▪ တၢ်အိၣ်သး​မ့ၢ်​အိၣ်​ ဒ်န့ၣ်​ဒီး​ဝၤ​တဂၤ မ့ၢ်​ဆီဟံၣ်​ဆီဃီ​လၢ​အသီ​န့ၣ်​ တၢ်အိၣ်ဖှိၣ်​က​ထံၣ်​ဝဲ​လၢ အ​တၢ်​ဆီဟံၣ်​ဆီဃီ​လၢ အ​ပူၤကွံာ်​န့ၣ်​ ကတၢၢ်​လံ. ဒီး​အ​တၢ်​ဆီဟံၣ်​ဆီဃီ​လၢ​အသီ​န့ၣ်​ က​ဘၣ်​တၢ်​ပာ်​ပနီၣ်​အီၤ ဒ်​ပဒိၣ်​အ​တၢ်သိၣ်​တၢ်သီ အိၣ်​ဝဲ​အသိး​လီၤ. ဒ်သိး ပ​က​နၢ်ပၢၢ် တၢ်အိၣ်သး​အံၤ​အဂီၢ် ပ​ကကွၢ်​သကိး ယ့ၣ်ၡူး​အ​တၢ်​ကတိၤ​လၢ ဘၣ်ဃး​ဒီး တၢ်မၤ​ကတၢၢ်​ကွံာ် တၢ်​ဆီဟံၣ်​ဆီဃီ ဒီး​တၢ်​ဆီဟံၣ်​ဆီဃီ​လၢ​အသီ​အဂ့ၢ်.

ဖဲ မးသဲ ၁၉:၉ န့ၣ်​ယ့ၣ်ၡူး​ပာ်ဖျါ​ထီၣ်​ဝဲ​လၢ တၢ်ဂ့ၢ်​အိၣ်​ထဲ​တခါ​လၢ ပှၤမၤ​ကတၢၢ်​ကွံာ် တၢ်​ဆီဟံၣ်​ဆီဃီ​သ့. ဖဲန့ၣ်​ ယ့ၣ်ၡူး​တဲ​ဝဲ​လၢ “မ့တမ့ၢ်​​ဘၣ်​လၢ တၢ်မၤ​ကမၣ်မုၣ်​ကမၣ်ခွါ အဃိ​​ဘၣ်​န့ၣ်​ ပှၤ​မ့ၢ်​မၤ​ကတၢၢ်​ကွံာ် အ​တၢ်​ဆီဟံၣ်​ဆီဃီ​ဒီး​အမါ ဒီး​အ​ဝဲ​မ့ၢ်​ဆီဟံၣ်​ဆီဃီ​ဒီး ပှၤလၢ​အဂၤ​တဂၤ​န့ၣ်​ မ့ၢ်​အ​အဲၣ်ဘၢ​အမါ​လီၤ.” လၢ​ယ့ၣ်ၡူး​အ​တၢ်​ကတိၤ​အံၤန့ၣ်​ ပ​သ့ၣ်ညါ​​ဘၣ်​တၢ်ဂ့ၢ်​ခံ​ထံၣ်, (၁) လံာ်စီဆှံ ပာ်ဖျါ​ထီၣ်​ဝဲ​လၢ ပှၤ​မၤ​ကတၢၢ်​ကွံာ် တၢ်​ဆီဟံၣ်​ဆီဃီ​သ့​န့ၣ်​ ထဲဒၣ်​လၢ တၢ်မၤ​ကမၣ်မုၣ်​ကမၣ်ခွါ​တခါ​အဃိ ဒီး (၂) ဝၤ​တဂၤ​မ့ၢ်​မၤ​ကတၢၢ်​ကွံာ် အ​တၢ်​ဆီဟံၣ်​ဆီဃီ​ဒီး​အမါ လၢ​ကျဲ​လၢ အ​တ​​လီၤ​ပလိာ်​ဒီး လံာ်စီဆှံ​အ​တၢ်သိၣ်​တၢ်သီ​ဘၣ်​ ဒီး​မ့ၢ်​ဆီဟံၣ်​ဆီဃီ ကဒီး​လၢ​အသီ​န့ၣ်​ မ့ၢ်ဒၣ်​အ​အဲၣ်ဘၢ​အမါ​လီၤ. a

ယ့ၣ်ၡူး​အ​တၢ်​ကတိၤ​အံၤ ပာ်ဖျါ​ထီၣ်​ဝဲ​လၢ ဝၤ​တဂၤ မ့ၢ်​မၤ​ကမၣ်မုၣ်​ကမၣ်ခွါ ဒီး​မၤ​ကတၢၢ်​ကွံာ် အ​တၢ်​ဆီဟံၣ်​ဆီဃီ​ဒီး​အမါ​န့ၣ်​ အ​အိၣ်ဒီး​တၢ်​သဘျ့​လၢ က​ဆီဟံၣ်​ဆီဃီ​လၢ​အသီ​န့ၣ်​ဧါ. အ​တ​အဲၣ်ဒိး​တဲဝဲ ဒ်န့ၣ်​ဘၣ်. ဖဲ​အဝၤ​အဲၣ်ဘၢ​အီၤ​ဝံၤ​အခါ အမါ​အ​တၢ်​ကမၣ်​ တအိၣ်​​ဘၣ်​အဃိ အမါ​အိၣ်ဒီး တၢ်ခွဲး​တၢ်ယာ်​လၢ အ​က​ပျၢ်​ကွံာ် အဝၤ​အ​တၢ်​ကမၣ်​ မ့တမ့ၢ် က​မၤ​ကတၢၢ်​ကွံာ် အ​တၢ်​ဆီဟံၣ်​ဆီဃီ​ဒီး​အဝၤ​လီၤ. ဘၣ်ဆၣ်​အဝဲ မ့ၢ်​တ​တူၢ်လိာ်​အဝၤ​လၢၤ​ဘၣ်​န့ၣ်​ ဖဲ​အဝဲသ့ၣ်​ မၤ​ကတၢၢ်​ကွံာ် တၢ်​ဆီဟံၣ်​ဆီဃီ ဒ်​ပဒိၣ်​အ​တၢ်သိၣ်​တၢ်သီ​အိၣ်​ဝဲ​အသိး ဝံၤ​အခါ အဝဲသ့ၣ်​ခံဂၤ​လၢာ်​န့ၣ်​ အိၣ်ဒီး​တၢ်​သဘျ့​လၢ က​ဆီဟံၣ်​ဆီဃီ လၢ​အသီ​လီၤ.

ဝၤ​တဂၤ​မ့ၢ် အဲၣ်ဘၢ​အမါ​န့ၣ်​ ​ဘၣ်​သ့ၣ်​သ့ၣ်​ အမါ​က​အဲၣ်ဒိး​ပၢၤဃာ် အ​တၢ်​ဆီဟံၣ်​ဆီဃီ​အဃိ အမါ​က​ပျၢ်​ကွံာ် အ​တၢ်​ကမၣ်. ဘၣ်ဆၣ်​ အဝၤ​မ့ၢ်​တ​ကနၣ်​ဃုာ်​အမါ​ဘၣ်​ ဒီး​မ့ၢ်​မၤ​ကတၢၢ်​ကွံာ် အ​တၢ်​ဆီဟံၣ်​ဆီဃီ တခီတၢၤ​မီၤ. မ့ၢ်​လၢ အမါ​က​အဲၣ်ဒိး​ပၢၤဃာ် အ​တၢ်​ဆီဟံၣ်​ဆီဃီ ဒီး​ပျၢ်​ကွံာ် အ​တၢ်​ကမၣ်​အဃိ ဝၤ​တဂၤ​အံၤန့ၣ်​ ဒ်​လံာ်စီဆှံ ပာ်ဖျါ​ထီၣ်​ဝဲ​အသိး အ​ဝဲ​တအိၣ်​ဒီး​တၢ်​သဘျ့​လၢ က​ဆီဟံၣ်​ဆီဃီ​လၢ အသီ​ဒံးဘၣ်. ဘၣ်ဆၣ်​ ဖဲ​တၢ်အိၣ်သး​အိၣ်​ဒ်အံၤ​အခါ အ​ဝဲ​မ့ၢ်​တ​ကနၣ်​ဃုာ် လံာ်စီဆှံ​အ​တၢ်သိၣ်​တၢ်သီ​ဘၣ်​ ဒီး​မ့ၢ်​ဆီဟံၣ်​ဆီဃီ လၢ​အသီ​န့ၣ်​ မ့ၢ်ဒၣ်​ အ​အဲၣ်ဘၢ​က​ဒီး​အမါ. အဃိ တၢ်​အိၣ်ဖှိၣ်​သးပှၢ်​တဖၣ်​ က​ဘၣ်​မၤ​က​ဒီး​ဝဲ တၢ်​စံၣ်ညီၣ်​ကမံးတံာ် လၢ​တၢ်ဂ့ၢ်​တခါ​အံၤ​အဃိ​လီၤ.—၁ ကရံၣ်သူး ၅:၁, ၂; ၆:၉, ၁၀.

ဝၤ​တဂၤ မ့ၢ်​တအိၣ်​ဒီး​တၢ်​သဘျ့​လၢ က​ဆီဟံၣ်​ဆီဃီ​က​ဒီး​လၢ​အသီ ဒီး​အမ့ၢ်​ဆီဟံၣ်​ဆီဃီ လၢ​အသီ​န့ၣ်​ တၢ်​အိၣ်ဖှိၣ်​ဖိ​တဖၣ်​ က​ထံၣ်ဝဲ အ​တၢ်​ဆီဟံၣ်​ဆီဃီ​လၢ အ​ပူၤကွံာ် ဒီး​အ​တၢ်​ဆီဟံၣ်​ဆီဃီ လၢ​အသီ န့ၣ်​ဒ်လဲၣ်. မ့ၢ်​အမါ​လၢညါ​တဂၤ​န့ၣ်​ လံာ်စီဆှံ​က​ပာ်​ပနီၣ်​အီၤ​ဒ် အမါ​ဒံး​ဧါ. မါ​တဂၤ​အံၤ မ့ၢ်​က​ပျၢ်​ကွံာ် အဝၤ​အ​တၢ်​ကမၣ်​ဧါ မ့တမ့ၢ် က​မၤ​ကတၢၢ်​ကွံာ် အ​တၢ်​ဆီဟံၣ်​ဆီဃီ​ဧါ​န့ၣ်​ မ့ၢ်​အ​ဆၢတဲာ်​ဝဲ က​သ့ဒံး​ဧါ. အဝၤ​အ​တၢ်​ဆီဟံၣ်​ဆီဃီ လၢ​အသီ​န့ၣ်​ မ့ၢ်​တၢ်​အိၣ်ဖှိၣ်​ က​ထံၣ်​အီၤ​ဒ် တၢ်​အဲၣ်ဘၢ​မါ​အဲၣ်ဘၢ​ဝၤ​ဒံး​ဧါ.

လၢ​အ​ပူၤကွံာ်​န့ၣ်​ ဖဲ​ဝၤ​တဂၤ ဆီဟံၣ်​ဆီဃီ​လၢ​အသီ​ဝံၤ​အလီၢ်​ခံ အမါ​လၢညါ မ့ၢ်​အိၣ်မူ​ဒံး, မ့ၢ်​တ​ဆီဟံၣ်​ဆီဃီ​လၢ​အသီ​ဘၣ်​ ဒီး​မ့ၢ်​တ​မၤ​ကမၣ်မုၣ်​ကမၣ်ခွါ​​ဘၣ်​န့ၣ်​ တၢ်​အိၣ်ဖှိၣ်​ဆဲး​ထံၣ်ဝဲ အဝၤ​အ​တၢ်​ဆီဟံၣ်​ဆီဃီ​အသီ​ဒ် တၢ်​အဲၣ်ဘၢ​မါ​အဲၣ်​ဘါ​ဝၤ​ဒံး. ဘၣ်ဆၣ်​ ဖဲ​ယ့ၣ်ၡူး​တဲဝဲ ဘၣ်ဃး​ဒီး တၢ်မၤ​ကတၢၢ်​ကွံာ် တၢ်​ဆီဟံၣ်​ဆီဃီ ဒီး​တၢ်​ဆီဟံၣ်​ဆီဃီ လၢ​အသီ​အဂ့ၢ်​အခါ အ​ဝဲ​တ​တဲ​ဝဲ​ဘၣ်ဃး​ဒီး သးသမူ​တံၤသကိး​လၢ အ​တၢ်​ကမၣ်​တအိၣ်​​ဘၣ်​တဂၤ က​ဘၣ်​မၤဝဲ ဒ်လဲၣ်​ဒ်လဲၣ်​အဂ့ၢ်​ဘၣ်. ယ့ၣ်ၡူး​တဲ​ဝဲ​လၢ မါ​တဂၤ မ့ၢ်​တ​မၤ​ကမၣ်မုၣ်​ကမၣ်ခွါ​ဘၣ်​ ဘၣ်ဆၣ်​ အဝၤ​မ့ၢ်​မၤ​ကတၢၢ်​ကွံာ် အတၢ်​ဆီဟံၣ်​ဆီဃီ​ဒီး​အီၤ ဒီး​ဟံး​အမါ​လၢ​အသီ​န့ၣ်​ မ့ၢ်​အဝၤ​အဲၣ်ဘၢ​ အမါလီၤ. ယ့ၣ်ၡူး​အ​တၢ်​ကတိၤ​တဖၣ်​ ပာ်ဖျါ​ထီၣ်​ဝဲ​လၢ ဝၤ​တဂၤ မ့ၢ်အဲၣ်ဘၢ​အမါ​ဒ်န့ၣ်​န့ၣ်​ အ​တၢ်​ဆီဟံၣ်​ဆီဃီ က​ကတၢၢ်​ကွံာ်ဝဲ.

ဖဲ​ဝၤ​တဂၤ​မၤ​ကတၢၢ်​ကွံာ် အ​တၢ်​ဆီဟံၣ်​ဆီဃီ​ဒီး​အမါ ဒီး​ဟံး​အမါ​လၢ​အသီ​အခါ မ့ၢ်​လၢ​အ​တၢ်​ဆီဟံၣ်​ဆီဃီ​လၢ အ​ပူၤကွံာ်​တခါ​န့ၣ်​ ကတၢၢ်​ကွံာ်​လံ​အဃိ အမါ​လၢညါ​တဂၤ​န့ၣ်​ မ့ၢ်​အ​က​ပျၢ်​ကွံာ် အဝၤ​အ​တၢ်​ကမၣ်​ဧါ မ့တမ့ၢ် က​မၤ​ကတၢၢ်​ကွံာ် အ​တၢ်​ဆီဟံၣ်​ဆီဃီ​ဒီး​အဝၤ​ဧါ​န့ၣ်​ အ​ဆၢတဲာ်​​ဝဲ​တ​သ့​လၢၤဘၣ်. အဃိ အမါ​တလိၣ်​ ဆၢတဲာ်​ဝဲ နီတမံၤ​လၢၤဘၣ်. အဝဲ မ့ၢ်​အိၣ်မူ​ဒံး​မ့ၢ်ဂ့ၤ တ​အိၣ်မူ​လၢၤ​ဘၣ်​မ့ၢ်ဂ့ၤ, ဆီဟံၣ်​ဆီဃီ​လၢ​အသီ​မ့ၢ်ဂ့ၤ တ​ဆီဟံၣ်​ဆီဃီ​လၢ​အသီ​​ဘၣ်​မ့ၢ်ဂ့ၤ, မၤ​ကမၣ်မုၣ်​ကမၣ်ခွါ​မ့ၢ်ဂ့ၤ တ​မၤ​​ဘၣ်​မ့ၢ်ဂ့ၤ တၢ်​အိၣ်ဖှိၣ်​က​ထံၣ်ဝဲ အဝၤ​အမါ​လၢ​အသီ​တဂၤ​အံၤ ဒ်အမါ​နီၢ်ကီၢ်​အသိး ဒီး​အ​ဝဲ​တမ့ၢ် အဝၤ​တဂၤ​အံၤ အမါ​လၢၤဘၣ်. b

တၢ်ဂ့ၢ်​လၢ ပ​ပာ်ဖျါ​ထီၣ်​တ့ၢ်​တဖၣ်​န့ၣ်​ ဘၣ်ဃး​ဒီး ဝၤ​တဂၤ​အဲၣ်ဘၢ​အမါ ဒီး​မၤ​ကတၢၢ်​ကွံာ် တၢ်​ဆီဟံၣ်​ဆီဃီ​အဂ့ၢ်. ဘၣ်ဆၣ်​ ဝၤ​တဂၤ မ့ၢ်တ​အဲၣ်ဘၢ​အမါ​ဘၣ်​ ဒီး​မ့ၢ်​မၤ​ကတၢၢ်​ကွံာ် အ​တၢ်​ဆီဟံၣ်​ဆီဃီ ဒီး​ဟံး​အမါ​လၢ​အသီ​မီၤ. မ့တမ့ၢ် ဝၤ​တဂၤ မ့ၢ်​တ​အဲၣ်ဘၢ​အမါ​ဘၣ်​ ဒီး​မ့ၢ်​မၤ​ကတၢၢ်​ကွံာ် အ​တၢ်​ဆီဟံၣ်​ဆီဃီ​ဒီး​အမါ​ဝံၤမး မ့ၢ်​မၤ​ကမၣ်​မုာ်​ကမၣ်ခွါ​န့ၣ်​ မ့ၢ်​အမါ​အ​တၢ်ခွဲး​တၢ်ယာ်​ကအိၣ်​လၢ က​တူၢ်လိာ်​အီၤ​ဒံး​ဧါ. လၢ​တၢ်​အဒိ​ပူၤ တၢ်အိၣ်သး တခါဂ့ၤ​တခါဂ့ၤ​န့ၣ်​ မ့ၢ်ဝဲ တၢ်မၤ​ကတၢၢ်​ကွံာ် တၢ်​ဆီဟံၣ်​ဆီဃီ ဒီး​တၢ်​ဆီဟံၣ်​ဆီဃီ​လၢ​အသီ​အဃိ အဝဲသ့ၣ်​ အ​တၢ်​ဆီဟံၣ်​ဆီဃီ လၢ​အ​ပူၤကွံာ်​တခါ​န့ၣ်​ ကတၢၢ်​ကွံာ်​လံ. ဒီး​အ​တၢ်​ဆီဟံၣ်​ဆီဃီ လၢ​အသီ​န့ၣ်​ က​ဘၣ်​တၢ်​ပာ်​ပနီၣ်​အီၤ ဒ်​ပဒိၣ်​အ​တၢ်သိၣ်​တၢ်သီ အိၣ်​ဝဲ​အသိး​လီၤ. ၁၉၇၉, လါနိၣ်ဝ့ဘၢၣ်​ ၁၅, တၢးထီခိးတၢ် လၢ​ကီၤလၤဝါ​ကျိာ် လံာ်​ကဘျံးပၤ ၃၂ အ​ပူၤ​န့ၣ်​ တဲ​ဝဲ​လၢ “ဝၤ​တဂၤ​အံၤန့ၣ်​ မ့ၢ်​လၢ​အ​ဆီဟံၣ်​ဆီဃီ​လၢ​အသီ​လံ​အဃိ အ​ဝဲ​မၤ​ကတၢၢ်​ကွံာ် အ​တၢ်​ဆီဟံၣ်​ဆီဃီ​အသီ​အံၤ ဒီး​က့ၤကဒါ​က့ၤ​လၢ အမါ​လၢညါ​တဂၤ​န့ၣ်​အ​အိၣ်​ တ​သ့​လၢၤဘၣ်. ခီဖျိ​လၢ အ​ဝဲ​မၤ​ကတၢၢ်​ပာ်စၢၤ အ​တၢ်​ဆီဟံၣ်​ဆီဃီ​လၢ​အ​ပူၤကွံာ်​တခါ, အဲၣ်ဘၢ​အမါ ဒီး​ဆီဟံၣ်​ဆီဃီ​လၢ​အသီ​ဝံၤ​လံ​အဃိ အ​တၢ်​ဆီဟံၣ်​ဆီဃီ လၢ​အ​ပူၤကွံာ်​တခါ​န့ၣ်​ ကတၢၢ်​ကွံာ်​လံ.”

ပ​တၢ်​နၢ်ပၢၢ် ဆီတလဲ​ထီၣ်​ဒ်အံၤ သနာ်က့ ပ​က​ဘၣ်​သ့ၣ်ညါ​လီၤတံၢ်​လၢ ခရံာ်ဖိ​တဖၣ်​ က​ဘၣ်​ပာ်လုၢ်​ပာ်ပှ့ၤ အ​တၢ်​ဆီဟံၣ်​ဆီဃီ ဒီး​တၢ်​အဲၣ်ဘၢ​မါ​အဲၣ်ဘၢ​ဝၤ​န့ၣ်​ ကဲ​တၢ်​ကမၣ်​ဖးဒိၣ်. ဝၤ​တဂၤ မ့ၢ်​မၤ​ကတၢၢ်​ကွံာ် အ​တၢ်​ဆီဟံၣ်​ဆီဃီ​ဒီး​အမါ လၢ​ကျဲ​လၢ​အ​တ​​လီၤ​ပလိာ်​ဒီး လံာ်စီဆှံ​​ဘၣ်​န့ၣ်​ အ​ဝဲ​တအိၣ်​ဒီး​တၢ်​သဘျ့ လၢ​က​ဆီဟံၣ်​ဆီဃီ​လၢ​အသီ​ဒံး​ဘၣ်​အဃိ အမ့ၢ်​ဆီဟံၣ်​ဆီဃီ​လၢ​အသီ​န့ၣ်​ မ့ၢ်ဒၣ်​အ​အဲၣ်ဘၢ​အမါ. အဃိ​တၢ်​အိၣ်ဖှိၣ်​သးပှၢ်​တဖၣ်​ က​ဘၣ်​မၤဝဲ တၢ်​စံၣ်ညီၣ်​ကမံးတံာ်​လီၤ. (အမါ​လၢ​အသီ​တဂၤ မ့ၢ်​ကဲ​ခရံာ်ဖိ​နာ်​က့ တၢ်​အိၣ်ဖှိၣ်​သးပှၢ်​တဖၣ်​ က​ဘၣ်​မၤဝဲ တၢ်​စံၣ်ညီၣ်​ကမံးတံာ်​လၢ မါ​အသီ​တဂၤ​အံၤ အ​တၢ်မၤ​တခါ​အံၤ​အဃိ​လီၤ.) တၢ်​ဆီဟံၣ်​ဆီဃီ​လၢ အသီ​တခါ​အံၤန့ၣ်​ ပှၤ​တထံၣ်​​ဝဲ​ဒ် တၢ်​အဲၣ်ဘၢ​မါ​အဲၣ်ဘၢ​ဝၤ​ဘၣ်​ သနာ်က့ ဝၤ​တဂၤ​အံၤန့ၣ်​ ခီဖျိ​လၢ​အ​မၤတ့ၢ်​​ဝဲ​ဒ်အံၤ​အဃိ နံၣ်​တဖၣ်​ မ့ၢ်​လဲၤ​ပူၤကွံာ်​အါမး​နာ်​က့ ပှၤ​မ့ၢ်​သးဘၣ်ဒိ​ဒံး ဒီး​ပှၤ​မ့ၢ်​တူၢ်​ဘၣ်​လၢ အ​တ​​လီၤ​ပာ်ကဲ​ဒံး​ဘၣ်​န့ၣ်​ အ​ဝဲ​တ​ဒိးန့ၢ်​ဘၣ်​ မူဒါ​လီၤဆီ​လၢ တၢ်​အိၣ်ဖှိၣ်​အ​ပူၤ​ဘၣ်. တချုး​လၢ တၢ်​အိၣ်ဖှိၣ်​သးပှၢ်​တဖၣ်​ ဟ့ၣ်​အီၤ​မူဒါ​န့ၣ်​ အဝဲသ့ၣ်​က​ဆိကမိၣ်​ဘၣ်ဃး​ဒီး အမါ​လၢညါ​တဂၤ အ​တၢ်​တူၢ်ဘၣ်​ ဒီး​အ​ဖိ​လၢ အ​ပါ​ပာ်တ့ၢ်​ကွံာ်​အီၤ​တဖၣ်​ အ​တၢ်​တူၢ်​ဘၣ်​ခဲအံၤ အိၣ်​ဒ်လဲၣ်​လီၤ.—မၤလကံ ၂:၁၄-၁၆.

ပှၤ​မ့ၢ်​မၤ​ကတၢၢ်​ကွံာ် တၢ်​ဆီဟံၣ်​ဆီဃီ ဒီး​ဆီဟံၣ်​ဆီဃီ​လၢ​အသီ လၢ​ကျဲ​လၢ အ​တ​​လီၤ​ပလိာ်​ဒီး လံာ်စီဆှံ အ​တၢ်သိၣ်​တၢ်သီ​​ဘၣ်​န့ၣ်​ တၢ်ကီ​တၢ်ခဲ ကအိၣ်​ထီၣ်​ဖးဒိၣ်. အဃိ ဘၣ်ဃး​ဒီး တၢ်​ဆီဟံၣ်​ဆီဃီ အ​တၢ်ရဲၣ်​တၢ်ကျဲၤ​န့ၣ်​ ခရံာ်ဖိ​တဖၣ်​ မ့ၢ်​ဂုာ်ကျဲးစၢး အိၣ်ဒီး​တၢ်​ထံၣ်​ဒ် ယဟိဝၤ​ယွၤ​အသိး ဒီး​ပာ်လုၢ်​ပာ်ပှ့ၤ အ​တၢ်​ဆီဟံၣ်​ဆီဃီ​န့ၣ်​ မ့ၢ်​တၢ်​လၢ​အ​အိၣ်ဒီး တၢ်​ကူၣ်သ့​လီၤ.—စံၣ်တဲၤ​တဲ​လီၤ​တၢ် ၅:၄, ၅; ဧ့ၤဘြံၤ ၁၃:၄.