Mwa muinelo wo, puteho iswanela kuunga kuli linyalo lapili nelifelile muuna hanaanyezi musali usili mi linyalo lahae labubeli liswanela kuungiwa kuli ki la ka mulao. Kuli luutwisise libaka halubulela cwalo, halunyakisiseñi zanaabulezi Jesu ka za teleko ni kunyala kamba kunyalwa sinca.

Sina mokuboniselizwe kwa Mateu 19:9, Jesu naatalusize libaka feela la ka Mañolo lelikona kutahisa kuli linyalo lifele. Naaize: “Mutu kaufela yaleleka musalaa hae, isiñi ka libaka la muzamao wa buhule, mi anyala usili, wabuka.” Manzwi a Jesu ao aluluta kuli (1) muzamao wa buhule ki lona feela libaka la ka Mañolo lelikona kutahisa kuli linyalo lifele, mi (2) muuna yaleleka musalaa hae isiñi ka libaka la ka Mañolo ni kunyala musali usili, wabuka. *

Kana manzwi a Jesu atalusa kuli muuna yaezize bubuki ni kuleleka musalaa hae ulukuluhile ka Mañolo kunyala hape? Haki cwalo luli. Haiba muuna yanyezi aeza bubuki, kuitingile ku musali yafoselizwe haiba uka muswalela kamba kutokwa. Haiba aiketela kusaswalela muunaa hae mi bafeza linyalo ka mulao, mañi ni mañi wabona ulukuluhile kunyala kamba kunyalwa.

Kono hape musali yafoselizwe ukona kubata kubukeleza linyalo lahae mi ukona kutabela kuswalela muunaa hae. Kono kucwañi haiba muuna yaezize bubuki haalati kuswalelwa ki musalaa hae mi uya kwa kuta kuli ayo felisa linyalo leo? Bakeñisa kuli musalaa hae watabela kumuswalela mi ubata kuli linyalo leo lizwelepili, muunaa hae haana tukuluho ya ka Mañolo ya kunyala hape. Haiba azwelapili ni mulelo wahae wa kunyala musali usili niha sikalukuluha kueza cwalo ka Mañolo, ueza bubuki hape, mi nto yeo ikatahisa kuli baana-bahulu mwa puteho bamutomele katengo ka buatuli hape.—1 Makor. 5:1, 2; 6:9, 10.

Haiba muuna yasika lukuluha kunyala ka Mañolo anyala, puteho iswanela kuunga cwañi linyalo lahae lapili ni labubeli? Ka kuya ka Mañolo, kana linyalo lahae lapili lisazwelapili? Kana musali yafoselizwe usakona kuikatulela kuswalela muunaa hae kamba kumuhana? Kana muuna yo ni musalaa hae wabubeli bakaangiwa kuli baeza bubuki?

Kwamulaho, puteho neiinga muuna yacwalo ni musalaa hae wabubeli kuli baeza bubuki ibile feela musali yafoselizwe naasapila, naasika nyaliwa, mi naasika ikenya mwa muzamao wa buhule. Nihakulicwalo, Jesu naasika bulela za mutu yafoselizwe hanaaambola za teleko ni kunyala kamba kunyalwa hape. Kono naabulezi kuli muuna yaleleka musalaa hae isiñi ka libaka la ka Mañolo ni kunyala usili, ueza bubuki. Kacwalo, mwa muinelo wo, Jesu naatalusa kuli linyalo lapili lifelile bakeñisa kuli muuna yo ubukile ka kuleleka musalaa hae ni kunyala usili.

 Haiba linyalo lifela kabakala kuli muuna ulelekile musalaa hae ni kunyala usili, hakusa konahala kuli musali yo yafoselizwe aswalele muunaa hae kamba kumuhana. Kacwalo, musali yo haasatokwa kubilaezwa ka za kuswalela muuna yanaa munyalanga kamba kumuhana. Hape, mubonelo wa puteho ka za linyalo labubeli hausika itinga fa taba ya kuli yafoselizwe kikale atimela, kikale anyala kamba kunyalwa, kamba uikenyize mwa muzamao wa buhule. *

Mwa mutala olunyakisisize, muuna naaezize bubuki, ili nto yenetahisize kuli linyalo lifele. Kucwañi haiba muuna naasika eza bubuki kono ulelekile musalaa hae ni kunyala usili? Kamba kucwañi haiba muuna naasika ikenya mwa muzamao wa buhule pili asika leleka kale musalaa hae kono naaezize cwalo hasaa mulelekile ni kunyala usili kusina taba kuli musalaa hae naatabela kumuswalela? Mwa miinelo yeo kaufela, muuna haleleka musalaa hae ni kunyala usili ueza bubuki, mi taba yeo ifelisa linyalo lapili. Linyalo labubeli leo seli lona la ka mulao. Sina mokuboniselizwe mwa Tawala ya Mulibeleli ya Sikuwa ya November 15, 1979, likepe 32, “muuna yo kikale akena mwa linyalo lelinca, mi hasaakona kufelisa linyalo leo ni kukutela ku musalaa hae wapili, kakuli linyalo lapili nelifelile hanaalelekile musalaa hae, kueza bubuki ni kunyala musali usili.”

Kutwisiso yenca ye hainyinyafazi taba ya kuli linyalo liswanela kuungiwa kuba lelikenile kamba kunyinyafaza sibi sa bubuki. Muuna yaleleka musalaa hae isiñi ka libaka la ka Mañolo ni kunyala usili niha sikalukuluha kueza cwalo ka Mañolo, ukatomelwa katengo ka buatuli kakuli uezize bubuki. (Haiba musalaa hae yomunca yo ki Mukreste, ni yena ukatomelwa katengo ka buatuli kakuli uezize bubuki.) Nihaike kuli muuna ni musalaa hae yo habana kuungiwa kuli baeza bubuki kabakala kuli banyalani, muuna yo haana kufiwa buikalabelo mwa puteho konji hase kufitile lilimo zeñata, mi batu babañwi batuhezi kuikutwa bumaswe kabakala sibi sanaaezize kamba kufitela bakala kumukuteka hape. Mi baana-bahulu basikafa kale muzwale yo buikalabelo mwa puteho, hape bakanyakisisa muinelo wali ku ona musali yanaaezizwe ka bupumi ki muzwale yo ni bana babanyinyani banaayubekile.—Mala. 2:14-16.

Bakeñisa lika zemaswe zeezahalanga haiba linyalo lifela isiñi ka libaka la ka Mañolo, mi muuna kamba musali anyala kamba kunyalwa hape, Bakreste baswanela kuba ni mubonelo oswana ni wanani ona Jehova ka za linyalo ni kuunga linyalo kuba lelikenile.—Muek. 5:4, 5; Maheb. 13:4.