▪ Ipu ɛdɔ āhɔ̄ ɛgɔɔma, ujɔ a géē leyi má obatɔha ku uwa gbɔbu a kōó kwu ŋmɛyi ɛ eko nɛ ɔba a gáā lɛ ɔnyā ɔhá lɛ, ku obatɔha nyā kē kwaajɛ klla le kpaakpa mɛ a. O ya ɛɛ ku alɔ jé ɔdā nōo ya ɛɛ nɛ alɔ wa oŋmɛyi ku ɛlā nyā lɛ a, alɔ leyi yɛ ɛlā nɛ Ujisɔsi ka lɛyikwu ɔba mla ɔnyā ō ta iyi uwa mla ō lɛ obiye ɔhá a.

Ipu ɔkpá ku Umátiyu 19:9, Ujisɔsi lɛ ɔ teyi peee ɔdā nōo géē ya ku ɔba mla ɔnyā kéē ta iyi uwa a. Ó kahinii: “ɔ́dāŋ ka ɔ̄cɛ dúúmā tá ɔnyā nū, ń táafú ŋ́ ayíka ohígbū ajā nōó gbo, nōó lɛ ɔnyā ɔhá lɛ, ayíka ɔ̄cɛ o cikpó ɔnyā ɔhá nōó wɛ á.” Ŋma ɛlā nɛ Ujisɔsi ka a, alɔ nwu ka (1) aja ō gbo wɛ ɔdā ekponu foofunu nōo géē ya ku ɔba mla ɔnyā kéē ta iyi uwa a, ku (2) ɔba duuma nōo ta ɔnyā nu ohigbu odee nōó cɛtɔha mla ukɔ́ ku Ubáyíbu ŋ, nɛ ó nyɔ gáā lɛ ɔnyā ɔhá lɛ ayika ɔcɛ ō cikpo ɔnya ɔhá nɛ ó wɛ a. *

Ɛyi ɛlā ku Ujisɔsi wɛ ka ɔcɛnyilɔ nōo lɛ ikpo ɔnyā ɔhá ce lɛ ɛga lɛ kóō nyɔ i lɛ ɔnyā ɔhá nɛ? Ó lɛ a nóó. Ɔdaŋ ku ɔbā nyɔ gáā lɛ ikpo ɔnyā ɔhá ce, ɔnyā nu nōó le ɛpɔbi ŋ ma lɔfu miya ō je ya ɔ ɛhi amāŋ ta ō ya lɛ a. Ɔdaŋ ka ó ta ku anuɔ i gáā je ya ɔ ɛhi ŋ néē miyɛ ɔkpá ku ɔnyā amāŋ ɔba ō ta, uwa ɛplɛɛpa lɛ ɛga ō lɛ obiye ɔhá ɔdaŋ ka é ta iyi uwa duudu ɛ.

Abɔ ɔhá ku nu, ó lɔfu wɛ ka ɔnyā nu nōó le ɛpɔbi ŋ ma dɔka ō yɔ mla ɔba nu a kpɔ, ó kē lɔfu da ɔba nu a ku anuɔ le tutu ō je ya ɔ ɛhi ŋma ɔtu. Amáŋ ɔdaŋ ku ɔba nōo nyɔ i cikpo ɔnyā ɔhá a ta ō je yɛhi ku ɔnyā nu, nɛ anu a foofunu cɛ kéē ta iyi uwa bɛ? Ohigbu ku ɔnyā nu le tutu ō je ya ɔ ɛhi ŋma ɔtu a, ó gáā cɛtɔha mla ukɔ́ ku Ubáyíbu kóō nyɔ gáā lɛ ɔnyā ɔhá ŋ. Ɔdaŋ ka ó cɛ ŋma ɔtu ka anuɔ i lɛ ɔnyā ɔhá piii, naana nɛ ukɔ́ ku Ubáyíbu i jɛga ɔɔma lɛ ɔ ŋ ma, ó géē je piya ɔcɛ ō cikpo ɔnyā ɔhá kpɔ. Anyakwɔcɛ ku ujɔ géē lɛ ígwu ku ācɛ ō kɛpɔ fu kwɛɛcɛ cɛɛ kéē lɛ ɛpɔ ku íne nōó biya a ka kpɔ.—1 Ukɔ́r. 5:1, 2; 6:9, 10.

Ɔdaŋ nɛ ukɔ́ ku Ubáyíbu i jɛga lɛ ɔcɛnyilɔ kóō gáā lɛ ɔnyā ɔhá ŋ, ɛgɛnyá nɛ ujɔ a lɔfu má obatɔha ku nu gbɔbu mla aku ɛpɛpɛ a? Oŋma ɛlā nōo yɔ ipu Ubáyíbu a, obatɔha ku anu mla ɔnyā nu tɛtɛ a yɔ i gɔbu kpɔ nɛ? Obiye ku nu nōó ya bɔbi ŋ ma lɔfu miya ō je ya ɔba nu otɛtɛ a ɛhi amāŋ ta ku anuɔ i gáā ya lɛ a gla ŋ kpɔ? Oŋma aya ku ujɔ a, obatɔha ku ɔba mla ɔnyā ɛyipɛ a wɛ aja ō gbo amāŋ ikpo ɔnyā ɔhá ō ce nɛ?

Ŋma igbihi a, ujɔ a gē má obatɔha ku ɔba mla ɔnyā ɛyipɛ a ku aja ō gbo amāŋ ikpo ɔnyā ɔhá ō ce, ɔdaŋ ka ɔnyā nu nōó lé ɛpɔbi ŋ ma yeeyi kpɔ, nɛ ó lɛ ɔba ɔhá ɛ ŋ, klla gbo aja ta ɔcɛ duuma ŋ. Amáŋ, Ujisɔsi i kɛla lɛyikwu obiye ku nu nōó lé ɛpɔbi ŋ ma eko nɛ ó yɔ i kɛla lɛyikwu ō ta ɔba amāŋ ɔnyā mla ō lɛ obiye ɔhá ŋ. Ikɔkɔ ɔɔma, ó lɛ ɛlā teyi peee ka ɔba nɛ ó miyɛ ɔkpá ku ɔnyā ō ta naana nɛ ukɔ́ ku Ubáyíbu i jɛga ɔɔma lɛ ɔ ŋ, klla nyɔ i lɛ ɔnyā ɔhá lɛ lɛ ikpo ɔnyā ɔhá ce yɔ abɔɔ a. Ipu ɛdɔ āhɔ̄ ɛgɔɔma, ō ta ɔba amāŋ ɔnyā mla ō lɛ obiye ɔhá nɛ Ujisɔsi le gbla ikpo ɔnyā ɔhá nɛ ɔba gáā ce a géē bi obatɔha ku anu mla ɔnyā gbɔbu a wa oŋmɛyi.

 Ɔdaŋ ku ɔba ta ɔnyā nu nyɔ i lɛ ɔnyā ɔhá lɛ, ó gáā tɔɔtɛ lɛ ɔnyā nu gbɔbu nɛ ó lé ɛpɔbi ŋ ma kóō je ya ɔ ɛhi amāŋ ta ō je ya ɔ ɛhi ɛ gɛ ŋ. Ohigbu ɛnyā, ó gáā cɛgbá ō ya ōmiya olɔnɔ kóō je ya ɔba nu otɛtɛ a ɛhi amāŋ ta ō ya lɛ a gɛ ŋ. O ka tu ɔ, ɔdaŋ ku ɔnyā nu nōó le ɛpɔbi ŋ ma kóō gekwu ɛ, lɛ obiye ɔhá lɛ kpɔ, amāŋ lɛ aja gbo, ɛnyā i gáā piya ɔwɛ nɛ ujɔ a géē leyi má obatɔha ɛpɛpɛ ku nu a abɔ ŋ. *

Ŋma ocabɔ nɛ alɔ leyi yɛ ɔ ɛ ma, ɔba a lɛ ikpo ɔnyā ɔhá ce, ɛnyā kē ya néē ta iyi uwa a. Ɔdi gáā ya ɔdaŋ ku ɔba a i cikpo ɔnyā ɔhá ŋ, amáŋ nɛ ó miyɛ ɔkpá ku ɔnyā ō ta gáā lɛ ɔnyā ɔhá lɛ bɛ? Amāŋ ku ɔba a i cikpo ɔnyā ɔhá gbɔbu ɛ nōó miyɛ ɔkpá ku ɔnyā ō ta ŋ, nōó nyɔ gáā lɛ ɔnyā ɔhá lɛ naana nɛ ɔnyā otɛtɛ a le tutu ō je ya ɔ ɛhi ŋma ɔtu bɛ? Ipu aocabɔ nōo ba nyā, ō ta ɔba amāŋ ɔnyā mla ō lɛ obiye ɔhá nōo wɛ aja ō gbo amāŋ ikpo ɔnyā ɔhá ō ce a géē bi obatɔha ku uwa gbɔbu a wa oŋmɛyi. Obatɔha ku ɔba mla ɔnyā ɛyipɛ a gáā kwaajɛ ɔkwɔɔkwɛyi ɛ. Ɔda Ō Gbaajɛ ku Ɔya Ɔmigwoleyi 15, ku ihayi ku 1979 aku oyibo, upeji 32 lɛ ɔ teyi peee kahinii: “Babanya ó lɛ obiye ɛyipɛ lɛ ɛ, ohigbu ɛnyā, ó gáā lɛ abɔ ci obatɔha ku uwa ɛyipɛ a cɛɛ kóō cigbihi gā ɛgiyi ɔnyā nu otɛtɛ a gɛ ŋ. Obatɔha ku uwa gbɔbu a ŋmɛyi mla ō ta iyi uwa, ikpo ɔnyā ɔhá ō ce mla obiye ɔhá ō lɛ.”

Opiyabɔ ku ɛgɛ nɛ alɔ jɛyi ɛlā nyā i wɛ ka Ɔcɛ O Yɛce Ukraist géē leyi má obatɔha ku ɔba mla ɔnyā ka ó wɛ ɔdā tiihɔ gɛ ŋ, amāŋ leyi má aja ō gbo amāŋ ikpo ɔnyā ɔhá ō ce ka ó wɛ íne obiya bɔbi bɔbi ŋ. Ɔdaŋ ku Ɔba ta ɔnyā nu, nōo ya lɛ a i cɛtɔha mla ukɔ́ ku Ubáyíbu ŋ nɛ ó nyɔ gáā lɛ ɔnyā ɔhá lɛ, anyakwɔcɛ ku ujɔ géē fu ígwu ku ācɛ ō kɛpɔ a kwɛɛcɛ cɛɛ kéē kɛpɔ ku ikpo ɔhá nōo ce a tu ɔ. (Ɔdaŋ ku obiye nōó lɛ a kē wɛ Ɔcɛ O Yɛce Ukraist, é géē kɛpɔ ku aja ō gbo tu ɔ duu.) Naana nɛ ujɔ a i gáā leyi má obatɔha ɛpɛpɛ ku nu ku ikpo ɔnyā ɔhá ō ce ŋ ma, ó géē ya ku ɔba a ka ó hii cika jɛ ku ɛnɛɛnɛ ɛga duuma ipu ujɔ ŋ ihayi alɛwa, nɛ ācɛ ɔhá i klla cɔnu mla ɔ lɛyikwu aɔdɔbɔbi nōó ya ŋma igbihi a gɛ ŋ, néē klla habɔ ō gbɛla ka ó wɛ ɔcɛ néē cika ō lɛ ojilima ce ŋ ma ta. Gbɔbu ɛɛ kéē je ɛnɛɛnɛ ɛga duuma lɛ ɔ ipu ujɔ, anyakwɔcɛ ku ujɔ a géē gbɛla lɛyikwu ɔdā nōo wɛ āhɔ̄ ku obiye ku nu gbɔbu nōó lé ɛpɔbi ŋ ma, mla ō leyi yɛ ɔdā nōo wɛ āhɔ̄ ku ayipɛ nɛ̄ŋcɛ́ duuma nōó lɔfu leyi gwu uwa bonu a.—Umál. 2:14-16

Ohigbu ɔdā nɛ ó ta igbihi kōo ta ɔba amāŋ ɔnyā mla ō lɛ ɔnyā ɔhá nōó cɛtɔha mla ukɔ́ ku Ubáyíbu ŋ ma, Ācɛ O Yɛce Ukraist gē bi ijeeyi ō gbla Ujehofa ya ŋma lɛ ō leyi má obatɔha ku ɔba mla ɔnyā ka ó wɛ ɔdā otiihɔ.—Ɔ̄cok. 5:4, 5; Uhíb. 13:4.