Mapuro gokutunda kovaresi
Nsene Mukriste a zumba mukadendi pwa hana konda zomoBibeli ntani nokukakwara ko gwapeke, ngapi omu mbungakriste nazi tara nonkwara dokuhova ntani nonkwara odo donompe?
Mbungakriste ngazi tara nonkwara dokuhova asi da haga po apa mugara naka kwara ko mulikwali gwapeke ntani ngazi tara nonkwara donompe asi yido dina kara po. Mokutuvatera tu kwate nawa egano sitwa esi, tuzeni tu ka tare eyi ga uyungire Jesus kuhamena kulizumba ntani nokukakwara ko gwapeke.
MwaMateusa 19:9, Jesus kwa tumbwire konda zimwe tupu zomulyo zokutezesa po nonkwara. Age kwa uyungire asi: “Ogu a zumbu mukadendi, pwa hana konda zehondero, a ka kware ko gwapeke, age kuhondera.” Kononkango daJesus tatu lirongere ko asi (1) kuhondera yizo tupu zelike konda zomoMatjangwa zokutezesa po nonkwara ntani (2) mugara ogu ana kuzumba mukadendi pwa hana konda zomoMatjangwa nokukakwara ko mukadi gwapeke, age kuhondera. *
Ngoso nonkango daJesus kwa tamba nye asi nsene mugara a hondera nokuzumba mukadendi, ana manguruka patjangwa mokukakwara ko gwapeke ndi? Hawe, kapisi yiyo ga tembe oyo. Nsene mugara a hondera, mukadendi ogu ga dira kuhondera kuvhura a tokore kumugusira po ndi hawe. Nsene a nyoka kumugusira po ntani nokutokora kulizumba paveta, navenye vana manguruka nye kukakwara ko mulikwali gwapeke.
Ano pamwe, mulikwali gomukadi ogu ga dira kuhondera kuvhura a tokore kugusira po mugara gwendi ogu ga hondera morwa ana hara kutwikira kukara namugara gwendi. Nye ngapi nsene mugara ogu ga hondera a nyoka kutambura egusiro po lyamukadendi ntani nokutokora kumuzumba ga hana kuyikwatesa ko mukadendi? Mokumona asi mukadi ana manguruka kugusira po mugara gwendi yipo ngano va twikire nonokwara dawo, kuliza noMatjangwa, moukaro ou mugara kapi ta manguruka mokukakwara hena. Nsene a tokora kukakwara mukadi gwapeke nampili ngomu ana dili kumanguruka kuliza noMatjangwa, age ngoso kuna kuhondera hena. Ano vakuronambunga va hepa kumupangura.—1 Kol. 5:1, 2; 6:9, 10.
Nsene mugara a siga mukadendi pwa hana konda zomoMatjangwa nokukakwara ko mukadi gwapeke, ngapi omu mbungakriste na zi tara nonkwara dokuhova ntani nedi donompe? Kuliza noBibeli, ngoso nonkwara dokuhova simpe podili ndi? Mulikwali ogu ga dira kuhondera kuvhura simpe a gusire po ndi a nyoke mugara gwendi ogu ga hondera ndi? Kuvhura mbungakriste zi tare nonkwara donompe asi dokuhondera ndi?
Pwanare, mbungakriste ngazi tara nonkwara donompe asi dokuhondera momaukaro aga: Nsene mulikwali gwanare simpe muzuni ndi kapi ga kwara ntani kapi ga kara nousima wonzo zokuhondera. Nye Jesus kapi ga uyungire kuhamena mulikwali ogu ga dilire kuhondera apa ga uyungire kuhamena kulizumba ntani nokukakwara hena. Nye age kwa fatwilire asi mugara ogu a zumbu mukadendi pwa hana konda zomoMatjangwa nokukakwara ko gwapeke, age ngoso ana hondere. Kuliza neyi ga uyungire Jesus, nsene mugara a zumba mukadendi nokukakwara hena, nonkwara dokuhova tadi fu po.
“Ogu a zumbu mukadendi, pwa hana konda zehondero, a ka kware ko gwapeke, age kuhondera.”—Mat. 19:9
Nsene mugara a zumba mukadendi nokukakwara ko gwapeke, mukadendi gokuhova kapi ta vhuru hena kugusira po mugara gwendi ndi a mu nyoke. Yipo nye, age kapi na vhura hena kukara nosinka sokugusira po mugara gwendi ndi asi a mu nyoke. Mutaro gombungakriste kononkwara donompe kapi nga gu korera komulikwali gwanare, yikare asi mulikwali ogo ga fa ndi ga kwara hena ndi ga kara nounzoni wehondero. *
Mosihonena esi tuna zogere, mugara kwa honderere, ano eyi kwa twaredesere kelizumbo. Nye ngapi nsene asi mugara kapi ga hondera nye a zumbe mukadendi nokukakwara ko gwapeke? Ndi ngapi nsene mugara kapi ga hondera komeho va lizumbe nye aya hondere konyima zokuzumba mukadendi ntani nokukakwara ko gwapeke nampili ngomu mukadendi gokuhova ga here kumugusira po? Moyihonena nayinye eyi, kulizumba ntani nokukakwara ko gwapeke, kuna kara ehondero. Ano eyi ngayi tezesa po nonkwara dokuhova. Nonkwara odo donompe kuna kara dopaveta. Ruhungu romo-15 Mangundu 1979 moRuhingilisa, pepenuno 32 kwa faturura asi: “Ngomu mugara ana ka kwara ko mukadi gwapeke, age ngoso ana ka tulisa po nonkwara donompe ntani kapi ta vhuru kudihagekesa po yipo a tengwire kononkwara dendi dopomuhowo, nonkwara domuhowo va di hagekesa po nelizumbo lyopaveta nehondero ntani ga ka kwara ko mulikwali gwapeke.”
Ekwatogano eli kapisi li ninkise Vakriste va gazare asi nonkwara kapisi sininke somulyo ndi kapi da pongoka ndi asi kuhondera mononkwara kapisi nzo zonene. Mugara ogu a zumbu mukadendi pwa hana konda zomoMatjangwa nokukakwara ko gwapeke age ga hana kumanguruka kukakwara hena kuliza noMatjangwa, vakuronambunga va hepa kumupangura morwa ga tura nzo zokuhondera. (Nsene mukadi ogu ana ka kwara Mbangi zaJehova, nage va hepa kumupangura morwa nzo zoruhonda.) Nampili ngomu nonkwara donompe nava dira kuditara asi kapisi dokuhondera, mugara kapi nga va mu pa yitumbukira mombungakriste ure wonomvhura dononzi dogoro wopeke ngava hageke kulizuvha udona konzo ezi ga rugana. Komeho zokuninka asi va mu pe yitumbukira mombungakriste, vakuronambunga va hepa kugazadara ko kuhamena mulikwali ogu va zumba moyineya ntani novanona.—Mara. 2:14-16.
Nonkwara edi da dira kuliza noMatjangwa kureta yitundwamo yoyidona, yipo nye Mukriste ga hepa kuhonena Jehova pokutara nonkwara asi da pongoka.—Muud. 5:4, 5; Heb. 13:4.
^ para. 2 Mokuyirerupika, tatu ka ruganesa mugara mokutamba komulikwali ogu ana hondere, ano mukadi komulikwali ogu ga dira kuhondera. Nye nampili ngoso, ngomu va yi tumbura mwaMarukusa 10:11, 12, Jesus kwa yi zeresere nawa-nawa asi morupe oru, epukururo eli kwa tamba komugara nomukadi navenye.
^ para. 1 Eli kuna kara ekwatogano lyepe. Yina lisigi nomu twa yi kwete egano nare asi nonkwara odo ngava di tara asi dokuhondera dogoro mulikwali ogu ga dira kuhondera nga fe, ndi nga kware hena ndi kwa kere nounzoni wehondero.
