Ena ituvaki qo, ena raica na ivavakoso ni sa cava na imatai ni vakawati ni sa vakamau tale o tagane. Ena raica na vakamau vou me donu vakalawa. Meda kila na vuna, meda dikeva mada na ka e tukuna o Jisu me baleta na veisere kei na vakawati tale.

Ena Maciu 19:9 e tukuna o Jisu na yavu duadua ga vakaivolatabu me sereki watina kina e dua. E kaya: “Na tagane e sereka na watina qai vakawati tale e sa wili me veibutakoci ke sega ni veiyacovi tawadodonu o watina.” Eda vulica ena vosa i Jisu (1) ni yavu duadua ga vakaivolatabu ni veisere na veiyacovi tawadodonu, (2) na tagane e sega ni vakaivolatabu nona sereki watina qai vakawati tale e sa wili me veibutakoci. *

Vakacava e tukuna tiko o Jisu ni tagane e veiyacovi tawadodonu qai sereka na watina e galala vakaivolatabu me vakawati tale? Sega. Ni veibutakoci o tagane, ena vakatulewataka o watina e sega ni cala me vosoti koya se kua. Ke sega ni vosoti koya qai vakalawataki na veisere, rau sa galala ruarua me rau vakawati tale ni sa oti na veisere.

Ena rairai vinakata na yalewa vakawati e sega ni cala me rau veiwatini tiko ga qai vosoti tagane. Ia vakacava ke sega ni vinakata qori o tagane e veibutakoci qai saga me vakalawataka nodrau veisere? Ni sa tu vakarau o yalewa me vosoti watina me rau veiwatini tiko ga, ena sega ni galala vakaivolatabu o tagane me vakawati tale. Ke sega ni veisau o tagane qai vakawati tale ni sega ni galala me vakawati, qori sa veibutakoci tale. Ena duri e dua tale na komiti ni veilewai me raica nona cala qori.—1 Kor. 5:1, 2; 6:9, 10.

Ke vakawati tale na tagane e sega ni galala vakaivolatabu me vakawati tale, ena raica vakacava na ivavakoso nona vakamau e liu kei na nona vakamau vou? Vakacava se dei tiko na imatai ni nona vakamau mai na rai vakaivolatabu? Se rawa tiko ga vei yalewa e sega ni cala me vosota na watina e liu se sega? Ena okati na vakamau vou me veibutakoci?

Ena gauna sa oti e raica na ivavakoso na vakawati vou me vakawati veibutakoci. Na vuna? Ni se bula tiko o watina e sega ni cala, e sega ni vakawati tale, se me veiyacovi tawadodonu. Ia o Jisu e sega ni tukuni koya e donu tiko ni veivosakitaka na veisere kei na vakawati tale. E vakamacalataka ga ni tagane e sega ni vakaivolatabu nona sereki watina qai vakawati tale, e sa wili me veibutakoci. Ena ituvaki qo, na veisere kei na vakawati tale e tukuna o Jisu ni veibutakoci, e sa cava kina na imatai ni vakawati.

Ni sa cava na vakawati ena veisere kei na nona vakawati tale o tagane, sa sega ni  rawa vei yalewa e donu tiko me vakatulewataka me veivosoti se kua. Ena sega gona ni leqataka tiko na vakatulewa qori. Kena ikuri, na rai ni ivavakoso me baleta na vakamau vou e sega ni vakatau ena nona sa mate o koya e donu, nona vakawati tale, se veiyacovi tawadodonu. *

Ena ivakaraitaki qori, na tagane vakawati e veibutakoci e lai tini sara ena veisere. Vakacava ke sega ni veibutakoci o tagane, ia e veisere qai vakawati tale? Se a sega ni veiyacovi tawadodonu ni bera na veisere ia e veibutakoci ni oti na veisere qai vakawati tale ni tu vakarau mada ga o watina me vosoti koya? Na veisere kei na vakamau tale qori e okati me veibutakoci, sa na tini kina na imatai ni vakawati. Na vakamau vou e donu vakalawa. Me vaka e tukuni ena Vale ni Vakatawa ni Noveba 15, 1979, tabana e 32, “sa na vauci o koya ena vakamau vou, ena sega ni rawa ni tinia me lesu tale vua na imatai ni watina. Na imatai ni nona vakamau e mai cava ena veisere, veibutakoci, kei na vakawati tale.”

Na veisau qo e sega ni beci kina na bibi ni ivau ni vakamau se me vakamamadataka na cala ni veibutakoci. Na tagane e sega ni vakaivolatabu nona sereki watina qai vakawati tale e sa veibutakoci, era na lesia gona na qase e dua na komiti ni veilewai me dikevi koya. (Ke lotu vaKarisito na watina vou, ena dikevi koya tale ga na komiti ni veilewai ni wili me veibutakoci.) Ena sega ni okati na vakamau vou me vakawati veibutakoci, ia ena sega ni lesi o tagane ena itavi bibi ena ivavakoso me vica vata na yabaki me oti mada nodra rarawataka eso na ka ca e cakava, mera dokai koya tale. Ni bera ni lesi ena so na itavi, era na kauaitaka na qase ni ivavakoso na kena ituvaki ena gauna qo o watina e liu a rairai vakaisini kei ira na luvena lalai e biuta tu mai.—Mala. 2:14-16.

Nida vakasamataka na ca ni veisere kei na vakawati tale e sega ni vakaivolatabu, eda na mareqeta na lotu vaKarisito na rai i Jiova nida rokova na vakawati.—Dauv. 5:4, 5; Iper. 13:4.