We di man mared bak, di kɔngrigeshɔn go si di fɔs mared as mared we dɔn ɛnd, ɛn dɛn go si di nyu mared as ligal mared. Fɔ ɔndastand di rizin dɛn we mek wi tɔk so, lɛ wi si wetin Jizɔs bin tɔk bɔt fɔ dayvɔs ɛn fɔ mared bak.

Na Matyu 19:​9, Jizɔs bin sho di wangren rizin we fɔ mek pɔsin dayvɔs in man ɔ in wɛf. I bin se: “Ɛnibɔdi we dayvɔs in wɛf, we i bi se in wɛf nɔ du mami ɛn dadi biznɛs di we aw Gɔd nɔ want, ɛn i mared ɔda uman, i dɔn du mami ɛn dadi biznɛs di we aw Gɔd nɔ want.” Frɔm wetin Jizɔs tɔk, wi lan se (1) di wangren rizin we fɔ mek pɔsin ɛnd in mared pan dayvɔs na we di ɔda pɔsin du mami ɛn dadi biznɛs di we aw Gɔd nɔ want ɛn (2) man we dayvɔs in wɛf fɔ rizin we di Baybul nɔ gri wit ɛn mared ɔda uman dɔn du mami ɛn dadi biznɛs di we aw Gɔd nɔ want. *

Fɔ se wetin Jizɔs bin tɔk min se di Baybul gri fɔ lɛ man we dɔn du mami ɛn dadi biznɛs di we aw Gɔd nɔ want ɛn dayvɔs in wɛf mared bak? Nɔ, nɔto so i bi. If maredman du mami ɛn dadi biznɛs wit ɔda uman, na di wɛf we inosɛnt go disayd if i go fɔgiv di man ɔ i nɔ go fɔgiv am. If i nɔ fɔgiv am ɛn dɛn dayvɔs ligal wan, dɛn ɔl tu kin mared afta we dɛn dɔn dayvɔs ligal wan.

Bɔt i pɔsibul se di inosɛnt wɛf go want fɔ kɔntinyu fɔ de na di mared, ɛn sɔntɛm i go tɛl in man se i rɛdi fɔ fɔgiv am. Bɔt, wetin go apin if di man we dɔn du mami ɛn dadi biznɛs nɔ gri fɔ mek in wɛf fɔgiv am ɛn in wangren disayd fɔ dayvɔs? Bikɔs di uman rɛdi fɔ fɔgiv am ɛn kɔntinyu di mared, di Baybul nɔ alaw di man fɔ mared bak. If di man disayd fɔ mared ɔda pɔsin pan ɔl we i nɔ fri fɔ du dat, wɛl i dɔn du mami ɛn dadi biznɛs bak di we aw Gɔd nɔ want, so di kɔngrigeshɔn ɛlda dɛn go mek judishal kɔmiti bak fɔ sidɔm pan in kes.—1 Kɔr. 5:​1, 2; 6:​9, 10.

If man we di Baybul nɔ alaw fɔ mared bak mared ɔda uman, aw di kɔngrigeshɔn de si di fɔs mared ɛn di nyu mared? Akɔdin to di Baybul, fɔ se di fɔs mared stil ol wata? Fɔ se di inosɛnt wɛf kin stil disayd fɔ fɔgiv ɔ nɔ fɔgiv in man? Fɔ se di kɔngrigeshɔn go si di nyu mared as sɔntin we gɛt fɔ du wit mami ɛn dadi biznɛs di we aw Gɔd nɔ want?

Trade, di kɔngrigeshɔn bin de si di nyu mared as sɔntin we gɛt fɔ du wit mami ɛn dadi biznɛs di we aw Gɔd nɔ want if di inosɛnt pɔsin stil de alayv, i nɔ mared, ɛn i nɔ du mami ɛn dadi biznɛs di we aw Gɔd nɔ want. Bɔt Jizɔs nɔ bin tɔk bɔt di inosɛnt pɔsin we i bin de tɔk bɔt fɔ dayvɔs ɛn fɔ mared bak. Bifo dat, i bin ɛksplen se ɛni man we dayvɔs in wɛf fɔ rizin we di Baybul nɔ gri wit ɛn mared ɔda uman, dɔn du  mami ɛn dadi biznɛs di we aw Gɔd nɔ want. If da kayn tin de apin, fɔ dayvɔs ɛn fɔ mared bak we Jizɔs se na lɛk we pɔsin de du mami ɛn dadi biznɛs di we aw Gɔd nɔ want, go ɛnd di fɔs mared.

We man dayvɔs in wɛf ɛn mared bak, i nɔ pɔsibul igen fɔ lɛ di fɔs wɛf, we na di inosɛnt pɔsin, fɔgiv am ɔ nɔ fɔgiv am. So i nɔ go nid fɔ wɔri if i fɔ fɔgiv in man ɔ i nɔ fɔ fɔgiv am. Dɔn bak, di we aw di kɔngrigeshɔn de si di nyu mared nɔ gɛt natin fɔ du wit if di inosɛnt pɔsin day, i mared bak, ɔ i du mami ɛn dadi biznɛs di we aw Gɔd nɔ want. *

Insay di ɛgzampul we wi dɔn tɔk bɔt, di man bin du mami ɛn dadi biznɛs di we aw Gɔd nɔ want, ɛn dat bin mek dɛn dayvɔs. Wetin go apin if di man nɔ bin du mami ɛn dadi biznɛs di we aw Gɔd nɔ want bɔt i dayvɔs in wɛf ɛn mared ɔda uman? Ɔ wetin go apin if di man nɔ bin du mami ɛn dadi biznɛs di we aw Gɔd nɔ want bifo di dayvɔs bɔt i du am afta di dayvɔs ɛn mared ɔda uman pan ɔl we in wɛf rɛdi fɔ fɔgiv am? Insay ɔl dɛn ɛgzampul dɛn ya, di dayvɔs ɛn fɔ mared bak, we min se di man dɔn du mami ɛn dadi biznɛs di we aw Gɔd nɔ want, go ɛnd di fɔs mared. Di nyu mared na ligal wan. Di Novɛmba 15, 1979, Wachtawa, pej 32, tɔk se, “naw di man dɔn go insay nyu mared ɛn i nɔ go ebul fɔ ɛnd in mared jɔs lɛk dat ɛn go bak to in fɔs wɛf; di dayvɔs, mami ɛn dadi biznɛs di we aw Gɔd nɔ want, ɛn di mared we i mared bak, dɔn ɛnd di fɔs mared.”

Bikɔs di we aw wi ɔndastand dis tɔpik dɔn chenj nɔ min se Kristian dɛn tink se mared na sɔntin we nɔ oli igen ɔ fɔ du mami ɛn dadi biznɛs di we aw Gɔd nɔ want nɔto sin we siriɔs bɛtɛ. We man dayvɔs in wɛf fɔ rizin we di Baybul nɔ gri wit ɛn mared ɔda uman we i nɔ fri fɔ du dat, di ɛlda dɛn go mek judishal kɔmiti fɔ am bikɔs i dɔn du mami ɛn dadi biznɛs di we aw Gɔd nɔ want. (If di nyu wɛf na Kristian, di ɛlda dɛn go mek judishal kɔmiti fɔ am bak bikɔs insɛf dɔn du mami ɛn dadi biznɛs di we aw Gɔd nɔ want.) Pan ɔl we dɛn nɔ go si di nyu mared as sɔntin we gɛt fɔ du wit mami ɛn dadi biznɛs di we aw Gɔd nɔ want, di man nɔ go kwalifay fɔ spɛshal wok na di kɔngrigeshɔn fɔ lɔng tɛm, ɛn pas te pipul dɛn stɔp fɔ vɛks fɔ di bad tin we i bin dɔn du trade ɔ pas te pipul dɛn stɔp fɔ fil se i nɔ fit fɔ gɛt rɛspɛkt. Dɔn bak, bifo dɛn gi am ɛni wok na di kɔngrigeshɔn, di ɛlda dɛn go tink bɔt wetin de apin to in fɔs wɛf we i nɔ bin fetful to ɛn ɛni smɔl pikin dɛn we sɔntɛm i go dɔn lɛf biɛn.—Mal. 2:​14-16.

Bikɔs ɔf di siriɔs prɔblɛm dɛn we kin apin bikɔs pɔsin dayvɔs fɔ rizin we di Baybul nɔ gri wit ɛn mared bak, Kristian dɛn go sho se dɛn gɛt sɛns bay we dɛn falamakata Jiova ɛn si mared as sɔntin we oli.—Ɛkli. 5:​4, 5; Ibru. 13:​4.