Ẹ-ẹpwụ nya iwe-ahụrụ ọlịịwẹ, ọjịra-jịra ka yẹ awụlẹ oyeye nya ọgbanyẹ ọlaanyị lala nyị cheju ụka ká ọlẹng á ye ahụ ọkịla lẹ, ị tị ka yẹ awụlẹ oyeye onyeewe lala ọlẹ ká ehile myị ju ịnyịnyị lẹ. Nyọka wo etu nya ang odudu ká ẹlẹwẹ lịnyị, ahị kụ ẹhị yẹ ẹla ọlẹ ká iJisọsị ya u-uhye nya awụlẹ ọpwapwa bala awụlẹ oyeye wẹẹ.

Ụ-ụpwụ nya ịMatiyu 19:9 NW, iJisọsị gu ẹnyị nya ang ookpokpo ọlẹ ká ịBayịbụụ ya iwe da nyọka myị́ awụlẹ oyeye. O yẹkẹẹ: “Ọngọngọhẹ ọlẹ kọ pwa ahụ nyamwụ u-uhye nya ẹla ọkịla, datị hi ụya ọhọhọ, kọ ye ọngọkịla aalẹ, ọ họ ụya lẹ.” Bwu omyi ẹla nya iJisọsị ọwẹ, ahị wẹ ka jẹ́ nyori (1) ụya ọhọhọ kem à ri ang ọlẹ ká Ụpwụ Ịgọgọ ya iwe da nyọka myị́ awụlẹ oyeye bwula awụlẹ ọpwapwa myị́ lẹ bala o-ri (2) ọlẹng ọlẹ kọ pwa ahụ nyamwụ u-uhye nya ẹla ọlẹ ká ịBayịbụụ myị ọnụ ju ka, kọ ye ọngọkịla họ ụya. *

Ẹla ọlẹ ká iJisọsị ya wẹ mẹjẹ nyori ọlẹng ọlẹ kọ họ ụya kọ tị pwa ahụ nywamwụ, Ụpwụ Ịgọgọ ya iwe da họọ nyọka ye ahụ ọkịla lẹ ịnyị? Ịnyị o ri pyii ka. Ó ri ká ọrụ á họ ụya, ahụ ko ri ọngọ la abyị-ka à ka chụ nyọka hịnyọhi ha ọrụmwụ lee ọ-ka pwọọ lẹ. Ó ri ká ahụ á pwọọ kị tị da ụpwụ pwa awụlẹ pwoku ehile lẹ, ịwa angị imimiiye la ịlaa nyọka ye ahụ lee ọ-rwọrụ ọkịla ụka kị họ ẹla nya ụpwụ ọdada ọọwa chọnụ lẹ.

Ọ tị ka chịkpẹẹ myị́ nyori ọngọlẹ kọ la abyị ka kà la irya nyọka kpa awụlẹ oyeye kịnyaa du kọ ka byi ọrụmwụ nyori ọwa nyị nwụlanọ nyọka hịnyọhi họọ myị́. Ọ́ tị ri ká ọrụ ọlẹ kọ họ ụya wẹ á pwa la ọ-ka ye ọhịnyọhi nya ahụ nyamwụ myị kọ da ụpwụ pwa ahụ bẹẹ? Chajị nyọlẹ ká ahụ nwụlanọ nyọka hịnyọhi họọ bala ọ-kịnyaa la awụlẹ oyeye wẹẹ, Ụpwụ Ịgọgọ á ya iwe da ha ọrụ nyọka ye ahụ ọkịla ka. Ó ri kọ kịnyaa ụ-ụgbẹyị ọtịpyọ kọ ye ahụ ọkịla aalẹ, ụya ọ họ myịmyị wẹ lẹ. Angịgbahị nya ọjịra-jịra ka myị́myị́-ị̀ chụ angịhyẹ nyọka kụ ẹhị yẹ ẹla nyamwụ wẹẹ.​—1 Kọr. 5:1, 2; 6:9, 10.

Ó ri ká ọlẹng á ye ahụ ọkịla, ká Ụpwụ Ịgọgọ á tị ya iwe da họọ nyọka họ ịnyị ka, ányị ala ọjịra-jịra à tị́ ka yẹ awụlẹ oyeye nyamwụ onyogo bala onyeewe? Awụlẹ oyeye nyaa onyogo rịrị a-ahị nya itiwe nya ehile ịlẹpwụ nya Ụpwụ Ịgọgọ wẹẹ? Ahụ ọlẹ kọ la abyị ka kà jẹ́-ẹ chụ nyọka hịnyọhi lee ọ-pwa ọrụ onyogo wẹẹ? Ala ọjịra-jịra ka yẹ awụlẹ oyeye nyaa onyeewe lala ụya ọhọhọ?

Lụka ọkẹkpẹ, ọjịra-jịra kaa ya nyori awụlẹ oyeye onyeewe ọwẹ nyị ri ụya, jaabwọ myị́ abwọ ká ahụ ọlẹ kọ la abyị ka á ji lahị kaka ba, kọ rwọrwụ ọkịla ka, bala ọ-la abyị nya ụya ọhọhọ ka ịnyịnyị. Ma, iJisọsị á gu ẹnyị nya ọngọlẹ kọ la abyị ka ụka kọ wẹẹ ya ẹla u-uhye nya awụlẹ ọpwapwa bala awụlẹ oyeye ka. Ọkọkọ nya ọọwa, ọ wụlẹ nyori ọlẹng ọlẹ kị nyị́ pwa ahụ nyamwụ pwoku ẹla ọlẹ ká Ụpwụ Ịgọgọ ya iwe da nya ọọwa ka kọ ye ahụ ọkịla aalẹ, nyị họ ụya. Ẹ-ẹpwụ nya iwe ahụrụ ọlịịwẹ, ụpwụ ọ-da pwa ahụ bala ahụ ọkịla oyeye ụma ọlẹ ká iJisọsị ya nyị ri ụya ọhọhọ, myị́ awụlẹ oyeye nya ọgbanyẹ nyaa lẹ.

Ụka ká ọlẹng á pwa ahụ nyamwụ ko ye ahụ ọkịla lẹ, ọ́ chịkpẹẹ nya ahụ nya ọgbanyẹ ọlẹ kọ  la abyị ka ọ-ka chụ nyọka hịnyọhi lee ọ-pwọọ kaka. Lẹ, ọ́ baba nya ọwa ọ-ka hu olo nya ẹla ọnyaanyaa ọwẹ chụ ịlọmwụ juwa kụ irya ó ri kọ ka hịnyọhi lee ọ-ka pwa ọrụmwụ ọgbalẹ kaka. Ịnyịnyị, ó ri ká ọngọlẹ kọ la abyị ka á gbu, rwọrụ ọkịla lee ọ-họ ụya lee ọ lịnyị wẹwẹ ka, ọọwa á ka gu abwọlẹ ká ala ọjịra-jịra kaa yẹ awụlẹ oyeye ọnyeewe ọwẹ kaka. *

Ẹ-ẹpwụ nya ọ-chụ pwokwita ọlẹ kahị ya ẹla rụ wẹ, ọrụ à họ ụya du kọ ju ọmwụ nya awụlẹ ọpwapwa lẹ. Ọ́ tị ri ká ọrụ á họ ụya ka, ma kọ tị pwa ahụ nyamwụ rụ ka ye ọnyang ọkịla bẹẹ? Lee ọ́ tị ri ká ọrụ á họ ụya ene kọọ pwa ahụ nyamwụ ka, ma kọ tị họ ịnyị nyọlẹ kọ pwa ahụ kpá, ene kọọ kele ka ye ahụ ọkịla nanana nyori ahụ nyamwụ myị ọnụ nyọka hịnyọhi họọ tị bẹẹ? Ẹ-ẹpwụ nya ọ-chụ pwokwita ịwẹ wuu, ahụ ọpwapwa bala ahụ ọkịla oyeye ịwẹ wuu ri ụya ọhọhọ, lẹ ị ka myị́ awụlẹ oyeye nya ọgbanyẹ ọlaalẹ lẹ. Awụlẹ oyeye onyeewe ọwẹ ri ọyẹjula awụlẹ ọlẹ ká ehile myị ju lẹ. Ẹpwang ọ-Kụ Gbeji nya Ọya Ọkụrụ Ọhọhẹ 15, 1979, ẹbẹ 32 da ẹla ọọwa wụlẹ yẹkẹẹ: “Lẹẹlẹẹ wẹẹ, ọlẹng ọwẹ ju ka ẹpwụ nya awụlẹ oyeye onyeewe lẹ, ọ́ ka jẹ́-ẹ myọọ ị-ịwẹ nyọka tịrẹkpẹ ka ẹga nya ahụ nyamwụ onyogo kaka; awụlẹ oyeye nya ọgbanyẹ ọlaalẹ cheju ọọlajị nya ahụ ọpwapwa, ụya ọhọhọ, bala ahụ ọmaye lẹ.”

Ọnwụhọ ẹ-ẹga nya etu nya ẹlẹwẹ á mẹjẹ nyori ihi ọlala nya awụlẹ oyeye chụ hi lẹ lee ụya ọhọhọ á ri ọhọbịrị ọtụka ugbẹnyị kaka lẹ ka. Ọlẹng ọnyị kọ pwa ahụ nyamwụ pwoku ụgbẹyị ọlẹ ká ịBayịbụụ myị ọnụ ju ka, bala o-ye ahụ ọkịla ẹ-ẹpwụ nya iwe-ahụrụ ọlẹ ká ịBayịbụụ á ya iwe da họọ ka ịnyịnyị aalẹ, angịgbahị nya ọjịra-jịra ka chụ angịhyẹ nyọka wụla ẹla nyamwụ yẹ chajị ụya ọ họ lẹ. (Ó ri ká ahụ onyeewe ọlẹ kọ ye á ri ọngịnyị nya ịKịrayịsị aalẹ, angịgbahị nya ọjịra-jịra ka wụla ẹla nyamwụ yẹ ịnyịnyị u-uhye nya ụya ọhọhọ.) Ịlẹhị lẹ ị́ ka yẹ awụlẹ oyeye onyeewe ọwẹ lala ụya ọhọhọ ka, ma ọ́ tị pwoku ehile nya Ohe ka. Ọlẹng ọwẹ á tị ka la iwe nyọka ya ụkụrwọ ọlahịchịng ju ụ-ụbwọ ọọjịra-jịra ka ẹ-ẹpwụ nya ẹka lụmẹ-lụmẹ gbee ká angịnyị ka ba la ọ-kpa ẹhị ọtịpyọ yọọ u-uhye nya ẹla ọọwa. Ene ká angịgbahị nya ọjịra-jịra ka me irya nyọka ya iwe-ahụrụ họọ, ị ka kụ irya u-uhye nya iwe-ahụrụ ọlẹ ká ahụ nya ọgbanyẹ ọlẹ kị họ ẹla la ijẹẹhị ji lẹẹlẹẹ, bala iwe-ahụrụ nya anjwo ịlẹ ká ọngọ la abyị nyẹẹkpẹ da myị́ ịnyịnyị.​—Mal. 2:14-16.

Chajị nya akama ọtụka ọlẹ kọ juwa u-uhye nya awụlẹ ọpwapwa bala ahụ ọ-ma ye ụ-ụgbẹyị ọlẹ kọ pwoku ehile nya ịBayịbụụ ka wẹẹ, ọ ka ri ẹla ọjẹ́jẹ nya ọngịnyị nya ịKịrayịsị ọ-ka yẹ awụlẹ oyeye nya ang ọ-la ihi jaabwọ ká iJihova kaa yọọ.​—Ọngọ. 5:4, 5; Hib. 13:4.