Nge chuma kana chinasoloka, kaha chikungulwilo chatela kumona ngwavo ulo unafu mwomwo lunga nambate pwevo weka. Kaha nawa vatela kumona ulo wauhya uze nengilamo lunga kupwa hiulo wakutamo. Mwomwo ika tunahanjikila ngocho? Tunahanjika ngocho mwomwo yaMazu ahanjikile Yesu hachihande chakulukulula nakumbata cheka. Tushimutwilenu mazu kana.

Hamukanda waMateu 19:9, Yesu avulukaho chuma chize chinahase kujiha ulo. Ambile ngwenyi: “Weshowo mwalukulula pwevo lyenyi chakuzeneka mulonga waujila nakumbata weka, mwalinga ukoji.” Awa mazu aYesu ali nakutunangula vishina vivali. Chishina chatete shina, ujila ukiko kaha mulonga vavuluka muVisoneka unahase kujiha ulo nakulingisa pwevo nalunga valilukulule. Kaha chamuchivali shina, lunga uze mwalukulula puwenyi chakuzeneka mulonga kanou vavuluka muVisoneka nakumbata pwevo weka, nalingi ukoji. *

Uno mazu ahanjikile Yesu alumbununa nge lunga uze mwalinga ujila kaha himwalukulula puwenyi, napu wakulihehwa kumbata cheka tahi? Nahase kupwa wakulihehwa chipwe chiku. Mwomwo ika? Mwomwo nge lunga nalingi ukoji, puwenyi nahase kumukonekela chipwe chiku. Nge uze pwevo mwakana kukonekela lunga lyenyi kaha hinavalilukulula kweseka najishimbi jafulumende, kaha vosena vavali navapwa vakulihehwa kulimbata namutu weka.

Shimbu jimwe, pwevo nahase kufwila kulama ulo wavo ngocho himwalweza lunga lyenyi ngwenyi namukonekela. Nyi ngachilihi nge uze lunga alinganga ukoji mwakana kumukonekela kuli puwenyi kaha himwakakamisa muchima wenyi nakulukulula pwevo kweseka najishimbi? Hakuwana nge pwevo namukonekela nakusaka kutwalaho lika kutwama muulo, uze lunga keshi kupwa wakulihehwa kumbata pwevo weka kweseka naVisonekako. Kachi nge mwanjinjimika muchima nakumbata pwevo weka okunyi kapwile wakulihehwa kumbata kweseka naVisonekako, kaha nalingi cheka ukoji. Chuma kana nachimulingisa vamusopese cheka kukomiti yakusopa yachikungulwilo.—Koli. 1, 5:1, 2; 6:9, 10.

Nge lunga uze nazeneka kupwa wakulihehwa kumbata kweseka naVisoneka, himwambata pwevo weka, kaha chikungulwilo chatela kumona ngachilihi ulo uze unafu naulo wauhya mwengilamo uze lunga? Kweseka naMbimbiliya, uno ulo wavo wamwaka hanga kuuli lika tahi? Kutala uze pwevo nahase kukonekela lika lunga lyenyi chipwe kumukana tahi? Uno chikungulwilo chatela kumona ulo wauhya uze nengilamo uze lunga kupwa ulo waukoji tahi?

Kunyima, chikungulwilo chamwenenga ulo wauhya uze nengilamo uze lunga kupwa hiulo waukoji, kachi nge pwevo uze vanalukulula achili wamutonyi, kaha nawa kasombokeleko, chipwe nge kalingile ujilako. Omu Yesu ahanjikile vyakulilukulula nakumbata cheka, kapwile nakuhanjika hali pwevo uze vanalukulula chakuhona mulonga vavuluka muMbimbiliyako. Oloze alumbunwine ngwenyi, lunga uze mwalukulula chakuzeneka mulonga uze  vavuluka muMbimbiliya, nakumbata pwevo weka, nalingi ukoji. Nge nalingi ngocho, kaha chize kulilukulula nakumbata pwevo weka vize Yesu avulukile ngwenyi ukoji, vikiko vinajihi ulo wamwaka.

Kachi nge ulo unafu mwomwo yakulilukulula nakumbata pwevo weka, kaha pwevo uze vanalukulula chakuhona mulonga vavuluka muMbimbiliya, keshi kuhasa jino kukonekela chipwe kukana uze lungako. Ngocho katela kuliyanjisa kushinganyeka vyakukonekela uze lunga chipwe kumukanako. Kaha nawa, chikungulwilo kachatela kumona ulo wauhya uze nengilamo uze lunga kupwa hiulo waukojiko numba tuhu pwevo uze vanalukulula achili wamutonyi, kaha nawa kasombokeleko, chipwe kalingile ujilako. *

Tunafumu hakushimutwila hali lunga uze nalingi ukoji nakumulingisa jino alukulule puwenyi. Jino ngachilihi nge lunga kalingile ukojiko oloze himwalukulula pwevo lyenyi nakumbata weka? Nyi ngachilihi nge lunga kalingile ujilako shimbu kanda alukulule oloze himwalinga jino ujila hanyima yakulukulula kaha himwambata pwevo weka, okunyi uze pwevo lyenyi wakulivanga ali nakufwila kumukonekela? Vihula vyosena evi vivali natuvikumbulula ngwetu, chize kulukulula nakumbata pwevo weka chikiko kulinga ukoji kaha chikiko nawa chinajihi ulo wamwaka. Kaha ulo wauhya uze nengilamo, natuumona kupwa hiulo wakutamo kweseka najishimbi jafulumende. MuKaposhi Kakutalila waChingeleshi waNovember 15, 1979 halifwo 32 vavulukaho ngwavo, “nge lunga nambate lyehi pwevo weka kaha katela kujiha ulo kana mangana ahilwise pwevo lyenyi wamwakako, mwomwo uze ulo wamwaka wafwile haze vene valilukulwile mwomwo yaukoji nakumbata nawa pwevo weka.”

Ou ulumbunwiso wauhya kawatela kulingisa vaka-Kulishitu vaputuke kumona ulo nge kawapwa wajilako chipwe vaputuke kumona ukoji kupwa himulonga waundendeko. Lunga uze mwalukulula puwenyi chakuhona mulonga vavuluka muMbimbiliya nakumbata pwevo weka okunyi kapwile wakulihehwa kulinga chuma kanako kweseka naMbimbiliya, vatela kumusopesa kuchikungulwilo hamulonga waukoji uze nalingi. (Kachi nge uze pwevo vanambate kuli uze lunga apwa muka-Kulishitu, kaha naikiye vatela kumusopesa mwomwo naikiye nalingi ukoji.) Numba tuhu ulo kana kaweshi kupwa ulo waukojiko, oloze uze lunga keshi kuhasa kutamo kuzata milimo yamuchikungulwilo hamyaka yayivuluko, kuvanga nomu navakalinga vatu vavavulu vanavulyama mulonga alingile nakuputuka kumuvumbika cheka. Vakulwane vatela nawa kutala hachiyoyelo chauze pwevo alukulwile chakuhona mulonga vavuluka muMbimbiliya nakutala nawa havana vavandende asezele.—Mala. 2:14-16.

Hakuwana nge kulukulula nakumbata pwevo weka chakuhona mulonga vavuluka muMbimbiliya cheji kunehanga ukalu waunene ngocho vaka-Kulishitu vatela kufwila kumona ulo kupwa wajila ngana muze aumona Yehova.—Kwambu. 5:4, 5; Hepe. 13:4.