Yuvu Y’atangi
Avo yakala una vo Nkristu ovondele longo yo nkento andi ke mun’owu wa nkanikinu mia Bibila ko yo sompa muntu ankaka, aweyi ampangi bafwete badikila o longo lwantete ye longo lwazole?
Muna diambu diadi, ampangi muna nkutakani bafwete badikila o longo lwantete vo lwafokoka yo badikila o longo lwanzole vo lwatondakana. Muna toma bakula e diambu diadi, yambula twazaya dina Yesu kavova mu kuma kia vonda longo yo sompa diaka.
Muna Matai 19:9, Yesu watoma kiesesa vo vena ye kuma kimosi kaka kiyikwanga muna Bibila kilenda fila o muntu mu vonda longo. Wavova vo: “Konso yakala ovonda o longo yo nkaz’andi, avo ke mu kuma kia mavangu ma zumba ko, kasompa wankaka, zumba katele.” Muna mvovo miami mia Yesu, tulongokele vo (1) e zumba i kuma kimosi kaka kiyikwanga muna Bibila kilenda fila o muntu mu vonda longo ye (2) o yakala avo ovondele longo yo nkento andi ke mu kuma kia zumba ko, kasompa wankaka, zumba katele. a
Mun’owu wa Bibila, nga e mvovo mia Yesu misonganga vo o yakala ona tele zumba yo vonda longo yo nkento andi ovevokele mu sompa diaka nkento ankaka? Ve kikilu. Avo yakala otel’e zumba, o nkento una vo munkondwa kuma olenda baka e nzengo kana vo ololoka yakala diandi yovo ve. Avo o nkento obakidi e nzengo za lembi kunloloka yo baka e nkand’a vondela longo kwa luyalu, yau awole bevevoka mu sompana diaka yo muntu ankaka.
Kuna diaka e sambu, o nkento munkondwa kuma, olenda baka e nzengo za tatidila o longo lwau yo vovesa yakala diandi vo ozolele kunloloka kikilu. Adieyi tuvova avo yakala kazolele diaka longo lolo ko kana una vo nkento andi unlolokele yo baka nkutu e nkand’a vondela longo kwa luyalu lembi vovesa nkento andi? Wau vo o nkento osongele luzolo lwa kunloloka yo tatidila o longo lwau, mun’owu wa nkanikinu mia Bibila, o yakala kavevokele ko mu sompa nkento ankaka. Avo obakidi e nzengo za sompa nkento ankaka kana una vo kena yo nswa wau ko, zumba diaka ketá. Muna diambu diadi, akuluntu muna nkutakani, balenda kubika e buka kia afundisi muna tala e diambu diadi.—1 Kor. 5:1, 2; 6:9, 10.
Avo yakala ovondele longo yo nkento ke mun’owu wa nkanikinu mia Bibila ko yo sompa muntu ankaka, aweyi ampangi muna nkutakani bafwete badikila o longo lwantete ye longo lwazole? Mun’owu wa nkanikinu mia Bibila, nga o longo lwantete lwakinu o mfunu? Nga dilendakana kwa nkento una vo munkondwa kuma, mu loloka yakala diandi yovo ve? Nga ampangi muna nkutakani bafwete badikila o longo lwazole vo lwa zumba?
Mu mvu miavioka, twabakulanga vo ekolo o nkento una vo munkondwa kuma kena o moyo, kasompele ko ye katele zumba ko, o longo lwazole lwabadikilwanga vo lwa zumba. Kansi, Yesu kavovela nkento munkondwa kuma ko vava kayika o vonda longo ye longo lwazole. Wasasila vo, avo yakala ovondele longo yo nkento andi ke mun’owu wa nkanikinu mia Bibila ko yo sompa nkento ankaka, zumba katele. Muna diambu diadi, avo yakala ovondele o longo yo sompa nkento ankaka, disongele vo o longo lwantete lufokokele.
“Konso yakala ovonda o longo yo nkaz’andi, avo ke mu kuma kia mavangu ma zumba ko, kasompa wankaka, zumba katele.”—Mat. 19:9
Vava yakala kevondanga longo yo sompa nkento ankaka, ke dilendakana diaka ko kwa nkento antete una vo munkondwa kuma kabaka e nzengo za loloka yovo lembi loloka yakala diandi. Muna kuma kiaki, ke dikala diaka mfunu ko kwa nkento katokana kana vo ololoka yovo ve. Ozevo, o nkento una vo munkondwa kuma kafwa yovo kakala o moyo, kasompa yovo lembi sompa yakala diankaka ye kata yovo lembi ta e zumba, ke diau ko difwete fila ampangi mu nkutakani mu badikila o longo lwazole vo lwatondakana yovo ve. b
Muna nona tuyikidi kuna lubantiku, o yakala otele e zumba yo vonda o longo. Kansi, adieyi tuvova avo yakala katele zumba ko, kansi ovondele o longo yo sompa nkento ankaka? Owau, adieyi tuvova avo yakala diodio katele zumba ko vitila kavonda longo, kansi otele zumba kuna nim’a vonda longo, kuna kulanda osompele nkento ankaka, kana una vo o nkento antete wanloloka? Muna mambu mama mawonso, o vonda longo yo sompa muntu ankaka, mafwete badikilwa vo zumba ye mefokolanga o longo lwantete. O longo lwazole lutondakana mun’owu wa nsiku a luyalu. Eyingidilu dia 1 dia Fevelelo 1980, lukaya lwa 32, divovanga vo: “Owau, yakala okotele mu kangu kiampa kia longo. Muna kuma kiaki, kafwete vonda longo lwalu ko yo vava vutukila luna lwantete olu lwafokokela, diakala mu kuma kia vonda longo, tá zumba yovo mu kuma kia sompa muntu ankaka.”
E nsobani yayi muna umbakuzi weto, ke yisongele ko vo o Nkristu kafwete yambula badikila o longo vo lwavauka yovo o ta zumba ke sumu diampwena kwandi ko. Avo yakala ovondele longo ke mun’owu wa nkanikinu mia Bibila ko yo sompa diaka lembi kala wavevoka, akuluntu bafwete kubika e buka kia afundisi muna tala e diambu diadi dia zumba. (Avo nkento kesompana yandi Nkristu, oyandi mpe kafwete fundiswa, kadi zumba katele.) Kana una vo o longo lwazole ke lufwete badikilwa ko vo lwa zumba, e yakala diadi kafwete tambula kiyekwa ko mu mvu miayingi muna nkutakani yovo yavana ampangi muna nkutakani beyantika diaka toma kunzitisa. Vitila katambula kiyekwa muna nkutakani, akuluntu bafwete toma fimpa e zingu kia nkento antete yo wana ana kabembola.—Mal. 2:14-16.
O badika e mfwilu mia vonda o longo yo kuyisia muna longo ke luna ngwizani ko ye nkanikinu mia Bibila, difwete fila Akristu mu kala ye ngangu yo tanginina Yave muna badikilanga o longo vo lwavauka.—Kim. 5:4, 5; Ayib. 13:4.
a Muna kutusadisa twabakula mu sazu, mu longi diadi tuyikila yakala vo yandi tele zumba, o nkento i munkondwa kuma. Kansi, mana tutanganga muna Maku 10:11, 12, metoma kiesesanga vo e mvovo mia Yesu muna sono kia Matai 19:9, wantu awonso miyikanga, kiakala yakala yovo nkento.
b Eyayi i nsobani ivangamene muna umbakuzi weto. Mu mvu miavioka, twabakulanga vo, o longo lwazole lwayambulanga kaka badikilwa vo lwa zumba vava o nkento una vo mu nkondwa kuma kasompanga diaka, katanga e zumba yovo kafwanga.
