Kũngĩthiĩ ũguo, andũ thĩinĩ wa kĩũngano mabatiĩ gwĩtĩkĩra atĩ kĩa mbere nĩ gĩathirire rĩrĩa mũthuri ũcio aahikirie mũtumia ũngĩ, na magĩrĩirũo kuona kĩhiko kĩu kĩerũ kĩrĩ gĩtĩkĩrĩku. Nĩguo tũtaũkĩrũo kĩrĩa kĩratũma tuuge ũguo, reke twarĩrĩrie ũrĩa Jesu aaugire ũhoro wĩgiĩ ndigano na kũhikania rĩngĩ.

Thĩinĩ wa Mathayo 19:9, Jesu nĩ oonanirie atĩ kũrĩ o na gĩtũmi kĩmwe tu gĩa Kĩĩmaandĩko kĩngĩtũma kĩhiko gĩthire. Aaugire: “Mũndũ o wothe angĩtigana na mũtumia wake nĩ ũndũ wa gĩtũmi kĩngĩ tiga nĩ ũndũ wa ngomanio itagĩrĩire na ahikie ũngĩ, nĩ atharĩtie.” Ciugo cia Jesu iratũruta atĩ (1) kũringana na Maandĩko, ngomanio itagĩrĩire nocio tu ingĩtũma kĩhiko gĩthire na (2) mũthuri angĩtigana na mũtumia wake hatarĩ na mũthingi wa Kĩĩmaandĩko na ahikie ũngĩ nĩ ekĩte ũtharia. a

Hihi Jesu eendaga kuuga atĩ mũndũ wĩingĩranĩtie na ngomanio itagĩrĩire acoke atigane na mũtumia wake nĩ etĩkĩrĩtio nĩ Maandĩko kũhikania rĩngĩ? Ũguo tiguo eendaga kuuga. Mũthuri angĩtharia, mũtumia wake ũrĩa wĩhĩirio nĩwe ũgũtua kana nĩ ekũmuohera kana egũtigana nake. Angĩthuura gũtigana nake na macarie ndigano, o erĩ marĩ na wĩyathi wa kũhika kana kũhikania rĩngĩ thutha wa kũgĩa na marũa ma ndigano.

No ningĩ ũrĩa wĩhĩirio no ende matũũrie kĩhiko kĩao na kwoguo ere mũthuri wake nĩ ehaarĩirie kũmuohera. No kũngĩthiĩ atĩa angĩkorũo mũtumia nĩ ehaarĩirie kuohera mũthuriwe, no mũthuri arege matũũrie kĩhiko kĩao na ethe ndigano mataiguanĩire? Tondũ mũtumia wake nĩ ehaarĩirie kũmuohera na gũtũũria kĩhiko kĩao, mũthuri ũcio ndangĩkorũo na mũthingi wa Kĩĩmandĩko wa kũhikania rĩngĩ. Angĩtua itua rĩa kũhikia mũndũ ũngĩ, o na gũtuĩka Maandĩko matiramwĩtĩkĩria gwĩka ũguo, angĩkorũo ekĩte ũtharia rĩngĩ. Athuri a kĩũngano mangĩbatara gũthondeka kamĩtĩ ya ciira igũrũ rĩake rĩngĩ.​—1 Kor. 5:1, 2; 6:9, 10.

Mũndũ angĩhikania rĩngĩ atarĩ na mũthingi wa Kĩĩmandĩko-rĩ, arĩa angĩ thĩinĩ wa kĩũngano mangĩona atĩa kĩhiko kĩa mbere na kĩu kĩerũ? Kũringana na Bibilia-rĩ, hihi kĩhiko kĩa mbere no gĩtĩkĩrĩku? Hihi mũtumia wa mbere no akorũo na mweke wa kuohera kana kwaga kuohera mũthuri ũcio? Hihi kĩhiko kĩu kĩerũ no kĩonwo kĩrĩ kĩa ũtharia?

Na hau kabere, kĩũngano kĩoonaga kĩhiko kĩu kĩerũ kĩrĩ kĩa ũtharia angĩkorũo ũrĩa wehĩirio kĩhiko-inĩ kĩa mbere aarĩ o muoyo, ndaahikire, na ndaarĩ na mahĩtia ma ngomanio itagĩrĩire. O na kũrĩ ũguo, Jesu ndaagwetire ũhoro wa ũrĩa wĩhĩirio rĩrĩa aaragĩrĩria ũhoro wa ndigano na kũhikania rĩngĩ. Handũ ha ũguo, aataarĩirie akiuga  atĩ mũndũ ũrĩa ũtiganaga na mũtumia wake hatarĩ na mũthingi wa Kĩĩmandĩko na akahikia ũngĩ nĩ atharĩtie. Hĩndĩ ta ĩyo, tondũ mũthuri ũcio nĩ atigana na mũtumia wake na ahikania rĩngĩ, akoragwo ekĩte ũtharia na nĩ ũndũ ũcio kĩhiko kĩa mbere gĩgathira.

Rĩrĩa mũthuri atigana na mũtumia wake na ahikania rĩngĩ, mũtumia wake wa mbere ũrĩa wĩhĩirio ndarĩ na mweke wa kuohera mũthuri ũcio kana kwaga kũmuohera. Ndekũritũhĩrũo nĩ gũtua itua rĩa kũmuohera kana kwaga kũmuohera. Ningĩ, andũ arĩa angĩ kĩũngano-inĩ matiagĩrĩire kuona ta kĩhiko kĩu kĩerũ kĩrĩ kĩa ũtharia atĩ tondũ ũrĩa wehĩirio arĩ o muoyo, ndahikĩte rĩngĩ, na ndarĩ eingĩrania na ngomanio itagĩrĩire. b

Ngerekano-inĩ ĩyo twarĩrĩria, mũthuri nĩwe watharirie, na kwoguo magĩtigana. Ĩ angĩkorũo mũthuri ũcio ndaatharĩtie no agĩtigana na mũtumia wake na agĩcoka akĩhikania rĩngĩ? Kana akorũo mũthuri ũcio ndeeingĩranĩtie na ngomanio itagĩrĩire mbere ya matiganĩte, no nĩ eekire ũguo thutha wa gũtigana na akĩhikia mũtumia ũngĩ o na gũtuĩka mũtumia wake wa mbere nĩ eehaarĩirie kũmuohera? Ngerekano-inĩ icio, tondũ mũthuri ũcio nĩ matiganĩte na mũtumia wake na akahikania rĩngĩ, nĩ atharĩtie na ũndũ ũcio ũkaniina kĩhiko kĩa mbere. Kĩhiko kĩu kĩerũ gĩkoragwo kĩrĩ gĩtĩkĩrĩku kĩĩwatho. Ngathĩti ya The Watchtower, Novemba 15, 1979, yaugĩte ũũ karatathi-inĩ ka 32: “Rĩu mũthuri ũcio nĩ aingĩra kĩhiko-inĩ kĩerũ, na ndangĩniina kĩhiko kĩu na maũndũ macoke ũrĩa maarĩ tene, tondũ kĩhiko kĩa mbere nĩ gĩathirire rĩrĩa maatiganire, agĩtharia, na akĩhikania rĩngĩ.”

Kũgarũrĩra ũtaũku ũcio gũtironania atĩ tũtirona kĩhiko kĩrĩ kĩndũ gĩtheru kana atĩ gũtharia ti mehia maritũ. Rĩrĩa mũthuri atigana na mũtumia wake hatarĩ na mũthingi wa Kĩĩmandĩko na acoka ahikia mũndũ ũngĩ hatarĩ na mũthingi wa Kĩĩmandĩko, athuri nĩ mathondekaga kamĩtĩ ya ciira nĩ ũndũ wake tondũ nĩ ekĩte ũtharia. (Angĩkorũo mũtumia ũcio wahikio nĩ Mũkristiano, o nake nĩ agĩrĩirũo kuoerũo ikinya nĩ kamĩtĩ ya ciira, tondũ o nake nĩ atharĩtie.) O na gũtuĩka kĩhiko kĩu kĩerũ gĩtingĩonwo kĩrĩ kĩa ũtharia, mũthuri ta ũcio ndangĩagĩrĩra kũheo mĩeke ya mwanya thĩinĩ wa kĩũngano kwa ihinda rĩa mĩaka mĩingĩ na ndangĩagĩrĩra nginya rĩrĩa andũ magaatiga kũigua ũũru nĩ ũndũ wa ihĩtia rĩrĩa eekĩte. Ũndũ ũngĩ athuri maroraga mũthuri ũcio atanaheo mĩeke kĩũngano-inĩ, nĩ ũrĩa maũndũ mahaana harĩ mũtumia ũrĩa maatiganire nake na njĩra ĩtarĩ ya wĩhokeku, na ciana iria ingĩkorũo ciatiganĩirio nĩ mũthuri ũcio.​—Mal. 2:14-16.

Nĩ ũndũ wa ũũgĩ harĩ Akristiano kwĩgerekania na Jehova kuona kĩhiko kĩrĩ gĩtheru, na kwoguo gwĩthema maumĩrĩro moru ma ndigano itarĩ na mũthingi wa Kĩĩmandĩko na kũhikania rĩngĩ.​—Koh. 5:4, 5; Ahib. 13:4.