Sɛ asɛm a ɔtse dɛm si a, asafo no bobu awar dadaw no dɛ wɔaba ewiei ber a ɔbarimba no awar ɔbaa fofor no, na awar fofor no so, wobobu no dɛ ɔyɛ awar a odzi mũ. Ebɛnadze ntsi na yɛrekã dɛm? Jesus kãa asɛm bi faa awargyaa na awar fofor ho, na dɛm asɛm no na wɔama yeenya dɛm ntseasee yi. Ma yensusu asɛm a Jesus kãe no ho.

Adze kor pɛ na obi botum egyina do egyaa awar. Jesus kãa dɛm adze no ho asɛm wɔ Matthew 19:9 dɛ: ‘Obiara a obegyaa ne yer, na nnyɛ ndwamanyɛ ntsi, na ɔbɔwar fofor no, ɔatõ awar.’ Asɛm a Jesus kãe yi ma yehu dɛ (1) ndwamanyɛ anaa edwamambɔ pɛ nye adze a Kyerɛwnsɛm no kã dɛ obi botum egyina do dze egyaa awar, na (2) sɛ ɔbarimba bi gyaa ne yer, na ɔwar ɔbaa fofor aber a onnyi Kyerɛwnsɛm mu ngyinado a, ɔatõ awar anaadɛ ɔasɛɛ awar. *

Aso asɛm a Jesus kãe no kyerɛ dɛ sɛ okun bi kɔbɔ edwaman na ogyaa ne yer a, Kyerɛwnsɛm no ma no kwan dɛ obotum awar obi fofor anaa? Ɔnntse dɛm ankasa. Sɛ okun bi sɛɛ awar a, ne yer a ɔnnyɛɛ bɔn biara no botum akã dɛ ɔdze no kun no no bɔn bɛkyɛ no anaa ɔremmfa nnkyɛ no. Sɛ ɔammfa annkyɛ no, na sɛ wɔyɛ awargyaa no ho nhyehyɛɛ nyina wie wɔ mbra kwan do a, hɔn mu biara wɔ ho kwan dɛ ɔsan war obi fofor.

Obotum so aba dɛ, osiandɛ ɔyer a ɔnnyɛɛ bɔn biara no mmpɛ dɛ ogyaa no kun no awar ntsi, obotum akã dɛ ɔnnyɛ hwee, ɔdze no bɔn akyɛ no. Naaso, sɛ ɔyer no kã iyi nyina kyerɛ no kun no, na no kun no kã dɛ kyenkyen ara wonkotwa hɔn awar no mu so ɛ? Ebɛnadze na ɔsɛ dɛ okun no yɛ? Osiandɛ ɔbaa no pɛ dɛ ɔdze no kun no bɔn kyɛ no na wɔtoa hɔn awar no do ntsi, Kyerɛwnsɛm no mma ɔbarimba no kwan dɛ obotum awar fofor. Naaso sɛ iyi nyina ekyir no, okun no kɔwar obi fofor ɔmmfa ho dɛ Kyerɛwnsɛm no mma no kwan a, ɔasan asɛɛ awar, ntsi ɔsɛ dɛ asafo mu mpanyimfo dzi n’asɛm bio.​—1 Cor. 5:1, 2; 6:9, 10.

Sɛ Kyerɛwnsɛm no mma okun bi kwan dɛ obotum awar fofor, na sɛ ɔwar a, asafo no bobu n’awar dadaw no nye fofor no dɛn? Ehwɛ Bible mu a, ana yebotum akã dɛ n’awar dadaw no da ho ara yɛ awar? Aso ɔyer a ɔnnyɛɛ bɔn biara no da ho ara wɔ ho kwan dɛ ɔbɛkã dɛ ɔdze no kun no bɔn bɛkyɛ no anaa ɔremmfa nnkyɛ no? Na awar fofor no so ɛ, ana asafo no bobu no dɛ okun no asɛɛ awar, ntsi dɛm awar no nnyɛ papa?

Mber bi a abɛsen kɔ no, yɛkãa dɛ, sɛ ɔyer a ɔnnyɛɛ bɔn biara no tse ase, na ɔnnwaree, na ɔmmbɔɔ edwaman nkotsee dze a, asafo no bu awar fofor a ɔtse dɛm no dɛ ɔnnyɛ awar a odzi mũ. Naaso asɛm no nye dɛ, aber a Jesus rekã awargyaa na awar fofor ho asɛm no, ɔannkã ɔyer a ɔnnyɛɛ bɔn biara no ho asɛm. Mbom asɛm a ɔkãe nye dɛ, sɛ okun bi enngyina Kyerɛwnsɛm no do na sɛ ogyaa awar, na ɔkɔwar obi fofor a, ɔasɛɛ awar. Sɛ ɔba dɛm a, osiandɛ okun no egyaa ne yer na ɔakɔwar obi fofor ntsi, Jesus kãa dɛ okun no atõ awar, na iyi dze awar dadaw no ba n’ewiei.

Sɛ banyin bi gyaa ne yer na ɔkɔwar obi fofor a, ne yer dadaw a ɔnnyɛɛ bɔn biara no runntum nkã  dɛ ɔdze bɛkyɛ no anaa ɔremmfa nnkyɛ no. Ntsi, dɛ ɔdze bɛkyɛ no o, dɛ ɔremmfa nnkyɛ no o, ɔnnsɛ dɛ ɔma dɛm gyinaesi no ho asɛm yɛ no dadwen. Dza ɔka ho bio so nye dɛ, sɛ ɔyer a ɔnnyɛɛ bɔn biara no tse nkwa mu o, sɛ ɔawar obi fofor o, anaadɛ ɔabɔ edwaman no o, ɔnnyɛ iyinom na ɔbɛma asafo no ebu awar fofor no dɛ odzi mũ anaadɛ onndzi mũ. *

Wɔ mfatoho a yedzii kan yɛe no mu no, yɛkãa ber a okun no asɛɛ awar na oegyaa ne yer no ho asɛm. Naaso yɛmfa no dɛ dɛm aber yi dze, okun no mmbɔɔ edwaman biara, naaso oegyaa ne yer akɔwar obi fofor. Ɔno so ɛ? Anaadɛ yɛmfa no dɛ, okun no mmbɔɔ edwaman biara, naaso ɔahyɛ da ara akã akyerɛ ne yer dɛ ɔabɔ edwaman, ntsi ɔpɛ dɛ ogyaa no awar. Nna ne yer no se ɔnnyɛ hwee, ɔdze no bɔn akyɛ no. Naaso ne nyina ekyir no, okun no kã dɛ kyenkyen ara a, obegyaa no. Mbom ogyaa no wiei no na ɔbɔɔ edwaman na ɔkɔwaar obi fofor. Asɛm a ɔtse dɛm so ɛ, yɛbɛkã ho asɛm dɛn? Wɔ nhwɛdo ebien yi nyina mu no, okun no enngyina Kyerɛwnsɛm no do enngyaa ne yer na ɔakɔwar obi fofor, ntsi ɔasɛɛ awar, na iyi dze awar dadaw no ba n’ewiei. Awar fofor no so dzi mũ wɔ mbra kwan do. November 15, 1979, Ɔweɔn-Aban, krataafa 32 kãa dɛ: “Sɛ asɛm a ɔtse dɛm si a, okun no akɛtsena awar fofor ase, ntsi orunntum nnkã dɛ origyaa ne yer fofor no na ɔaasan akɔwar ne yer dadaw no; osiandɛ oegyaa awar, ɔafa ne yer no ekyir, na ɔawar fofor ntsi, awar dadaw no aba n’ewiei.”

Dɛm ntseasee fofor a yeenya yi nnkyerɛ dɛ Christianfo mmbu awar dɛ ɔyɛ krɔnkrɔn bio, anaadɛ sɛ obi sɛɛ awar a, ɔnnyɛɛ bɔn kɛse biara. Sɛ okun bi gyaa ne yer aber a Kyerɛwnsɛm no mma no kwan, na ɔkɔwar obi fofor a, mpanyimfo no bedzi n’asɛm, osiandɛ ɔasɛɛ awar. (Sɛ ɔbaa fofor a ɔbarimba no akɔwar no no so yɛ Christiannyi a, mpanyimfo bedzi n’asɛm osiandɛ ɔno so asɛɛ awar.) Yebobu dɛm awar fofor no dɛ ɔyɛ awar dze, naaso obedzi mfe pii ansaana ɔbarimba no enya ɔsom ho kwan bi wɔ asafo no mu. Ɔno mpo no, mpanyimfo no bɔhwɛ dɛ bɔn kɛse a ɔyɛe no ho asɛm nnhaw obiara bio, ansaana sɛ ɔfata ɔsom ho kwan bi a wɔdze ama no. Afei so, ansaana wɔdze ɔsom ho kwan bi bɛhyɛ ne nsa no, mpanyimfo no bosusu ho ahwɛ dɛ ne yer dadaw a ɔnye no enndzi no yie no asetsena mu tse dɛn, na sɛ ogyaa no mbofra nkakraba bi so a, mpanyimfo bɔhwɛ dɛ mbofra no asetsena mu tse dɛn.​—Mal. 2:14-16.

Sɛ obi gyaa awar aber a Kyerɛwnsɛm no mma no kwan na ɔkɔwar fofor a, ɔdze ɔhaw akɛse ba. Dɛm ntsi, nyansa wɔ mu dɛ yebosũasua Jehovah, na hɛn so yeebu awar dɛ ɔyɛ krɔnkrɔn.​—Ɔsɛnk. 5:4, 5; Heb. 13:4.