Sambu na dibundu, makwela yina ya ntete sukaka ntangu bakala yina kwelaka nkento ya nkaka mpi makwela ya mpa ta vanda makwela yina me zabana. Sambu na kubakisa yo mbote, beto tadila mambu yina Yezu tubaka ya me tala kufwa makwela mpi kukwela diaka.

Mutindu Matayo 19:9 ke monisa yo, Yezu monisaka kikuma mosi mpamba yina Biblia ke pesaka nswa ya kufwa makwela. Yandi tubaka nde: “Konso muntu yina me fwa makwela ti nkento na yandi, katula kaka sambu na pite, mpi me kwela nkento ya nkaka, yandi me sala bizumba.” Mambu yina Yezu tubaka ke longa beto nde (1) pite kele kikuma mosi mpamba yina Biblia ke pesaka nswa ya kufwa makwela mpi nde (2) bakala yina ke fwa makwela ti nkento na yandi sambu na kikuma yina Biblia ke pesaka ve nswa ya kufwa makwela mpi me kwela nkento ya nkaka, yandi me sala bizumba. *

Keti mambu yina Yezu tubaka ke tendula nde bakala yina me sala pite mpi me fwa makwela ti nkento na yandi kele ti nswa yina Biblia ke pesaka ya kukwela diaka? Yo ke tendula ve kaka mpidina. Kana bakala me sala bizumba, nkento na yandi yina me sala ve mbi lenda baka lukanu ya kulolula yandi to ve. Kana nkento me buya kulolula yandi mpi bo me fwa makwela na ntwala ya leta, bo yonso zole kele ti nswa ya kukwela diaka.

Nkento lenda ndima kutanina makwela na bo mpi kulolula bakala na yandi. Ebuna nki ta salama kana bakala yina me sala bizumba me buya nde nkento na yandi kulolula yandi mpi yandi mosi me fwa makwela na leta na mpila na yandi? Bakala yina me sala bizumba kele ve ti nswa yina Biblia ke pesaka ya kukwela diaka sambu nkento na yandi lolulaka yandi mpi zolaka nde bo landa kuvanda na makwela kansi yandi buyaka. Kana yandi me baka lukanu ya kukwela nkento ya nkaka ata yandi kele ve ti nswa ya kusala yo, yandi me sala diaka bizumba. Bankuluntu ta sala diaka komite ya kusambisa sambu na kutadila mambu na yandi.—1 Bak. 5:1, 2; 6:9, 10.

Kana bakala mosi me kwela diaka ata yandi kele ve ti nswa yina Biblia ke pesaka ya kukwela diaka, nki mutindu dibundu ta tadila makwela ya ntete mpi makwela yai ya mpa? Na kutadila mambu yina Biblia ke tubaka, keti makwela ya ntete ta vanda kaka to yo ta fwa? Keti nkento ta landa kusosa bakala na yandi sambu bo landa kuvanda na makwela na bo? Na meso ya dibundu, keti makwela yina ta vanda bizumba?

Ntete sambu na dibundu, makwela yina ya mpa vandaka bizumba kana nkento yina me sala mbi ve kele kaka na luzingu, yandi me kwela diaka ve mpi yandi me sala ve pite. Kansi Yezu tubilaka ve nkwelani yina me sala ve mbi ntangu yandi tubilaka kufwa makwela mpi kukwela diaka. Kansi yandi tubaka nde bakala yina me fwa makwela sambu na bikuma yina Biblia ke pesaka ve nswa ya kufwa makwela mpi me kwela nkento ya nkaka, yandi me sala bizumba. Na diambu yai, kufwa makwela mpi kukwela diaka yina Yezu tubaka nde yo kele kibeni bonso muntu me sala bizumba, me sukisa makwela yina ya ntete.

 Kana bakala me fwa makwela ti nkento na yandi mpi yandi me kwela diaka nkento ya nkaka, nkento yina ya ntete yina salaka ve mbi ta vanda diaka ve ti mpila ya kulolula yandi sambu bo landa kuvanda na makwela. Yo yina, yandi ta vanda diaka ve ti mukumba ya kubaka lukanu ya kulolula bakala yina to ya kubuya yandi. Diaka, yo vanda nkento yina salaka ve mbi me fwa to ve, yo vanda yandi me kwela diaka to ve mpi yo vanda yandi me sala pite to ve, dibundu ta tadila diaka ve makwela yina ya mpa bonso bizumba. *

Na mbandu yina beto me tubila, bakala yina salaka bizumba yo yina bo fwaka makwela. Ebuna nki ta salama kana bakala me sala ve bizumba kansi yandi me fwa makwela mpi na nima yandi me kwela diaka nkento ya nkaka? Diaka, nki ta salama kana bakala yina salaka ve bizumba na ntwala ya kufwa makwela ti nkento na yandi kansi yandi salaka yo na nima ya kufwa makwela mpi na nima yandi kwelaka nkento ya nkaka ata nkento na yandi yina ya ntete ndimaka kulolula yandi? Na bambandu yina yonso, kufwa makwela mpi kukwela diaka nkento ya nkaka ke monisa nde bakala yina salaka bizumba mpi yo me fwa makwela yina ya ntete. Makwela yina ya mpa me zabana na leta. Mutindu Nzozulu ya Nkengi ya Kifalansa ya Februari 15, 1980 balutiti 31-32 ke monisa yo, “mutindu bakala yina me kwela diaka, yandi lenda fwa ve makwela yina mpi kuvutukila nkento na yandi ya ntete; makwela yina ya ntete fwaka ntangu bakala yina fwaka makwela, salaka bizumba mpi kwelaka nkento ya nkaka.”

Mutindu beto me soba mutindu na beto ya kubakisa diambu yai, yo ke tendula ve nde Bakristu ke yindula ve nde makwela kele diaka ve kima ya santu to nde bizumba kele ve disumu ya nene. Bakala yina me fwa makwela ti nkento na yandi sambu na bikuma yina Biblia ke pesaka ve nswa ya kufwa makwela mpi yandi me kwela diaka nkento ya nkaka, ata Biblia ke pesa yandi ve nswa ya kusala yo, bankuluntu ta sambisa yandi sambu yo ke monisa nde yandi me sala bizumba. (Kana nkento yina ya mpa kele Mukristu, bankuluntu ta sambisa yandi mpi sambu yandi me sala bizumba) Ata dibundu ke mona nde makwela yina ya mpa kele ve bizumba, bakala yina ta baka ve mikumba ya nkaka na dibundu bamvula mingi tii ntangu bantu ta yambula kudiyangisa sambu na mambu ya mbi yina yandi salaka to tii ntangu bantu ta kuma kuzitisa yandi diaka. Na ntwala nde bankuluntu kupesa yandi mukumba mosi, bo fwete tadila mpi mambu yina nkento na yandi ya ntete ke kutana ti yo. Yo lenda vanda nde nkento na yandi ya ntete ke landa kuwa mpasi sambu na mambu yina bakala na yandi salaka mpi nde bana na yandi ya fioti ke kudiwa bo mosi sambu na mambu yina papa na bo salaka.—Mal. 2:14-16.

Sambu na kutina mambu ya mbi yina lenda kumina beto kana beto me fwa makwela sambu na bikuma yina Biblia ke pesaka ve nswa ya kusala yo mpi beto me kwela diaka, yo kele mbote nde beto Bakristu, beto landa mbandu ya Yehowa mpi beto vila ve nde makwela kele santu.—Lon. 5:4, 5; Baeb. 13:4.