Ijkuak non tlakatl oksepa monamiktia, tokniuan kitaj ayakmo isiua akin achto iuan omonamikti porque omokajkej inmixpan tekiuajkej uan inmixpan tekiuajkej omonamikti iuan akin axkan isiua. Para tikajsikamatiskej tleka ijkon tikijtouaj ma tikitakan tlen okijto Jesús, ijkuak ikaj mokajkaua inmixpan tekiuajkej uan oksepa monamiktia.

Itech Mateo 19:9 Jesús okijto: “Sanwel tla isiwa omomekati, weletis itlákau kikajkawas isiwa. Porke akin mosiwakajkawa iwa monamiktia iwan ok se siwatl kijtosneki san kimomekatijtok”. Tlen okijto Jesús kiteititia ome tlamantli, se, akinmej yomonamiktijkej uelis mokajkauaskej inmixpan tekiuajkej tla ikaj oauilnenki uan ome, tla ikaj kikajkaua isiua inmixpan tekiuajkej maski Biblia amo ijkon tlamachtia uan oksepa monamiktia, kijtosneki momekatia. a

¿Tlen otlamachti Jesús kijtosneki tlakatl tlen omomekati uan kikajkaua isiua inmixpan tekiuajkej oksepa uelis monamiktis? Amo. Ijkuak se tlakatl omomekati, isiua uelis kijtos kox kitlapojpoluis noso amo. Tlamo kitlapojpoluia uan mokajkauaj inmixpan tekiuajkej, uelis oksepa monamiktiskej.

Xamo siuatl tlen okikajkayajkej amo kineki kikauas inamik uan kineki kitlapojpoluis. Pero ¿tlen panos tla inamik amo kineki ma kitlapojpolui uan san ye kipejpena kikajkauas isiua inmixpan tekiuajkej? Tla siuatl kineki kitlapojpoluis para ok ma yeto inamik, Biblia techmachtia tlakatl amo uelis oksepa monamiktis. Pero tla ye kineki kikajkauas isiua inmixpan tekiuajkej maski Biblia amo ijkon tlamachtia uan monamiktia iuan okse siuatl, oksepa momekatia. Tlayekankej moneki kichiuaskej se comité judicial porque otlajtlakolchi (1 Cor. 5:1, 2; 6:9, 10).

Tla se tlakatl oksepa monamiktia pero Biblia tlamachtia amo uelis ijkon kichiuas, ¿ken kitaj tokniuan tla ijkon kichiua? ¿Kijtoua Biblia ok isiua tlen achto iuan omonamiktijka? ¿Akin okatka isiua ok uelis kijtos kitlapojpoluis noso kijtos amo? ¿Tokniuan kitaskej momekatijtok tlakatl tla oksepa monamiktia?

Hasta axkan tokniuan kajsikamatij akin oksepa monamiktia momekatijtok porque akin okatka isiua ok yoltok uan ye amo monamiktia uan amo auilnemi. Pero Jesús okijto ijkuak ikaj kikajkaua isiua inmixpan tekiuajkej uan oksepa monamiktia, amo okijto tlen kichiuaskia siuatl. Ye okiyekijto tlakatl tlen amo kichiua tlen Biblia tlamachtia uan kikajkaua isiua inmixpan tekiuajkej uan monamiktia iuan okse, kijtosneki omomekati. Tla ijkon kichiua, non kiteititia ayakmo isiua tlen achto iuan omonamikti.

 Tlakatl tlen kikajkaua isiua inmixpan tekiuajkej uan oksepa monamiktia, akin okatka isiua ayakmo uelis kijtos kox kitlapojpoluis noso amo. Maski siuatl ok yoltok, amo monamiktia noso oauilnenki, tokniuan kajsikamatij ayakmo poui iuan tlakatl tlen oksepa omonamikti inmixpan tekiuajkej. b

Yotikitakej tlakatl omomekati uan okikajka isiua inmixpan tekiuajkej. Pero ¿tlen panoua tla amo omomekati uan kikajkaua isiua inmixpan tekiuajkej uan oksepa monamiktia? Noso ¿amo auilnenki ijkuak okikajka isiua inmixpan tekiuajkej, oauilnenki satepan uan oksepa monamikti maski isiua ok okinekiaya kitlapojpoluis? Ijkuak tlakatl kikajkaua isiua inmixpan tekiuajkej uan oksepa monamiktia (kijtosneki momekatia) uan ijkon ayakmo isiua akin achto iuan omonamiktijka. Tekiuajkej san kiseliaj akin yikin iuan omonamikti. Revista Akin Tetlapouijtok 15 de febrero 1980 itech página 30 okijto tlakatl tlen oksepa monamiktia “amo uelis san kajauilmatis uan amo uelis oksepa mokopas iuan akin achto okatka isiua porque yomokajkajkej inmixpan tekiuajkej, non tlakatl omomekati uan oksepa omonamikti”.

Tlen axkan tikajsikamatij, amo kijtosneki ijkuak ikaj monamiktia amo moneki kitlakaitas akin iuan omonamikti uan amo kijtosneki amo tlajtlakoli tla momekatia. Tla se tlakatl amo kichiua tlen Biblia tlamachtia uan kikajkaua isiua inmixpan tekiuajkej uan oksepa monamiktia, tlayekankej moneki kichiuaskej se comité judicial porque omomekati (tla monamiktia iuan se siuatl tlen iTlaixpantijka Jehová, noijki moneki kichiuiliskej se comité judicial porque ye noijki omomekati). Maski yomonamiktijkej uan ijkon ayakmo momekatijtokej, amo okitlakamatkej tlen kijtoua Biblia. Tokniuan amo san niman kiluiskej non tlakatl ma tlapaleui kanin monechikoua hasta ijkuak oksekimej ayakmo kilnamikiskej tlen okichi. Noijki moneki kitaskej ken kajki siuatl porque xamo sapanoua otlajyoui ijkuak okikajkaya uan noijki moneki kitaskej ken katej ikoneuan tla ok tsikitsitsintin okinkajte (Mal. 2:14-16).

Yotikitakej tlen uelis panos ijkuak se tlakatl kikajkaua isiua inmixpan tekiuajkej uan oksepa monamiktia, maski Biblia amo ijkon tlamachtia. Jehová kipatioita ijkuak ikaj monamiktia uan tejuan noijki moneki ijkon tikchiuaskej (Ecl. 5:4, 5; Heb. 13:4).