Sa sini nga sitwasyon, dapat tamdon sang kongregasyon nga indi na sila mag-asawa sang iya una nga asawa. Dapat man tamdon sang kongregasyon nga mag-asawa na sila sang iya ikaduha nga asawa. Para mahangpan naton kon ngaa amo sini dapat ang aton pagtamod, binagbinagon naton ang ginsiling ni Jesus parte sa diborsio kag pagpangasawa liwat.

May ginsiling si Jesus sa Mateo 19:9 nga amo lang ang rason nga puede makadiborsio ang mga mag-asawa suno sa Kasulatan. Nagsiling sia: “Ang bisan sin-o nga magdiborsio sang iya asawa kag magpangasawa sang iban nagapanghilahi, luwas lang kon ang iya asawa naghimo sing seksuwal nga imoralidad.” Base sa sining ginsiling ni Jesus, matun-an naton nga (1) ang seksuwal nga imoralidad amo lang ang rason nga puede makadiborsio ang mga mag-asawa suno sa Kasulatan kag (2) kon gindiborsiohan sang bana ang iya asawa nga indi suno sa sining Makasulatanhon nga rason kag nangasawa sia sang iban, nakapanghilahi sia. a

Buot bala silingon ni Jesus nga kon nakahimo sing seksuwal nga imoralidad ang bana kag gindiborsiohan niya ang iya asawa, ginatugutan na sia sang Kasulatan nga makapangasawa liwat? May dapat pa himuon kag binagbinagon. Kon nagpanghilahi ang bana, magadesisyon ang inosente nga asawa kon bala patawaron niya ukon sikwayon ang iya bana. Kon sikwayon niya ang iya bana kag magdiborsio sila, puede na makapangasawa liwat ang iya bana kag puede man sia makapamana liwat basta natapos na nila ang pagproseso sa ila diborsio.

Posible man nga patawaron sang inosente nga asawa ang iya bana kay gusto niya nga indi maguba ang ila pag-asawahay. Pero ano abi kon indi gusto sang nagpakighilahi nga bana nga magbalik sa iya asawa bisan pa ginpatawad na sia, kag nag-file sia sang divorce bisan pa indi komporme ang iya asawa? Bangod handa ang iya asawa nga patawaron sia kag padayunon ang ila pag-asawahay, wala sia sing Makasulatanhon nga rason nga makapangasawa liwat. Kon nangasawa sia sang iban bisan pa indi niya ini puede himuon base sa Kasulatan, nakapanghilahi sia liwat. Dapat magporma liwat sang hudisyal nga komite ang mga gulang sang kongregasyon para asikasuhon ini nga sala.—1 Cor. 5:1, 2; 6:9, 10.

Kon nangasawa liwat ang bana bisan pa wala sia sing Makasulatanhon nga rason nga himuon ini, paano dapat tamdon sang kongregasyon ang iya kaangtanan sa iya una nga asawa kag ang pagpakasal niya sa iya ikaduha nga asawa? Kon basihan ang Biblia, kasado bala sia gihapon sa iya una nga asawa? Sa bahin sang inosente nga asawa, posible pa bala niya patawaron ukon sikwayon ang iya bana sang una? Masiling bala nga nagapakighilahi ang bana kag ang iya ikaduha nga asawa bisan pa nakasal na sila?

Sang una, basta buhi pa ang inosente nga asawa, wala sia namana liwat, kag wala sia nakahimo sing seksuwal nga imoralidad, ginatamod sang kongregasyon nga nagapakighilahi ang bana kag ang iya ikaduha nga asawa bisan pa nakasal na sila. Ginatawag ini nga makihilahion nga pag-asawahay. Pero, sang ginbinagbinag ni Jesus ang parte sa diborsio kag pagpangasawa liwat, wala niya ginsambit ang parte sa inosente nga asawa. Sa baylo, ginpaathag ni Jesus nga kon gindiborsiohan sang bana ang iya asawa nga wala sing Makasulatanhon nga rason kag nangasawa sia liwat, nakapanghilahi sia. Sa sini nga sitwasyon, nagsiling si Jesus nga ang pagpangasawa liwat sang bana isa ka pagpakighilahi. Pero sang nagdiborsio ang bana sa iya asawa kag nangasawa sia liwat, indi na sila makabig nga mag-asawa sang iya una nga asawa.

 Bangod indi na sila makabig nga mag-asawa kay gindiborsiohan niya ang iya asawa kag nangasawa sia liwat, indi na posible para sa iya inosente nga asawa nga patawaron ukon sikwayon sia. Gani, indi na kinahanglan himuon sang asawa ang mabudlay nga desisyon kon bala patawaron niya ukon sikwayon ang iya bana sang una. Dugang pa, dapat tamdon sang kongregasyon nga mag-asawa na ini nga lalaki kag ang iya ikaduha nga asawa. Ini nga pagtamod wala nagadepende kon bala buhi pa ukon patay na ang una nga asawa, kon bala namana sia liwat ukon wala, ukon bala nakahimo sia sing seksuwal nga imoralidad ukon wala. b

Sa halimbawa nga ginbinagbinag naton, nagpakighilahi ang bana, kag nagdiborsio sila sang iya asawa. Pero ano abi kon wala nakapakighilahi ang bana, pero nagdiborsio sila sang iya asawa kag nangasawa sia liwat? Ukon ano abi kon wala nakapakighilahi ang bana antes sila nagdiborsio, pero nagpakighilahi sia pagkatapos sang ila diborsio kag nangasawa sia liwat bisan pa handa sia nga patawaron sang iya asawa? Sa sini tanan nga halimbawa, ang pagpangasawa liwat sang bana isa ka pagpakighilahi. Pero natapos na ang una nga pag-asawahay ukon indi na sila makabig nga mag-asawa bangod nagdiborsio sila kag nangasawa liwat ang bana. Dapat tamdon nga legal ang pagpakasal sang bana sa iya ikaduha nga asawa. Ang Nobiembre 15, 1979, nga The Watchtower, pahina 32, nagsiling: “Nangasawa na sia liwat, gani indi puede nga basta na lang niya biyaan ang iya ikaduha nga asawa kag magbalik sa iya una nga asawa. Sang nagdiborsio sila sang iya asawa, sang nagpanghilahi sia, kag sang nangasawa sia liwat, indi na sila makabig nga mag-asawa sang iya una nga asawa.”

Bisan pa nagbag-o ang aton paghangop, indi buot silingon sini nga wala na naton ginakabig nga sagrado ang pag-asawahay ukon wala na naton ginakabig nga serioso nga sala ang pagpakighilahi. Kon gindiborsiohan sang bana ang iya asawa bisan pa wala sia sing Makasulatanhon nga rason nga himuon ini kag nangasawa sia bisan pa wala sia sing Makasulatanhon nga rason nga makapangasawa liwat, dapat magporma sang hudisyal nga komite ang mga gulang bangod nakasala sia sing pagpakighilahi. (Kon isa ka Cristiano ang ikaduha nga asawa, dapat man magporma sang hudisyal nga komite ang mga gulang bangod nakasala man sia sing pagpakighilahi.) Indi makabig nga makihilahion nga pag-asawahay ang pagpakasal sang bana sa iya ikaduha nga asawa, pero indi puede mahatagan ang bana sang pinasahi nga mga pribilehiyo sa kongregasyon sa sulod sang madamo nga tinuig. Kag bisan pa magligad na ang madamo nga tinuig, dapat anay binagbinagon kon bala wala na naakig sa iya ang iban ukon wala na sila nagabatyag nga indi sia dapat pagrespetuhon. Antes sia hatagan sang mga gulang sang bisan ano nga pribilehiyo, dapat man nila binagbinagon ang kahimtangan sang iya una nga asawa nga posible hungod niya nga ginluiban para makadiborsio sila, kag ang kahimtangan sang iya menor de edad nga kabataan nga posible ginpabay-an niya.—Mal. 2:14-16.

Bangod sang indi maayo nga mga resulta sang pagdiborsio kag pagpangasawa liwat nga wala sing Makasulatanhon nga rason, maalamon gid kon ilugon sang mga Cristiano si Jehova kag tamdon nila nga sagrado ang pag-asawahay.—Man. 5:4, 5; Heb. 13:4.