Kɛ́ nɔ ko tamɔ nɛkɛ ba lɛ, asafo lɛ baabu gbalashihilɛ momo lɛ akɛ eba naagbee be ni nuu lɛ kɛ mɔ kroko lɛ bote gbalashihilɛ mli lɛ, ni ebaabu gbalashihilɛ hee lɛ akɛ esa. Bɔ ni afee ni wɔna nɔ hewɔ ni wɔkɛɔ nakai lɛ, nyɛhãa wɔsusua nɔ ni Yesu wie yɛ gbalatsemɔ kɛ gbalashihilɛ mli ni aboteɔ ekoŋŋ lɛ he lɛ he.

Yɛ Mateo 19:9 lɛ, Yesu tsɔɔ nɔ koome pɛ ni abaanyɛ adamɔ nɔ atse gbãla yɛ Ŋmalɛ naa. Ewie akɛ: “Mɔ fɛɛ mɔ ni shwieɔ eŋa, ni jeee akɛ eŋa lɛ ebɔ ajwamaŋ, ni ekɛ mɔ kroko boteɔ gbalashihilɛ mli lɛ, efite gbãla.” Wɔnaa nibii enyɔ yɛ nɔ ni Yesu wie nɛɛ mli: (1) Nɔ pɛ ni Ŋmalɛ lɛ tsɔɔ akɛ abaanyɛ adamɔ nɔ atse gbãla ji, ajwamaŋbɔɔ. (2) Kɛ́ nuu ko tse eŋa gbãla be ni eŋa lɛ ebɔko ajwamaŋ, ni ekɛ mɔ kroko bote gbalashihilɛ mli lɛ, efite gbãla. *

Ani nɔ ni Yesu wie nɛɛ tsɔɔ akɛ, kɛ́ nuu ko yabɔ ajwamaŋ ni etse eŋa gbãla lɛ, eyɛ Ŋmalɛ naa hegbɛ akɛ eboteɔ gbalashihilɛ mli ekoŋŋ? Dabi, etsɔɔɔ nakai doo. Kɛ́ mɔ ko yafite gbãla lɛ, ehefatalɔ lɛ, ni ji mɔ ni fiteko gbãla lɛ, ji mɔ ni baakpɛ eyiŋ kɛji ekɛ nɔ ni efee lɛ baake lɛ aloo ekɛkeŋ lɛ. Kɛ́ ehefatalɔ lɛ kpɛ eyiŋ akɛ ekɛkeŋ lɛ, ni amɛyatse gbãla lɛ yɛ mla naa lɛ, amɛyi enyɔ lɛ fɛɛ amɛyɛ Ŋmalɛ naa hegbɛ akɛ amɛkɛ mɛi krokomɛi boteɔ gbalashihilɛ mli kɛ́ agbe gbalatsemɔ lɛ he nitsumɔ naa.

Shi hefatalɔ ni he bɛ sane lɛ baanyɛ akpɛ eyiŋ akɛ ekɛ ehefatalɔ ni eyabɔ ajwamaŋ lɛ tɔmɔ lɛ baake lɛ koni amɛya nɔ amɛhi shi. Kɛ́ ehã ehefatalɔ lɛ le enɛ, shi ehefatalɔ lɛ kɛɛ doo ekɛ lɛ ehiŋ shi dɔŋŋ ni eyatse lɛ gbãla yɛ mla naa hu? Akɛni hefatalɔ ni he bɛ sane lɛ miisumɔ ni ekɛ ehefatalɔ lɛ he ake lɛ koni amɛya nɔ amɛhi shi hewɔ lɛ, hefatalɔ ni eyafite gbãla lɛ bɛ Ŋmalɛ naa hegbɛ akɛ eboteɔ gbalashihilɛ mli ekoŋŋ. Kɛ́ mɔ ni eyafite gbãla lɛ ku ehiɛ eshwie enɛ nɔ ni ekɛ mɔ kroko bote gbalashihilɛ mli be ni ebɛ Ŋmalɛ naa hegbɛ akɛ efeɔ nakai lɛ, esaa efite gbãla ekoŋŋ, ni esa akɛ ato saneyeli ajinafoi akuu ekoŋŋ yɛ esha nɛɛ he.​—1 Kor. 5:1, 2; 6:9, 10.

Kɛ́ hefatalɔ ni bɛ Ŋmalɛ naa hegbɛ akɛ eboteɔ gbalashihilɛ mli lɛ kɛ mɔ kroko bote gbalashihilɛ mli lɛ, te asafo lɛ naa gbalashihilɛ momo lɛ ehãa tɛŋŋ? Ni te enaa gbalashihilɛ hee lɛ hu ehãa tɛŋŋ? Yɛ Ŋmalɛ naa lɛ, ani abaanyɛ akɛɛ akɛ gbalashihilɛ momo lɛ eba naagbee? Ani hefatalɔ ni he bɛ sane lɛ yɛ hegbɛ lolo akɛ ekɛ tɔmɔ lɛ baake ni ekɛ ehefatalɔ lɛ ahi shi aloo ebaakpoo lɛ? Ani asafo lɛ baabu gbalashihilɛ hee lɛ akɛ eji ajwamaŋ gbãla?

Be ko ni eho lɛ, kɛ́ hefatalɔ ni he bɛ sane lɛ yɛ wala mli lolo, eboteko gbalashihilɛ mli, loo ebɔko ajwamaŋ lɛ, asafo lɛ buɔ gbalashihilɛ hee lɛ akɛ ajwamaŋ gbãla. Shi nyɛhãa wɔkadia akɛ, be ni Yesu wieɔ gbalatsemɔ kɛ gbalashihilɛ mli ni aboteɔ ekoŋŋ lɛ he lɛ, etsĩii hefatalɔ ni he bɛ sane lɛ tã kwraa yɛ sane lɛ mli. Nɔ pɛ ni ewie ji akɛ, kɛ́ nuu ko tse gbãla be ni ebɛ Ŋmalɛ naa nɔdaamɔnɔ akɛ efeɔ nakai ni ekɛ mɔ kroko bote gbalashihilɛ mli lɛ, efite gbãla. No hewɔ lɛ, kɛ́ nuu ko tse eŋa gbãla ni ekɛ yoo kroko bote gbalashihilɛ mli, ni ji nɔ ni Yesu kɛɛ eji gbalafitemɔ lɛ, no foɔ egbalashihilɛ momo lɛ sɛɛ.

 Kɛ́ nuu ko shwie eŋa ni ekɛ mɔ kroko bote gbalashihilɛ mli lɛ, nɔ ko bɛ dɔŋŋ ni yoo lɛ, ni ji hefatalɔ ni he bɛ sane lɛ, baanyɛ afee yɛ sane lɛ he. Kɛ́ no mli lɛ eetao ekɛ nuu lɛ he ake lɛ ni amɛya nɔ amɛhi shi jio, eetao ekpoo lɛ jio lɛ, bianɛ lɛ enyɛŋ efee nakai dɔŋŋ. Agbɛnɛ hu, kɛ́ hefatalɔ ni he bɛ sane lɛ yɛ wala mli jio, egbo jio, ebote gbalashihilɛ mli jio, eboteko mli jio, ebɔ ajwamaŋ jio, ebɔko ajwamaŋ jio lɛ, jeee no ni baatsɔɔ bɔ ni asafo lɛ baana gbalashihilɛ ni etsutsu wu lɛ eyabote mli lɛ ehã. *

Yɛ sane lɛ ni wɔsusu he kɛtsɔ hiɛ lɛ mli lɛ, nuu lɛ yafite gbãla dani etse gbãla lɛ. Shi kɛ́ nuu lɛ fiteko gbãla, shi eyatse gbãla lɛ ni ekɛ yoo kroko bote gbalashihilɛ mli hu? Aloo, kɛ́ be ni nuu lɛ tseɔ gbãla lɛ efiteko gbãla, shi yɛ gbalatsemɔ lɛ sɛɛ lɛ, eyabɔ ajwamaŋ ni ekɛ yoo kroko bote gbalashihilɛ mli be ni etsutsu ŋa lɛ ehã ele akɛ ekɛbaake lɛ ni amɛya nɔ amɛhi shi lɛ fɛɛ sɛɛ hu? Yɛ shihilɛi nɛɛ eko fɛɛ eko mli lɛ, akɛni nuu lɛ etse gbãla ni ebote gbalashihilɛ mli ekoŋŋ hewɔ lɛ, efite gbãla, ni efo egbalashihilɛ momo lɛ sɛɛ hu. Abaabu gbalashihilɛ hee lɛ akɛ eja yɛ mla naa. Tamɔ bɔ ni awie yɛ November 15, 1979 Blɔfo Buu-Mɔɔ lɛ, baafa 32 lɛ, “amrɔ nɛɛ ni ekɛ mɔ kroko ebote gbalashihilɛ mli lɛ, enyɛŋ ete shi kɛkɛ ni ekɛɛ akɛ eefo gbãla hee lɛ mli ni ekɛ etsutsu ŋa lɛ ayahi shi ekoŋŋ; akɛni etse gbãla, efite gbãla, ni ekɛ yoo kroko ebote gbalashihilɛ mli hewɔ lɛ, egbalashihilɛ momo lɛ sɛɛ efo.”

Shishinumɔ hee nɛɛ ni wɔná lɛ etsɔɔɔ akɛ amrɔ nɛɛ wɔbuɔ gbalashihilɛ akɛ nɔ ko flɛflɛ, aloo gbalatsemɔ jeee nɔ ko ni yɔɔ hiɛdɔɔ dɔŋŋ. Kɛ́ nuu ko tse eŋa gbãla be ni ebɛ Ŋmalɛ naa nɔdaamɔnɔ akɛ efeɔ nakai, ni ekɛ mɔ kroko bote gbalashihilɛ mli be ni ebɛ hegbɛ yɛ Ŋmalɛ naa akɛ efeɔ nakai lɛ, efite gbãla, ni saneyeli ajinafoi akuu kɛ lɛ baata shi. (Kɛ́ yoo lɛ ni ekɛbote gbalashihilɛ mli lɛ ji Odasefonyo lɛ, lɛ hu saneyeli ajinafoi akuu kɛ lɛ baata shi, ejaakɛ efite gbãla.) Eyɛ mli akɛ abuŋ gbalashihilɛ hee lɛ akɛ ajwamaŋ gbãla moŋ, shi nuu lɛ baahi shi afii babaoo ni akɛ sɔɔmɔ hegbɛ krɛdɛɛ ko kwraa wooo edɛŋ kɛyashi nakai sane lɛ baagbo yɛ mɛi ajwɛŋmɔ mli loo kɛyashi be ni kɛ́ akɛ sɔɔmɔ hegbɛ krɛdɛɛ ko wo edɛŋ lɛ, egbaŋ mɔ ko mɔ ko naa. Agbɛnɛ hu, dani asafoŋ onukpai lɛ kɛ sɔɔmɔ hegbɛ krɛdɛɛ ko baawo edɛŋ lɛ, amɛbaasusu etsutsu ŋa lɛ, ni eeenyɛ efee akɛ etsɔ̃ ŋaa koni eshi lɛ lɛ, kɛ bii bibii ni ekolɛ eshi amɛ eshwie enɔ yakatswaa lɛ ahe.​—Mal. 2:14-16.

Akɛni kɛ́ Kristofonyo ko tse gbãla ni ekɛ mɔ kroko bote gbalashihilɛ mli be ni ebɛ Ŋmalɛ naa nɔdaamɔnɔ loo Ŋmalɛ naa hegbɛ akɛ efeɔ nakai lɛ ekɛ naagbai wuji baa hewɔ lɛ, esa akɛ Kristofoi abɔ mɔdɛŋ ni amɛbu gbalashihilɛ tamɔ bɔ ni Yehowa buɔ lɛ lɛ, akɛ eyɛ krɔŋkrɔŋ.​—Jaj. 5:4, 5; Heb. 13:4.