke akpa ndọ oro etre, ẹnyụn̄ ẹda obufa emi nte ọyọhọ ndọ. Ẹyak ineme se Jesus eketịn̄de aban̄a owo ndisio ndọ mfiak n̄kọdọ owo efen man an̄wan̄a nnyịn se inamde edi ntre.

Ke Matthew 19:​9, Jesus ama etịn̄ n̄kukụre ntak emi Abasi enyịmede owo osio n̄wan esie ndọ yak ndọ oro etre. Enye ọkọdọhọ ete: “Owo ekededi eke osiode n̄wan esie ndọ, ke mîtoho ke ntak use, onyụn̄ ọdọde efen, esịn efịbe.” Se ikpepde ke ikọ Jesus oro edi, (1) ke use edi n̄kukụre ntak emi Ikọ Abasi enyịmede ẹsio ndọ yak ndọ oro etre, ye (2) ke owo emi osiode n̄wan esie ndọ ke mîtoho ke ntak use, ndien ọkọdọ n̄wan en̄wen esịn efịbe. *

Ndi ikọ Jesus ọwọrọ ke erenowo emi esịnde efịbe ekem osio n̄wan esie ndọ ekeme ndikọdọ owo efen ndien ibiatke ibet Abasi? Ekeme ndidi ntre, onyụn̄ ekeme nditre ndidi ntre. Erenowo ama esịn efịbe, n̄wan esie emi mîduehe do edibiere m̀mê iyefen enye, m̀mê idifenke. Edieke enye esịnde ndifen onyụn̄ akade ekesịn n̄wed ndidian̄ade ndọ oro, mmọ mbiba ẹkeme ndidọ owo en̄wen ke ini mmọ ẹdian̄arede ndọ oro ke ukara ẹma.

Edi, n̄wan ekeme ndibiere ke imọ idikpọn̄ke ebe imọ emi ekesịnde efịbe do, onyụn̄ ọdọhọ enye ke iyefen enye. Edi edieke ebe oro esịnde ndifiak n̄kadiana ye enye, edi adaha ikpọn̄ ekesịn n̄wed adian̄ade ndọ, ẹdinam didie utọ n̄kpọ oro? Sia edide n̄wan esie enyịme ndifen enye nnyụn̄ n̄ka iso ndọ enye, Ikọ Abasi inyịmeke ebe oro ọdọ owo efen. Edi edieke enye osụk eyịrede ọkọdọ, enye afiak esịn efịbe. Edieke ẹkenọde enye nsuannọ ke akpa, mbiowo ẹyefiak ẹkpe ikpe ẹnọ enye ke efịbe emi enye afiakde esịn do.​—1 Cor. 5:​1, 2; 6:​9, 10.

Edieke erenowo edide ke enyịn Abasi akpa ndọ esie isuanake, enye adaha ọkọdọ owo en̄wen, esop Abasi ẹdida didie akpa ndọ esie ye obufa emi? Ke ntak se Ikọ Abasi etịn̄de, ndi akpa ndọ oro osụk adada? Ndi akpa an̄wan esie oro ekeme ndisụk mbiere m̀mê iyefen, m̀mê idifenke? Ndi esop Abasi ẹdida obufa ndọ oro nte ndọ efịbe?

Ini akpa, esop Abasi ẹkesida obufa ndọ oro nte ndọ efịbe adan̄a nte n̄wan emi mîkeduehe do osụk odude ke uwem, idọhọ owo en̄wen, inyụn̄ isịnke efịbe. Edi ini Jesus eketịn̄de aban̄a ndisio ndọ mfiak ndọ owo en̄wen, enye iketịn̄ke n̄kpọ ndomokiet iban̄a n̄wan emi mîkeduehe. Enye ọkọdọhọ ke edieke erenowo osiode n̄wan esie ndọ ke usụn̄ emi mîkemke ye Ikọ Abasi onyụn̄ ọdọde owo efen, ke erenowo oro esịn efịbe. Ekpetịbe ntre, ndọ emi enye osiode do ye enye ndidọ  owo en̄wen abiat akpa ndọ oro efep, sia Jesus ọkọdọhọ ke n̄kpọ mbiba oro ẹdi ukem ukem ye enye ndisịn efịbe.

Ke ini erenowo osiode n̄wan esie ndọ onyụn̄ ọdọde owo efen, n̄wan esie emi mîkeduehe ikemeke ndibiere aba m̀mê iyefen enye m̀mê idifenke. Ntre, ufọn idụhe aba enye nditie mfịna idem m̀mê iyefen m̀mê idifenke. N̄ko, m̀mê n̄wan emi mîkeduehe do akpa m̀mê ikpaha, m̀mê ọdọ owo en̄wen m̀mê idọhọ, m̀mê onyụn̄ esịn efịbe m̀mê isịnke, esop Abasi ẹdisụk ẹda obufa ndọ ebe esie oro nte ọyọhọ ndọ. *

Ke uwụtn̄kpọ emi isụk inemede ima do, ebe ekesịn efịbe yak ndọ asuana. Edi nso iditịbe edieke enye mîsịnke efịbe, edi enye adian̄ade ndọ ọkọdọ owo efen? Mîdịghe, nso iditịbe ekpedi enye ikesịnke efịbe mbemiso akade akadian̄ade ndọ oro, edi akadian̄ade ama, enye esịn efịbe onyụn̄ ọkọdọ owo efen kpa ye emi akpa an̄wan esie enyịmede ndifen nnọ enye? Ke kpukpru mme uwụtn̄kpọ emi, akpa ndọ oro etre sia enye ndidian̄ade ndọ nnyụn̄ n̄kọdọ owo efen edi ukem ukem ye enye ndisịn efịbe. Ke enyịn ukara, obufa ndọ oro ada. Enyọn̄-Ukpeme Ikọmbakara eke November 15, 1979, ọkọdọhọ ke page 32 ete: “Sia edide enye ọkọdọ owo efen idahaemi, enye idikemeke nditre obufa ndọ emi mfiak mbịne akpa an̄wan esie oro. Akpa ndọ oro abiara ke ntak emi enye akadian̄arede ndọ oro, esịnde efịbe, onyụn̄ afiakde ọkọdọ owo efen.”

Se ikpepde idahaemi iban̄a utọ ndọ oro iwọrọke ke mme Christian ikponoke ndọ aba, m̀mê ke mmọ idaha aba efịbe nte akwa idiọkn̄kpọ. Edieke owo osiode n̄wan esie ndọ ke mîtoho ke ntak use, ndien aka ọkọdọ owo efen ke ini Ikọ Abasi owụtde ke enye ikemeke ndidọ owo efen, mbiowo ẹyekpe ikpe ẹnọ enye sia enye esịn efịbe. (Ndien edieke obufa an̄wan esie emi odude ke esop Abasi, ẹyekpe ikpe ẹnọ n̄wan oro n̄ko ke ntak use m̀mê efịbe.) Okposụkedi emi owo mîdidaha obufa ndọ emi nte ndọ efịbe, ediwak isua ẹyebe mbemiso erenowo oro odotde se ẹnọde mme akpan utom ke esop. Owo idinọhọ enye mme akpan utom ke esop ke ini se enye akanamde oro m̀mê esuene emi n̄kpọ oro akadade edi mîwọrọke mme owo ke esịt. Oro ọwọrọ n̄ko ke mbemiso ẹnọde enye ifetutom ndomokiet ke esop, ke ana ẹse nte n̄kpọ etiede idahaemi ye akpa an̄wan esie, sia ekeme ndidi enye ama ebre n̄wan oro n̄kari. Ekpedi enye ama ọwọrọ ọkpọn̄ n̄kpri n̄kpri nditọ, ana ẹse n̄ko nte n̄kpọ etiede ye mmọ idahaemi.​—Mal. 2:​14-16.

Ọfọn mme Christian ẹkpebe Jehovah ẹkûnyụn̄ ẹda ndọ mmọ ẹbre mbre, sia ndidian̄ade ndọ ke usụn̄ emi mîkemke ye Ikọ Abasi nnyụn̄ n̄kọdọ owo efen esisan̄a ye ikpọ mfịna.​—Eccl. 5:​4, 5; Heb. 13:4.