Pa mugariro uwu, ungano inodikana kuvona mucadho wokutanga inga kuti wapera no kuvona mucadho wocipiri kuva wecitendehwa. Kuti tinase kuzwisisa izvi, ngatende tivone zvakananga Jesu ngo pamusoro po kurambana no kucadhazve no mundhu umweni.

Pana Mateu 19:9, Jesu wakananga thangwe rimwe rinoita kuti vakacadha varambane. Iyena wakati: “Ariwese anoramba mukaji wake kuciripi ngo ndava yo uhure, wocadhazve no umweni, anoita upombo.” Kuvha pa magama aya a Jesu tinojija kuti (1) Bhaibheri rinotendera kuti vandhu vaviri varambane kudari umwe wavo akaita uhure (2) mwanarume anorambana no mukaji wake pacina thangwe rakacijikira mu Bhaibheri wocadha no umweni anoita upombo. *

Magama aya a Jesu anoreva kuti mwanarume akaita uhure worambana no mukaji wake kureva kuti wakasujunuka kuti acadhe no mundhu umweni mukuzwirana no zvinonanga Bhaibheri? Haiwa andizvopi. Kudari mwamuna vakaita upombo, mukaji wake angatema civaringo co kuda kuregerera kana kuti haiwa. Kudari iyena akatama kumuregerera vokugumira pakurambana, vovaviri vanonga vakasujunuka kuti vacadhezve, kudari vakapera kurambana kamare zvopamutemo.

Asi zvingaita kuti mukaji wake anoda kwenderera mberi vari vese no kumuvhunja kuti wamuregerera. Waro kudari mwamunevo, vakaramba kuregerehwa vogumira pakurambana keni? Zvecivoneka kuti mukajiwo waida kumuregerera no kwenderera mberi vari vese, mwamunevo vanonga vacizivi kusujunuka kuti vacadhezve no umweni mukuzwirana no zvinonanga Bhaibheri. Kudari mwamunevo vakatema civaringo cokuda kucadha no umweni pikija vacizivi kusujunuka kuti vaite izvo, vanonga vaciitazve upombo basi. Pa mugariro uwu vakuru vo ungano vanodikana kuumba dare rimweni rokutonga kuti vatonge shwiro iyi.—1 Vakorinte 5:1, 2; 6:9, 10.

Waro kudari mwanarume akacadha no mwanakaji umweni kuveni aazivi kusujunuka mukuzwirana no zvinonanga Bhaibheri, ungano inodikana kuvona kudini mucadho wokutanga no wocipiri? Kunanga kuti mucadho wokutanga unonga wecitendehwa mukuzwirana no zvinonanga Bhaibheri? Mukaji wake anonga acino mukana wokuregerera kana wokuramba mwamuna wake? Kureva kuti ungano inodikana kuvona mucadho wocipiri inga mucadho wo upombo?

Kare taizwisisa kuti kudari mukaji acina ndava, ari penye, aazivi kucadha no kutama kuita uhure, mucadho wo cipiri wiya waivoniwa inga mucadho wo upombo. Asi Jesu aazivi kubhuya ngo pamusoro po mukaji acina ndava paakananga ngo kurambana no kucadhazve nga papsa. Kusiyapo zvondhozvo, iyena wakananga kuti mwanarume anorambana no mukaji wake pacina thangwe rinonangwa ngo Bhaibheri wocadha no umweni anoita upombo. Ngo kudaro, kurambana perapo wocadha no umweni zvinopeja mucadho wokutanga wiya.

 Mwanarume paanorambana no mukaji wake wocadha no mwanakaji umweni, azvicakwanisiki kuti mukaji wokutanga wiya acinaya ndava amuregerere kana kutomuramba. Ngo kudaro, iyena aadikani kukaya-kaya ecirangarira dangani anodikana kumuregerera kana kutomuramba. Kusiyapo zvondhozvo, manera inovona ungano mucadho wocipiri uwu, azvifiri pa kuti mukaji wokutanga wiya wafa, wacadha no umweni kana waita uhure. *

Pa muezaniso wotavonaya pakutanga, mwamuna vakaita upombo vorambana no mukaji wake. Ngozvapi zvaizoitika kudari mwamuna akatama kuita upombo, asi worambana no mukaji wake no kucadha no mwanakaji umweni? Tingati kudini kudari mwamuna avazivi kuita uhure vacito varambana asi vakazouita pavakapera kurambana vogumira pakucadha no mwanakaji umweni pikija kuti mukaji wokutanga wainga avaregerera? Pa mugariro jese janangwari, kurambana perapo kakucadha no mundhu umweni zvinovoniwa inga kuita upombo zvoita kuti mucadho wokutanga upere. Mucadho wocipiri uwu unonga wecitendehwa basi ngo mutemo. Murindiri wa 15 ya Novembro wo 1980, pheji 32 mu Ciputukezi, wakasanangura shwiro iyi, kudari: “Iyena wari wacadha no mundhu umweni ngo iyo ndava azvikwanisiki kusiya mundhuwo wohwirira ku mucadho wake wokutanga, ngokuti mucadho wokutanga wakapera ngo kurambana, upombo waakaitaya wakapera ngo ndava yo mucadho wocipiri waakaitaya.”

Kucinjwa uku ko zwisiso yedu akurevi kuti Mukristu anodikana kusiya kuvona mucadho inga ciro cinosisira kana kutovona upombo inga cishaishi cicikazivi kukura. Mwanarume warambana no mukaji wake pacina thangwe rinonangwa ngo Bhaibheri wocadha no umweni acizivi kusujunuka kuti aite izvo, vakuru vanodikana kuumba dare rokutonga kuti vatonge shwiro iyi. (Kudari mukaji umweniwo i Mukristu, anodikanavo kutongwa ngo dare ro kutonga ngokuti anonga aitavo upombo.) Mucadho uwu audikani kuvoniwa inga mucadho wo upombo. Ngo kudaro, mwanarume uwu aazogajwi mabasa anosisira mu ungano ko makore akawanda mbhera hama jikwanisezve kumureremeja. Vacito vamugaja basa riri rese mu ungano, vakuru vanodikana kusotesesa mugariro wo mukaji wake wokutanga no wo vana vaakasiyaya.—Malakia 2:14-16.

Zvecivoneka kuti kurambana no kucadha nga papsa pacina thwangwe rakacijikira mu Bhaibheri kuno muviyo jakasiyana-siyana, Makristu anodikana kungwara no kutevejera Jehovha ngo kuvona mucadho kuva wakacena.—Mucumaeri 5:3, 4; Vahebheru 13:4.