Linga isi sibombiwe, abakamu na balumbu babaghile ukubuketa ubweghi ubwapakwanda ukuti bumalike linga unnyambala eghile kangi, loli ubweghi ubupya babaghile ukubuketa ukuti bwakwitikisiwa. Ukuti tupilikisye kanunu, isagha tuyobesanie isi Yesu ayobile isyakufwana nu kumasya ubweghi nu kweghiwa pamo ukwegha kangi.

Pa Matai 19:9, Yesu alingenie ikifukwa kimokyene itolo ikya M’malemba ikyakumasyila ubweghi. Umwene atile: “Wesa uyu linga ikulekana nu nkasi, bo akatulapo inongwa ya bunyali, ende nu kwegha uyungi, bo aloghilwe.” Ukufwana na masyu gha Yesu, tukumanyilako ukuti (1) ubulowe kyo kifukwa kyene kya M’malemba iki ubweghi bubaghile ukumalika (2) kangi unnyambala uyu amasisye ubweghi nu nkasi wake kisita kifukwa kya M’malemba nu kwegha uyungi kokuti abombile ubulowe. *

Ngimba amasyu gha Yesu ghasanusyagha ukuti unnyambala uyu abombile ubulowe nu kumasya ubweghi nu nkasi kisita fundo sya M’malemba mwabuke ukwegha kangi? Hayi. Linga yumo abombile ubulowe mbweghi, uyu akabomba ubulowe ikusala ukunhobokela umwinake pamo hayi. Linga asalile ukuleka ukunhobokela kangi amasisye ubweghi mwakukonga indaghilo sya boma aliwesa ali nubwabuke ubwakwegha pamo ukweghiwa kangi.

Kangi uyu akonanga abaghile ukuya nubwighane ubwakufighilila ubweghi nu kulonda ukunhobokela umwinake uwambweghi. Loli bule linga umwinake uwambweghi akanile ukunhobokela kangi asalile ukundeka? Panongwa yakuti umwene ikulonda ukunhobokela nu kukindilila ukuya pabweghi, umwene akabaghila ukuya mwabuke ukwegha kangi. Linga umwene eghile pamo eghiwe nu mundu uyungi ko kuti abombile kangi ubulowe isi sibaghile ukupangisya ukuti aghane ni komiti ya bulongi.​—1 Kor. 5:1, 2; 6:9, 10.

Umundu uyu akaya mwabuke ukwegha kangi mwakufwana ni fundo sya M’malemba, ngimba abakamu na balumbu bikubuketa bulebule ubweghi bwake ubwakwanda nu bupya? Ngimba ubweghi bwake ubwakwanda bukukindilila ukuya bwakulondiwa mwakufwana ni fundo sya M’malemba? Ngimba umundu uwambweghi uyu akonanga abaghile ukunhobokela pamo ukunkana unnine uyu alyeghene nawe pakwanda? Ngimba abakamu na balumbu babaghile ukubuketa ubweghi ubupya ukuya bwakwitikisiwa?

Nkabalilo kakunyuma, abakamu na balumbu babuketagha ubweghi ubupya ukuti bukaya bwakwitikisiwa pakabalilo kosa aka uyu akonanga ali nu bumi, akeghiwa pamo akegha kangi akabombile ubulowe. Loli Yesu akayobilepo isya mundu uyu akabomba ubulowe bo ikuyoba isya kumasya ubweghi nu kwegha kangi. M’malo mwake, alingenie isya nnyambala uyu andekile  unkasi wake kisita kifukwa kya M’malemba nu kwegha uyungi ukuti abombile ubulowe. Linga mo siyilile, inkhani yakumasya ubweghi nu kwegha kangi iyi Yesu ayobile ukuti sifwene itolo nukuti abombile ubulowe, abaghile ukumasya ubweghi bwake ubwakwanda.

Linga umundu amasisye ubweghi nukwegha pamo ukweghiwa kangi, uyu akonanga ali nubwabuke ubwakunhobokela pamo hayi. Yonongwa yake uyu akonanga atikulondiwa ukutamiwa naminong’ono ukuti anhobokele unnine pamo hayi. Kangi muno abakamu na balumbu bikuketela ubweghi ubupya sitikumpalamasya uyu akonanga linga afwile, eghile kangi pamo abombile ubulowe. *

Ukufwana na isi tuyobile pamwanya umundu uyu abombile ubulowe ikupangisya ukuti ubweghi bumalike. Ngimba findu fiki fibaghile ukubombiwa linga umundu uyu akabomba ubulowe amasisye ubweghi nukwegha kangi? Pamo bule linga umundu akabomba ubulowe bo ubweghi bukamalika loli abombile isi bo ubweghi bumalike ukufuma apo eghile pamo eghiwe kangi nalinga ukuti unnine alondagha ukunhobokela? Mfyakubombiwa fyosa ifi, linga umundu amasisye ubweghi nukwegha kangi panongwa yabulowe, abaghile ukumasya ubweghi ubwakwanda. Ubweghi ubupya bukwitikisiwa ni ndaghilo sya boma. Ingasya ya Ndindilili iya Kizungu iya Novembala 15, 1979, , peji 32, yalingenie ukuti: “Lino ingile mbweghi ubupya kangi bukabaghila ukumalika nukughomokela ku ndume pamo ku nkasi wake uyu ubweghi bwamalike panongwa yakuti amasisye ubweghi, abombile ubulowe nukwegha kangi.”

Ukuchenja muno twapilikisyilagha pakwanda kutikusanusya ukuti Abakristu binong’oneghe ukuti ubweghi kikaya kyabupe pamo ukuti ubulowe bukaya butulanongwa bunywamu. Unnyambala uyu amasisye ubweghi nu nkasi wake kisita kukonga ifundo sya M’malemba nu kwegha unkikulu uyungi umwene ikulondiwa ukwaghana ni komiti yabulongi panongwa yakuti abombile ubulowe. (Linga uyu eghene nawe mwalululu Nkristu, yope ikulondiwa ukwaghana ni komiti yabulongi.) Nalinga ukuti ubweghi ubupya bukuya pakubonekagha ukuti bwakwitikisiwa, unnyambala atikuya pakuya nulusako ulwakuya nububombeli nkipanga kwa fyinja fingi bo abandu bamo balekile ukukalala panongwa ya mbibi isi abombile kunyuma pamo balekile ukwinong’onela isi abombile. Bo bakali ukumpa ulusako ulwa bubombeli nkipanga, abakulumba bikulondiwa ukwinong’onela muno ifindu fiyilile nu mundu uwakwanda uyu alyeghene nawe na muno ifindu fiyilile na bana aba abalekile.​—Mal. 2:14-16.

Mwakwinong’onela ifyakukongapo ifi fikuyapo panongwa yakumasya ubweghi nukwegha kangi kisita fifukwa fya M’malemba, Abakristu bikunkonga Yehova nukuketa ubweghi ukuya kyabupe kyakulondiwa fiyo.​—Ndumbi. 5:4, 5; Hib. 13:4.