▪ Den un kaso asina, pa e kongregashon, e matrimonio anterior a kaba i esun nobo ta esun bálido. Pa komprondé esei mas mihó laga nos wak kiko Hesus a bisa tokante divorsio i kasa di nobo.

Na Mateo 19:9, Hesus a duna e úniko motibu bálido pa terminá un matrimonio. El a bisa: “Ken ku divorsiá di su esposa i kasa ku un otro muhé—si no ta pa motibu ku e esposa a kometé fornikashon—ta kometé adulterio.” For di loke Hesus a bisa, nos ta siña ku (1) fornikashon, esta, inmoralidat seksual ta e úniko base bíbliko pa divorsiá anto (2) si un hòmber divorsiá sin e base bíbliko ei i kasa ku un otro hende, e ta kometé adulterio. *

Akaso Hesus tabata ke men ku ora un hòmber kometé inmoralidat seksual i divorsiá, ku e ta bíblikamente liber pa kasa di nobo? No nesesariamente. Den kaso di adulterio, e esposa inosente ta disidí si e ta bai keda kasá òf nò. Si e esposa disidí ku e ke divorsio i tur e trámitenan di divorsio keda kla, nan tur dos lo ta liber pa kasa atrobe.

Di otro banda, e esposa inosente kisas ke keda kasá ku su esposo i e ta bis’é ku e ta dispuesto pa pordon’é. Kiko lo pasa si e esposo, kende a kometé adulterio, ke divorsio anto riba su mes e ta entregá e petishon pa divorsio i ta haña e divorsio tambe? Debí ku su esposa tabata dispuesto pa pordon’é i keda kasá kuné, bíblikamente lo e no ta liber pa kasa di nobo. Si tòg e disidí di kasa atrobe, e ta bolbe kometé adulterio. E ora ei, e ansianonan di e kongregashon lo tin ku forma un komité hudisial atrobe pa trata su mal echo.—1 Kor. 5:1, 2; 6:9, 10.

Pues, ora un hòmber kasa atrobe sin base bíbliko, kon e kongregashon tin ku mira e matrimonio anterior i esun nobo? Segun Beibel, e matrimonio anterior ta bálido ainda? E esposa inosente te ainda por disidí si e ta bai pordoná su eks kasá òf divorsi’é? E kongregashon lo mira e matrimonio nobo komo adúltero?

Te ku aworakí, pa e kongregashon, miéntras e esposa inosente ta na bida, no a kasa òf no a kometé inmoralidat seksual, e matrimonio nobo ta adúltero. Pero Hesus no a menshoná e esposa inosente ora el a papia tokante divorsio i di kasa di nobo. Eigenlijk, loke e tabata splika ta ku un hòmber ku divorsiá sin base bíbliko i kasa atrobe ta kometé adulterio. Den e kaso ei, e divorsio i e matrimonio nobo ta anulá e matrimonio anterior.

Unabes ku e matrimonio a kaba ku divorsio i e hòmber kasa di nobo, no ta den e  eks esposa, esta esun inosente, su man mas pa pordoná òf divorsiá. Pues, e eks esposa lo no tin ku preokupá mas ku e desishon difísil ei. Ademas, e manera ku e kongregashon ta mira e matrimonio nobo no ta mará mas na e echo ku e esposa inosente ta bibu, a kasa di nobo òf a kometé inmoralidat seksual. *

Den e ehèmpel ku nos a usa ariba, e esposo a kometé adulterio i esei a hiba na divorsio. Awor, kiko si e esposo no a kometé adulterio pero el a buska divorsio i a kasa di nobo? Òf, kiko si e esposo no a kometé inmoralidat seksual promé ku e divorsio pero despues sí, i djei a kasa di nobo aunke su eks esposa tabata dispuesto pa pordon’é? Den tur e ehèmpelnan ei, e echo ku e hòmber a divorsiá i kasa di nobo, lokual ta ser konsiderá un akto di adulterio, ta kibra e matrimonio anterior. E matrimonio nobo ei, a base di lei, ta bálido. La Atalaya di 15 di febrüari 1980, página 30, a bisa ku “unabes ku e hòmber a kasa di nobo, e no por kibra e matrimonio ei i kasa bèk ku su eks esposa; e matrimonio anterior a kaba debí na e divorsio, e adulterio i pasobra el a bolbe kasa.”

E komprondementu nobo akí no ta nifiká ku matrimonio no ta sagrado ni ku adulterio no ta un piká dje serio ei. Ora un ruman hòmber divorsiá sin motibu bíbliko i djei kasa ku un otro hende sin ta liber pa hasi esei, e ansianonan lo forma un komité hudisial pa trata e kaso di adulterio. (Si e kasá nobo ta un Testigu di Yehova, tambe e ansianonan lo tin ku forma un komité hudisial pasobra e tambe ta kulpabel di adulterio.) Aunke lo no mira e matrimonio nobo komo adúltero, e hòmber lo no kualifiká pa privilegionan spesial den e kongregashon pa hopi aña i sigur no te ora ku e rumannan den e kongregashon kuminsá respet’é atrobe. Tambe lo tin ku tene kuenta ku e situashon di e eks esposa, ku ta víktima di su traishon, i di kualke yu menor di edat ku el a bandoná.—Mal. 2:14-16.

Mirando kon serio e konsekuensianan ta di divorsiá òf kasa di nobo sin base bíbliko, lo ta bon pa kristiannan imitá Yehova i mira matrimonio komo algu sagrado.—Ekl. 5:4, 5; Heb. 13:4.