Neyi chuma chamudiwu chimwekana, chipompelu chikumonaña wulu watachi nawu wunamani neyi iyala asumbula nawa chikumonaña wulu wawuha nawu hiwulu wetejewa munshimbi. Hakwila tutiyishishi chitunahosheli mwenimu, tuhanjekenu chahosheliyi Yesu hakudiseña nihakusumbula cheñi.

Kwesekeja naMatewu 19:9, Yesu washimwini chishina chamuNsona chatela kudiseñelawu antu. Wahosheli nindi: “Muntu wejima wukuseña ñodindi hakadi muloña wawuvumbi nakusumbula wacheñi, neli dehi wujila.” Kumazu aYesu, tunakudizilaku (1) netu wuvumbi dichuma hohu chashimunawu muNsona chatela kuletesha wulu kumana nikudiseña nawa (2) iyala wukuseña ñodindi chakadi muloña wamuNsona nakusumbula mumbanda wacheñi neli wujila. *

Komana mazu aYesu anatalishi mukwila nawu neyi iyala ela wuvumbi nawa aseña ñodindi dikwila nawu wasubuka kwesekeja naNsona kusumbula mumbanda wacheñi? Inehi mwani. Neyi muwulu wumu ela wujila, ona wunabuli muloña diyi watela kufuukulahu kumwanakena mukwawu hela kumukaana. Neyi amukaana nawa aya nakumanisha wulu kuchota wejima wawu akasunuka kusumbula hela kusumbuka.

Munjila yikwawu, mwinikwindi wunabuli muloña nateli kufuukulahu kuhemba wulu nawa nateli kumwanakena nfumwindi chakufuma hamuchima. Indi neyi chakwila, iyala wuneli wujila akaana hanyima yakumwanakena kudi ñodindi nawa aya kuchota chanyiloña nindi adiseñi? Chineli mumbanda wamwanakena nawa nakukeña kuhemba wulu, dikwila nawu, kwesekeja naNsona hanateli kusumbula cheñiku. Neyi adikaña nindi yena tuhu chiña asumbuli muntu wacheñi henohu dichahosha wanyi Nsona, dikwila nawu neli cheñi wujila, nawa chumichi chikuletesha chipompelu chimutuñili kometi yawunsompeshi.—1 Kor. 5:1, 2; 6:9, 10.

Neyi iyala wunabuli kusubuka kwesekeja naNsona asumbula cheñi, chipompelu chikumona ñahi wulu wakusambila niwakatataka? Kwesekeja naNsona komana wulu watachi wuchidi? Komana mwinikwindi wunabuli muloña nateli kufuukulahu kumwanakena tahindi kumukaana nfumwindi wakusambila? Komana wulu wakatataka akuwumonaña nawu wawujila?

Kunyima chipompelu chamweneña wulu wawuha nawu wawujila, chakala hohu mwinikwindi wuchidi wamumi, hasumbula hela kusumbukaku nawa welahu wanyi wuvumbi. Hela chochu, Yesu wateneni wanyi hadi muntu wakadi muloña hampinji yahosheleñayi nsañu yakudiseña nikusumbula cheñi.  Ilaña, walumbulwili nindi iyala wukuseña ñodindi hamuloña wabula kwikala wamuNsona nakusumbula wacheñi, neli wujila. Haniyi nsañu, kudiseña nikudisumbula cheñi kwateneniyi Yesu nindi kwawujila, kwamanishileña wulu wakusambila.

Neyi iyala aseña mwinikwindi nakusumbula wacheñi, ona wadiña mwinikwindi, wabula muloña hanateli cheñi kumwanakena hela kumukaanaku. Dichi, hanateli cheñi kufuukulahu kumwanakena hela kumukaanaku. Cheñi, hela chakwila ona wakadi muloña nafwi, nasumbuli hela kusumbuka cheñi hela neli wuvumbi, chumichi hichikuhimpa chinakumona chipompelu wulu wakatatakaku. *

Muchakutalilahu chitwashimuna hewulu, iyala welili wujila chaletesheli adiseñi. Indi neyi iyala welili wujila wanyi ilaña aseña mwinikwindi nakusumbula mumbanda wacheñi? Hela indi neyi iyala welili wanyi wuvumbi henohu kanda adiseñi ilaña ela wuvumbi hanyima yakudiseña nawa asumbula mumbanda wacheñi henohu mwini kwindi namwanakeni? Muniyi yakutalilahu yejima, kudiseña nikusumbula hela kusumbuka cheñi, kunashindameni hawujila, kukumanisha wulu wakusambila. Wulu wawuha wunetejewi nanshimbi wunekali dehi wulu wetejewa. Kaposhi Kakutalila kaChizungu, kaNovember 15, 1979, kahosheli nawu: “Chineli neñili dehi muwulu wawuha kwosi kuwumanisha hela kufuntila kudi mumbanda watachiku, wulu wakusambila wamanini muloña wakudiseña, wujila nikusumbula cheñi.”

Iyi ntiyishishilu yayiha hiyinatalishi mukwila nawu mukaKristu watela kutoñojoka nindi wulu hiwajilaku hela nindi wujila hinshidi chikupuku. Iyala wukuseña ñodindi hamuloña wakadi muNsona nakusumbula mumbanda wacheñi henohu wuchidi wakasika kwesekeja naNsona atela kumutuñila kometi yawunsompeshi hamuloña wawujila. (Neyi mumbanda anasumbuliyi niyena himukaKristu, niyena atela kumutuñila kometi yawunsompeshi hamuloña wawujila.) Hela chakwila wulu wawuha hiyakuwumonaña nawu wawujilaku, iyala hiyakamwinkahu kukooleka kudi kwejima muchipompelu hadi yaaka yayivuluku sampu antu analeki kuneña nayilwilu yindi yatama. Henohu akulumpi kanda amwinki nyidimu yidi yejima, atela kutoñojoka hadi ñodindi akwatililiyi makasu nianyanindi anyanya ashiyiliyi chisayikila.—Mal. 2:14-16.

Hamuloña wayuma yatama yafumaña mukudiseña nimukusumbula cheñi kwabula kushindamena haNsona, akaKristu atela kumonaña ntanjikilu yawulu nawu yajila neyi chayimonañayi Yehova yomweni.—Mukwa. 5:4, 5; Heb. 13:4.