Oslea poristhitint, tachem poilem kazar somplam ani tachem novem kazar pordvar nhoi mhunn sobha lekhtoli. Oxem ami kiteak mhunnonk zata? Tem zannam zaunk Jezun divorsa vixim ani portun kazar zaunche vixim kitem sanglem tacher ami dhean dium-ia.

Bible-a pormonnem divors diunk ekuch karonn asa. Ani tem karonn Jezun amkam Matev 19:9-ant sanglam. Tannem mhunnttlem: “Konnui aple potinnik soddun diit —Somurticher add logn sombondant jietoleanchi gozal Hanv korina— ani dusrea kodde logn zait, to pordvar korta.” Tor Jezuchea hea utrantlean amkam don vostu kollon ietat: (1) divors diunk Bible-a pormonnem ekuch karonn asa ani tem mhunnttlear, pordvar. Ani (2) ek munis hem karonn nastana aplea bailek divors diun dusrea sangata kazar zata tednam to pordvar korta. a

Tor ek ghov pordvar korta ani aple bailek divors dita zalear Devachea Utra pormonnem to porot kazar zaunk xokta, oxem Jezu sangonk sodhtalo kai? Na. Karonn ek ghov pordvar korta tednam taka bhogsuncho kai na tem tachi niropradi bail tharaita. Punn ti taka nakarun kaidea pormonnem divors gheta zalear, tim dogaim anik konnam-i lagim kazar zaunk xoktat.

Punn chintat, ki ti niropradi bail kazaracho ekvott moddunk sodhina ani aplea ghovak bhogsunk toiar asa mhunn taka sangta. Punn ticho ghov tichea sangata ravonk sodhina ani to divors gheta. Oslea poristhitint tichea ghovan Bible-a pormonnem dusrea lagim kazar zaunk zata kai? Na. To oxem korta zalear to portun pordvar korta. Ani hea karonnak lagon, sobheche vhoddil taka anik ek pavtti neai somitint bosoitat.—1 Kor. 5:1, 2; 6:9, 10.

Devachea Utra pormonnem porot kazar zaunk xokona to munis porot kazar zata zalear, sobha tachea poilea kazarak ani dusrea kazarak koxi lekhtoli? Bible-a pormonnem tachem poilem kazar azunui somponk na oxem kai? Taka bhogsuncho vo na tem tache niropradi bailen azunui tharaunk zata kai? Tachea novea kazarak sobha azunui pordvar mhunn lekhtoli kai?

Atam meren amchi somzonni oxi asli, ki ek munis pordvar korun novean kazar zata zalear, jea meren tachi poili bail morona, porot kazar zaina, ani pordvar korina, tea meren sobha tea munxachem kazar pordvar koxem lekhta. Punn Jezun divors ani porot kazar zaunchea vixim sanglem tednam tannem niropradi baile vixim kainch sangonk na. Tannem fokot itlench sanglem ki, zo munis Devachea Utra add vochon aple bailek divors dita ani porot kazar zata to pordvar korta. Tor hea poristhitint divors ghevop ani porot kazar zavop, pordvar kelʼlea bhaxenuch asa. Ani haka lagon, tea munxachem poilem kazar sompta.

 Tor ek munis divors diun porot kazar zata tednam, tachem poilinchem kazar sompta dekhun, tachi poili bail ji niropradi asa, ti aplea ghovak bhogsuncho vo nakarcho nirnnoi gheunk xokona. Ani tika to nirnnoi gheunk poddona. Toxench, tea munxachem novem kazar pordvar asa vo na, tem tachi niropradi bail morta, porot kazar zata vo pordvar korta, tacher tharlolem na mhunn sobha ugddas dovorta. b

Tor atam meren ami polloilem, ki ghov poilim pordvar korta ani haka lagon uprant tancho divors zata. Punn ghovan pordvar korinastana bailek divors dilo, ani to porot kazar zalo zalear kitem? Vo ghovan niropradi bailek divors diunchea poilim pordvar korunk na, punn divors dilea uprant pordvar kelo, ani tachi niropradi bail taka bhogsunk toiar asli, tori astana to porot kazar zalo zalear kitem? Hea soglea poristhitimnim divors divop ani porot kazar zavop, pordvar kelʼlea sarkench zaun asa dekhun tachem poilinchem kazar sompta. Ani atam tachem novem kazar kaidea pormonnem sarkem zaun asa. Tor Novembr 15, 1979, Pahrogopur-ant, pan 32-acher sanglolea pormonnem, “atam to novean kazar zala ani hem kazar sompoun tannem poilinchea baile lagim vochonk zaina. Karonn tannem divors dila, pordvar kela ani to porot kazar zala dekhun tachem poilinchem kazar somplem.”

Amche somzonnent bodlav zala, hacho orth kazar atam povitr nhoi vo pordvar korop ek gombhir patok nhoi, oxem kai? Na. Karonn ek dadlo Devachea Utra add vochon aple bailek divors dita tednam vhoddil neai somiti bosoitat. (Tachi novi bail Kristanv zalear, tika pasun neai somitint bosoitole.) Tanchea novea kazarak sobha pordvar mhunn lekhchina tem khorem. Tori astana, zaitim vorsam porian tea bhavak sobhent koslech khas sueog vo zobabdareo mellcheo nant. Punn zaitea vorsam uprant taka kosli-i zobabdari diunk vhoddilamnim tharailem zalear pasun, taka vollkhotat tim taka koxim lekhtat, tim taka man ditat kai mhunn te polloitole. Toxench, tannem visvas-ghat kela tea bailechi poristhiti koxi asa tea vixim te chintʼtole. Tea bhair, tankam lhan vo avoi-bapaichea dekhrekhke khala aslolim bhurgim asat zalear, tanchi poristhiti koxi asa tea vixim pasun te chintʼtole.—Mal. 2:14-16.

Tor ek munis Devachea Utra add vochon divors diun porot kazar zata tednam tacho porinnam khub vaitt zata. Hea pasot Kristanvam, Jehova lekhta toso kazar povitr mhunn lekhtat.—Up. 5:3, 4; Heb. 13:4.