Ве дәрәщеда чахе Мәсиһик кәсәки дьнрʹа дьзәԝьщә, ньһерʹандьна щьвате гәрәке ӧса бә: һʹӧкӧме зәԝаща ԝийә пешьн бәтал дьбә у әԝ ида бьн һʹӧкӧме зәԝаща тʹәзәда йә. Сәва кӧ әм ве йәке рʹьнд фәʹм бькьн, ԝәрә әм дина хԝә бьдьне кӧ Иса Мәсиһ дәрһәԛа һәвԛәтандьне у зәԝаща тʹәзә чь готийә.

Мәтта 19:9-да Иса готийә, кӧ ль гора Ньвисаред Пироз, бона һәвԛәтандьне тʹәне сәбәбәк һәйә: «Кʹи кӧ бе сәбәбийа ԛавийе жьна хԝә бәрʹдә у йәкә дьн бьстинә, әԝ зьнекʹарийе дькә». Жь готьнед Иса, әм фәʹм дькьн кӧ (1) ль гора Ньвисаред Пироз, жьн-мер тʹәне рʹуйе бенамусийеда дькарьн һәв бьԛәтьн у (2) мере кӧ жьна хԝә жь бо сәбәбәкә дьн бәрʹдьдә у жьнәкә дьнрʹа дьзәԝьщә, бенамусийе дькә. *

Гәло готьнед Иса тенә һʹәсабе кӧ һәгәр мер бенамусийе бькә у жьна хԝә бәрʹдә, әԝе ида аза бә кӧ жьнәкә дьн бинә? Нә һʹәму дәрәщада. Һәгәр мер бенамусийе бькә, гәрәке жьна ԝи, йа кӧ нә гӧнәкʹар ә, сафи кә бьбахшинә мере хԝә, йан на. Һәгәр жьн нәбахшинә мере хԝә у әԝана бь ԛануни жь һәв бьԛәтьн, паши һәвԛәтандьне һәрдӧ жи аза нә кӧ бьзәԝьщьн.

Жь алийе дьнва жи, дьбәкә жьн бьхԝазә тʹәви мере хԝә бьминә у бь ве йәке нишан кә кӧ әԝ һазьр ә бьбахшинә ԝи. Ле һәгәр мер тʹәви жьна хԝә ԛайил набә у дьхԝазә ле бьԛәтә? Һәгәр жьн һазьр ә бьбахшинә мере хԝә у тʹәви ԝи бьминә, ԝи чахи ль гора Ньвисаред Пироз изьна ԝи тʹӧнә йәкә дьнрʹа бьзәԝьщә. Ле һәгәр әԝ жьнәкә дьнрʹа бьзәԝьщә, әв йәк ԝе бе һʹәсабе бенамуси, у һьнге рʹуспийед щьвате гәрәке комитейа диԝанкьрьне саз кьн (1 Корьнтʹи 5:1, 2; 6:9, 10).

Чахе мерәк кӧ ль гора Кʹьтеба Пироз аза нинә бьзәԝьщә, ле йәкә әԝ жьнәкә дьнрʹа дьзәԝьщә, щьват гәрәке сәр зәԝаща ԝийә пешийе у йа дӧда чаԝа бьньһерʹә? Гәло ль гора Кʹьтеба Пироз һʹӧкӧме зәԝаща ԝийә пешьн һе ԛәԝатеда нә? Гәло паши һәвԛәтандьне жьн дькарә бьбахшинә мере хԝә у ԝи ԛәбул кә, йан на? Гәло щьват гәрәке зәԝаща ԝийә дӧда һʹәсаб кә ча зәԝаща бенамуси?

Ль гора фәʹмкьрьна бәре, зәԝаща дӧда ча бенамуси дьһатә һʹәсабе һʹәта кӧ кәсе нәгӧнәкʹар сах буйа, азәп бьма у бенамуси нәкьра. Ле гава Иса дәрһәԛа һәвԛәтандьн у зәԝаща дӧда гот, әԝи бәʹса һәвалзәԝаще нәнәһәԛ нәкьр. Әԝи тʹәне зәлал кьр, ԝәки мерәки кӧ нә ль гора Ньвисаред Пироз жьна хԝә бәрʹдьдә у тʹәзәда дьзәԝьщә, әԝ бенамусийе дькә. Һәвԛәтандьн у зәԝаща ӧса, ль гора готьнед Иса бенамуси йә у зәԝаща бәре ида бәтал дьбә.

Чахе мер жьна хԝә бәрʹдьдә у жьнәкә дьнрʹа дьзәԝьщә, ида бахшандьна жьна  ԝийә пешьн кӧ бесущ бу, бош-бәтал ә. Демәк ида нә лазьм ә кӧ жьн сафи кә һәла бьбахшинә ԝи, йан на. Ӧса жи, ньһерʹандьна щьвате сәр зәԝаща дӧда гәрәке ве йәкева гьредайи нибә, кӧ кәсе бесущ мьрийә, тʹәзәда зәԝьщи йә, йан жи бенамуси кьрийә. *

Ве мәсәледа кӧ мә жоре шеԝьр кьр, жьн-мер жь һәв ԛәтийан, чьмки мер бенамуси кьр. Ле щарна ӧса дьԛәԝьмә кӧ мер бенамуси нәкьрийә, ле йәкә жьна хԝә дьԛәтә у жьнәкә дьнрʹа дьзәԝьщә. Йан жи, мер нә кӧ пешийа һәвԛәтандьне, ле паши ве йәке бенамусийе дькә у йәкә дьнрʹа дьзәԝьщә, ле жьна ԝи һазьр ә бьбахшинә ԝи. Ван мәсәлада, һәвԛәтандьн у зәԝаща дӧда ԝәк бенамусийе йә у зәԝаща пешийе бәтал дькә. У ида зәԝаща дӧда бь ԛануни дькʹәвә ԛәԝате. «Бьрща Ԛәрәԝьлийеда» йа 15 Мьждаре, сала 1979 ӧса һатьбу готьне: «Әԝ кәсәки дьнрʹа зәԝьщи йә у ида нькарә вәгәрʹә щәм жьна хԝәйә пешьн, чьмки һәвԛәтандьн, бенамуси у зәԝаща дӧда, зәԝаща ԝийә пешьн бәтал кьрийә».

Әв ньһерʹандьна тʹәзә пирозийа зәԝаще кем накә у найе һʹәсабе кӧ бенамуси гӧнәки һаԛас гьран нинә. Һәгәр мер бе сәбәба ль гора Кʹьтеба Пироз жьна хԝә бьԛәтә у жьнәкә дьнрʹа бьзәԝьщә, сәва ве йәке гәрәке комитейа диԝанкьрьне бе саз кьрьне. (Һәгәр жьна дӧда Шәʹда Йаһоԝа йә, ви чахи комитейа диԝанкьрьне гәрәке дәрәща ве жи леколин кә, чьмки әԝе жи принсипа Кʹьтеба Пироз тʹәрʹьбандийә). Рʹаст ә щьват зәԝаща ԝийә дӧда ча бенамуси һʹәсаб накә, ле диса жи лазьм ә гәләк сал дәрбаз бьн, һʹәта кӧ кьред ԝан бенә биркьрьне у әԝ наве баш ԛазанщ кә, ԝәки бькарьбә щьватеда щабдарийа бьстинә. Ле ӧса жи пешийа кӧ рʹуспи щабдарики бьдьнә ԝи, әԝана гәрәке һьлдьн һʹәсаб, һәла жьна ԝийә пешийе, кʹижанерʹа кӧ мьхәнәти һатә кьрьне, у зарʹед ԝийи нәгьһишти, кӧ әԝи бехԝәйи һиштийә, чь һʹалида ньн (Малахи 2:14-16).

Һәвԛәтандьн у зәԝаща дӧда, кʹижан кӧ сәр һʹиме Кʹьтеба Пироз ниньн, зийанәкә гәләк мәзьн тиньн, ләма жи Мәсиһи гәрәке чʹәʹв бьдьнә Йаһоԝа у зәԝаще пироз һʹәсаб кьн (Ԝаиз 5:4, 5; Ибрани 13:4).