In tiise situatsyoon, ferxteet ti kemaynt tas ti friirix hayrat tsum ën khom is wii te man sich noch mool kehayrat hot, un tas ti nay hayrat kilt. Fer tas peser ferxteen, wole mer siin was Yeesus kesaat hot iwer te tiwors un sich noch mool hayrate.

In Matheus 19:9, hot Yeesus aus keleet was ti eensich piiplix uersach is fer een hayrat tsum ën pringe. Tee hot kesaat: “Weer sich fon sayn fraa aus naner macht weeche anere tinge un net weeche seksuaal imoraaliteet un sich mit een aner ferhayrat, macht atultëryo.” Mit Yeesus sayn wërter, lërne mer tas (1) ti seksuaal imoraaliteet is ti eensich piiplix uersach fer een hayrat mit een tiwors tsum ën pringe un (2) eene man woo sich fon sayn fraa tiworsiirt oone een piiplix uersach un sich mit een aner fraa ferhayrat, macht atultëryo. a

Meechte Yeesus sayn wërter petayte tas eene man woo seksuaal imoraaliteet macht un sich fon sayn fraa tiworsiirt, is fray tëm noo te Piipel, fer sich noch mool hayrate? Net imer. Wën eene man atultëryo macht, khan sayn fraa, woo unxultich is, ëntxlise ep se tëm fertsaye tuut orer net. Wën ti fraa ëntxlist tëm net fertsaye un een tiwors pasiirt, sin ti 2 fray fer noch mool hayrate noo tëm prosës fon tiwors tsum ën khomt.

Awer, es is meechlich tas ti unxultich fraa wil wayter mit sayn man ferhayrat plaype, un saat tëm tas se wilich is fer tëm fertsaye. Awer, un wën te man, woo atultëryo kemacht hot, wil net mit sayn fraa plaype un tuut aleen te tiwors suuche? Wayl ti fraa wilich is fer tëm fertsaye un wil wayter ferhayrat plaype, weyer eyer net fray, tëm noo te Piipel, fer sich noch mool hayrate. Wën eyer ëntxlist sich mit een aner persoon hayrate opwool eyer net fray is, tuut eyer atultëryo noch mool mache. Tan, teete ti elteste noch mool een jutikatiiw komisyoon mache fer mit tiise situatsyoon um keen. (1 Kor. 5:1, 2; 6:9, 10)

Wën eene man, woo net fray is tëm noo te Piipel, sich noch mool hayrat, wii siit ti kemaynt tëm sayn friirix hayrat un sayn nay hayrat? Tëm noo te Piipel, tuut ti friirix hayrat noch kile? Khan ti unxultich fraa noch ëntxlise sayn friirixe man fertsaye? Meecht ti nay hayrat aan kesiin wëre wii wën se seksuaal imoraaliteet am mache weyere?

Friier, hot ti kemaynt ti nay hayrat kesiin wii wën se seksuaal imoraaliteet am mache weyere in tiise situatsyoone: soo lang wii ti unxultich fraa noch am leepe waar, sich net noch mool kehayrat hot un net seksuaal imoraaliteet pratikiirt hot. Awer, wii Yeesus iwer te tiwors un sich noch mool hayrate kexproch hot, hot eyer net iwer ti unxultich fraa kexproch. Xtats tas, hot eyer aus keleet tas eene man woo sich fon sayn fraa tiworsiirt oone een piiplix uersach un tan sich mit een aner fraa hayrat, tuut atultëryo mache. In soo een situatsyoon, sich tiworsiire un noch mool hayrate  (etwas woo tëm noo Yeesus, is tas selwiche wii atultëryo) pringt ën tsu te friirix hayrat.

Wën eene man sich fon sayn fraa tiworsiirt un sich noch mool hayrat, is es net mee meechlich fer sayn friirix fraa, woo unxultich is, tëm fertsaye orer net. Tes weeche, praucht ti unxultich fraa sich khee mee ketanke too triwer mache. Un noch: ekaal ep ti unxultich fraa xtërpt, sich noch mool hayrat orer seksuaal imoraaliteet pratikiirt, tas ënert net wii ti kemaynt ti nay hayrat siit. b

In tëm payxpiil woo mer foer heyer kexproch hon, hot te man atultëryo kemacht, woo tsu een tiwors kenom hot. Awer, un wën te man khee atultëryo kemacht hot, awer hot sich fon sayn fraa tiworsiirt un sich mit een aner ferhayrat? Orer un wën te man khee seksuaal imoraaliteet pratikiirt hot foer te tiwors, awer hot tas kemacht noo te tiwors un hot sich noch mool ferhayrat, opwool tëm sayn fraa wilich waar fer tëm fertsaye? In al tiise situatsyoone, sich tiworsiire un noch mool hayrate — woo tas selwiche wii atultëryo is — pringt ti friirix hayrat tsum ën. Ti nay hayrat kilt foer ti rechiirung. A Sentinela 1^te Feepruer fon 1980, in te sayt 32, hot tas soo aus keleet: “Yets hot eyer een nay hayrat aan kefang; soo, khan eyer net eenfach sayn nay hayrat tsum ën pringe un retuer tsu sayn friirix fraa keen; ti friirix hayrat is am ën khom mit te tiwors, atultëryo un nay hayrat.”

Tiise ënerung in te aat wii mer tiise sache ferxteen, wil net saan tas ti kriste net mee tenke tas ti hayrat haylich is orer tas te atultëryo net een xweyer sint is. Wën eene man sich fon sayn fraa tiworsiirt oone een piiplix uersach un tan sich mit een aner persoon hayrat oone fray fer tas sin, mise ti elteste een jutikatiiw komisyoon uf mache wayl te man hot atultëryo kemacht. Wën ti nay fraa een krist is, mus tii aach foer een jutikatiiw komisyoon khome, wayl tii hot atultëryo kemacht. Opwool ti nay hayrat sol net aan kesiin wëre wii wën se seksuaal imoraaliteet am mache weyere, teet te man sich net fer spetsyaale priwilëje in te kemaynt kwalifitsiire torich fiile yoore, un net foer ti layt tëm noch mool respektiire khene un noo lose sich keëricht xpiire weeche tas xlechtes woo eyer kemacht hot. Eep tiise man kwalkee priwilëj in te kemaynt kriin khan, mise ti elteste aach traan tenke aan te situatsyoon fon sayn friirix fraa hayt, woo fiilaycht in een hinerlistich aat pehantelt kep is, un aach aan te khiner, woo fiilaycht im xtich kelos kep sin fon tëm xultiche man. (Mal. 2:14-16)

Sich tiworsiire un sich noch mool hayrate oone een piiplix uersach khan xweyere konsekwënse pringe. Tes weeche, mise ti kriste kluuch sin un Yeehoowa noo mache, woo ti hayrat wii haylich siit. (Ekl. 5:4, 5; Hep. 13:4)