Makoho a Alipa Waalakhanya
Wakhala wi Mukristu oomwalana ni mwaariye naari iyawe ohirivo mathipelo a Mpiipiliyani nave athelana ni muchu mukina, ti mwawiihai muloko onaphwanelaaya woonaka othela wakhalai ni wa hiihaano?
Mmukhalelo yoola, muloko onaphwanela woonaka wi othela wakhalai woomala nave wi wahiihaano torivovo. Wi niiwexexe phaama yeela, hankooni nthokororye yeeyo Yesu olonceiye vooloca sa omwalana ni othela wanaawiili.
Mu Mateu 19:9, Yesu oothariha nthowa nimoharu naweemereryeya na omaliha othela. Owo ooloca: “Yoole onamwalana ni mwaariye, voohikhala nthowa na mararuwo, amuthela mukina, yoowo onamuraruwa.” Mwa yeeyo, nnahuserya wi (1) mararuwo mathipelo mamoharu a Mpiipiliyani a omwalana nave (2) mulopwana yoowo onamwalana ni mwaariye ohirivo mathipelo a Mpiipiliyani nave amuthela mukina onapaka mararuwo. *
Apwanne masu a Yesu anataphulela wi mulopwana yoowo opanke mararuwo nave amwalana ni mwaariye mwawiiwanana ni Piipiliya ori ootaphuwa othela wanaawiili? Hooye. Wakhala wi mulopwana oopaka mararuwo, muthiyana ohichenke onanwerya olakelela waakhanle wi onahaala omukhurumuwela iyawe naari hooye. Wakhala wi owo oolakelela ohimukhurumuwela ni emwalana, oopiili eri ootaphuwa othela naari otheliwa wanaawiili, wakhala wi marehereryo a omwalana aakwaaxeya.
Nyenya ti wooweryeya wa mwaariye ohichenke ochuna otitelela okhala ni iyawe ni omuleela wi ori ooreheryeya omukhurumuwela. Hanka wakhala wi iyawe heemerenrye nave emwalana? Woona wi mwaariye aari ooreheryeya omukhurumuwela ni otitelela okhala ni yoowo, mwawiiwanana ni Piipiliya owo hari ootaphuwa wi athele wanaawiili. Wakhala wi oolakelela omuthela muchu mukina, naamwi ahiri ootaphuwa wi eereno yeeyo, owo onapaka mararuwo wanaawiili. Mmukhalelo yoowo atokweene a muloko anahaala opaka wanaawiili nikhuuru na othoriha wi erehererye mwaha yoola.—1 Kor. 5:1, 2; 6:9, 10.
Vano hanka wakhala wi mulopwana oothela wanaawiili moohiiwanana ni Piipiliya, ti mwawiihai muloko onahaalaaya woonaka othela wakhalai ni ovyaani? Apwanne othela wakhalai wookhalavo nlelo mwawiiwanana ni Piipiliya? Apwanne muthiyana ohichenke nlelo onanwerya omukhurumuwela naari omukhooca iyawe? Apwanne muloko onaphwanela woonaka othela ovyaani ntoko mararuwo?
Khalai niiwexexa wi wakhala wi muthiyana ohichenke nlelo mukumi, hatheliwe nave haano nthowa na opaka mararuwo, othela ovyaani wooniwa ntoko mararuwo. Nyenya Yesu haalonce sa muthiyana ohichenke vaavaa aalonceiye sa omwalana ni othela wanaawiili. Ohiya yeeyo, owo olonce wi mulopwana yoowo onamwalana ni mwaariye ohirivo mathipelo a Mpiipiliyani nave amuthela mukina onapaka mararuwo. Mmukhalelo yoola, omwalana ni othela ovyaani, onnamaliha othela wakhalai.
“Yoole onamwalana ni mwaariye, voohikhala nthowa na mararuwo, amuthela mukina, yoowo onamuraruwa.”—Mat. 19:9
Vaavaa mulopwana onamwalaneiye ni mwaariye nave athela wanaawiili, tahi wooweryeya wa mwaariye akhalai yoole ohichenke omukhurumuwela naari omukhooca. Mwawiihiiha, owo hanaphwanela wuukhuwaka waakhanle wi onahaala omukhurumuwela naari omukhooca iyawe. Mwawaaceererya, moohipwacha waakhanle wi muthiyana ohichenke ookhwa, ootheliwa wanaawiili naari oopaka mararuwo, eyo henatoroka mukhalelo muloko onoonaaya othela ovyaani. *
Mu yootakiherya nthokoronryaahu woopaceryani, mulopwana aapaka mararuwo nave othela omala. Nyenya hanka wakhala wi mulopwana hapanke mararuwo naamwi hiiha amwalana ni mwaariye nave amuthela mukina? Naari wakhala wi mulopwana hapanke mararuwo ehaakumve omwalana nyenya eerano yeeyo emanle omwalana nave vookuchula amuthela muthiyana mukina, naamwi mwaariye oopacerya aamukhurumuwenle? Mmikhalelo soothene seiha, omwalana ni othela wanaawiili onooniwa ntoko mararuwo nave mwawiihiiha onnamaliha othela wakhalai. Othela ovyaani onahaala okhalavo mwawiiwanana ni malamulo. Mulipeleli a 1 a Fevereru a 1980, epaaxina 32 aathariha mwaha yoola mmukhalelo ola: “Owo vano ohiivoliiherya mu othela ovyaani, mwawiihiiha hanaphwanela omaliha mwawaakuveya nave akookelane ni mwaariye akhalai; othela wakhalai woomala nthowa na omwalana, mararuwo ni othela wanaawiili.”
Matorokelo yaala mu wiiwexexa wahu hanataphulela wi Mukristu onaphwanela ohiya woona othela ntoko waweela, naari wi mararuwo tahi yoocheka etokweene. Wakhala wi mulopwana oomwalana ni mwaariye ehirivo mathipelo a Mpiipiliyani nave athela wanaawiili ahirino otaphuwa wa weerano yeeyo, atokweene anaphwanela opaka nikhuuru na othoriha wi erehererye mwaha yoola wa mararuwo. (Wakhala wi muthiyana muvyaani Mukristu, owo tho onaphwanela opakeliwa nikhuuru na othoriha, woona wi oopaka mararuwo.) Naamwi othela ovyaani ohiphwanelaka wooniwa ntoko mararuwo, mweeparipari owo hori mwawiiwanana ni malamulo a Muluku vooloca sa othela. Nthowa na yeela, munna owo hanaphwanela ophwanelela mirici savameekhaaya mmulokoni mu iyaakha sincipale ophiyerya anna a mmulokoni epacenrye omucicimiha wanaawiili. Ahaakumve waakhela murici vyakala, atokweene anaphwanela woona mikhalelo sa mwaariye akhalai nave tho sa anamwane yaawo akhweya yaahiiwe ni mulopwana ole oohiroromeleya.—Malak. 2:14-16.
Yuupuwelelaka sa sookhumelela soowaawa sa omwalana ni othela ovyaani ohirino mathipelo a Mpiipiliyani, Akristu anaphwanela okhala a miruku ni omutakiherya Yehova moorweela wa woonaka othela okhala waweela.—Ekle. 5:4, 5; Ahe. 13:4.
^ par. 2 Mookwasa, mmwaha yoola, nnahaala oloca wi mulopwana topanke mararuwo nave wi muthiyana hachenke. Nyenya masu nnaphwanyaahu mu Marko 10:11, 12, ennahiya mookwakwaleya wi masu enaphwanyeya mu Mateu 19:9 ennaphariheleya tho wa alopwana ni athiyana.
^ par. 1 Ala matorokelo a wiiwexexa wahu wakhalai wawi othela ovyaani waaphwanela wooniwaka ntoko mararuwo ophiyerya muthiyana ohichenke atheliwe wanaawiili, apanke mararuwo naari akhwile.
