Diad ontan ya situasyon, ipasen na kongregasyon ya apultot la so datin impangasawa to no angasawa na sananey tan ipasen ya legal so balon impangasawa to. Akin et ontan so konklusyon tayo? Imanoen tayoy imbaga nen Jesus tungkol ed diborsyo tan pangasawa lamet.

Diad Mateo 19:9, binitla nen Jesus so saksakey a basiyan ya nayarin napultot so relasyon na sanasawa. Kuan to: “Siopaman a lakin mangidiborsyo ed asawa to, ya aliwan makasengeg ed seksual ya imoralidad, insan mangasawa na sananey et mankasalanan na pikakalugoran.” Natalosan tayo ed sayan imbaga nen Jesus ya (1) say seksual ya imoralidad labat so Makasulatan ya basiyan ya nayarin mandiborsyo so sanasawa tan (2) say lakin idiborsyo toy asawa to anta anggapoy Makasulatan ya basiyan tan mangasawa na sananey et mankasalanan na pikakalugoran. *

Kasin diad sayan imbaga nen Jesus et automatiko la ya bulos lan mangasawa unong ed Kasulatan so sakey a lakin akagawa na seksual ya imoralidad tan indiborsyo toy asawa to? Andi met. Ta anggano akikalugoran so asawan laki, say andiay kasalanan ya asawan bii so mandesisyon no kasin perdonaen toy asawa to odino andi la. No agla perdonaen na asawan bii tan mandiborsyo ira, bulos la ran dua ya mangasawa lamet no asumpal lay legal ya proseso na diborsyo.

Diad arum ya situasyon, ompan labay na andiay kasalanan ya asawan bii ya perdonaen so asawa to tan agmisian ed sikato. Panon to balet no aglabay na akikalugoran ya asawan laki so mipawilan tan say labay to et mandiborsyo la ra? Say asawan laki et aliwan bulos ya mangasawa lamet unong ed Kasulatan lapud aglabay na asawan bii so misian ed sikato tan labay ton perdonaen. Pero no ipilit na asawan laki so mangasawa lamet anta aliwan bulos unong ed Kasulatan, sikatoy mankasalanan lamet na pikakalugoran tan kaukolan ya asikasoen lamet na judicial committee.—1 Cor. 5:1, 2; 6:9, 10.

No mangasawa lamet so sakey a laki anta aliwan bulos unong ed Kasulatan, antoy pangipasen na kongregasyon ed datin impangasawa to tan ed balon impangasawa to? Base ed prinsipyo na Biblia, kasin agni apultot so relasyon to ed datin asawa to? Sarag ni kasi na andiay kasalanan ya asawan bii so mandesisyon ya perdonaen so asawa to? Kasin say impangasawa to lamet et tuloytuloy ya ipasen na kongregasyon bilang pikakalugoran?

Dati et ipapasen na kongregasyon ya pikakalugoran itan anggad say andiay kasalanan ya asawa et mabilay ni, agni akiasawa lamet, tan ag-akagawa na seksual ya imoralidad. Balet imanoen ya nen imbaga nen Jesus imay nipaakar ed diborsyo tan pangasawa lamet, agto binitla imay andiay kasalanan ya asawa. Imbes, imbaga to ya no say sakey ya laki et indiborsyo toy asawa to anta  anggapoy Makasulatan ya basiyan insan mangasawa na sananey, sikatoy mankasalanan na pikakalugoran. Kanian diad ontan ya situasyon, no say laki et indiborsyo toy asawa to tan angasawa na sananey, ya unong ed si Jesus et pikakalugoran, apultot la so relasyon to ed datin asawa to.

No say sakey a laki et indiborsyo toy asawa to tan angasawa na sananey, agla posible ya sikatoy perdonaen ni na datin asawa to. Lapud anggapo lay nagawaan na andiay kasalanan ya asawan bii, agto la itan pakakonsiensiaan. Sakey ni, ipasen na kongregasyon ya legal imay balon impangasawa anggano say andiay kasalanan ya asawan bii et agni inatey, agni akiasawa lamet, odino ag-akagaway seksual ya imoralidad. *

Diad apantongtongan tayon alimbawa, say asawan laki et akagaway pikakalugoran tan nanresulta ed impandiborsyo. Pero panon to no say asawan laki et ag-akagaway pikakalugoran balet indiborsyo toy asawa to tan angasawa na sananey? Odino panon to no say asawan laki et ag-akagaway seksual ya imoralidad antis na diborsyo, balet ginawa to itan kayari na diborsyo, insan angasawa lamet anggano labay ya perdonaen na andiay kasalanan ya asawa to? Diad saratan ya situasyon, say impidiborsyo tan impangasawa lamet na asawan laki (ya satan et pikakalugoran) so rason no akin ya apultot la so relasyon tod datin asawa to. Ipasen ya legal so relasyon to ed balon asawa to. Oniay ibabaga na Nobyembre 15, 1979 ya isyu na The Watchtower, pahina 32: “Lapud wala lay balon asawa to, agnayari ya basta to labat pultoten itan insan to pawilen so datin asawa to. Apultot lay relasyon tod datin asawa to lapud akidiborsyo, akikalugoran, tan angasawa lamet.”

Aglabay ya ibaga na sayan impanguman na pakatalos tayo ya agtayo la ipapasen ya sagrado so panangasawa odino leleglemewen tayo lay inkaseryoso na pikakalugoran. No say sakey ya laki et indiborsyo toy asawa to anta anggapoy Makasulatan ya basiyan insan angasawa na sananey anta agmet bulos unong ed Kasulatan, sikatoy akikalugoran kanian kaukolan ya asikasoen na judicial committee. (No say inasawa to et sakey met a Tasi, nankasalanan met na pikakalugoran tan kaukolan ya asikasoen na judicial committee.) Anggano aga tuloytuloy ya ipasen na kongregasyon ya pikakalugoran so impangasawa to lamet, sikatoy ag-onkualipika parad espisyal iran pribilehyo ed kongregasyon ed loob na dakel ya taon, tan anggad wala ni ray makaamta ed ginawa to tan panlalapuan itan na kabalawan. Say sakey nin ikonsidera et say peles ya kipapasen na datin asawa to (ya nayarin ginagala ton niloko pian naidiborsyo to) tan say situasyon na saray menor-de-edad ya ananak da ya pinaulyanan to.—Mal. 2:14-16.

On, talagan seryoso so epekto na aga Makasulatan ya pandiborsyo tan pangasawa lamet. Kanian maabig no aligen na saray Kristiano so panmoria nen Jehova—ipasen tayon sagrado so panangasawa.—Ecl. 5:4, 5; Heb. 13:4.