Ande iech situația sar cadaia, i congregația va dichela i căsătoria de mai anglal că phandadea-pe cana o murș lea pesche aver rromni hai va dichela i nevi căsătoria sar phangli oficialo. Caște hachiaras mai mișto sostar arăslea-pe ca cadai concluzia, te dichas so phendea o Isus anda o divorțo hai i recăsătorirea.

Ando Matei 19:9, o Isus sicadea savo si o corcoro motivo biblico caște phandadiol-pe iech căsătoria. Vo phendea: „Codo cai mechel-pe pesca rromniatar anda aver buchi sar i imoralitatea sexualo hai lel pesche aver rromni cherel-pe doșalo anda adultero”. Anda so phendea o Isus, hachiaras că: 1) i imoralitatea sexualo si o corcoro motivo biblico prin savo șiol-pe șăro iecha căsătoriache prin o divorțo hai 2) iech murș cai mechel pesca rromnia bi te avel-les cado motivo biblico hai lel pesche aver rromni cherel adultero. a

Camlea o Isus te phenel că iech murș cai cherel imoralitatea sexualo hai mechel-pe pesca rromniatar silo libero pala i Biblia te lel pesche avera rromnia? Na neapărat. Cana arăsăl te cherel-pe adultero, o partenero nedoșalo daștil te alosarel te iertil codoles doșalo sau nici. Cana alosarel te na iertil-les hai mechen-pe, le dui sile liberi te recăsătorin-pe pala so phandadiol-pe i procedura anda o divorțo.

Tha daștil-pe că i rromni, cai sili nedoșali, camel anda sea o ilo te așen mai dur ande iech than hai phenel pesche rromesche că camel te iertil-les. So întâmplol-pe cana laco rrom ci camel te încărel conto catar cadai buchi hai divorțil? Anda codoia că voi camel te iertil-les hai te așen mai dur ande iech than, vo ci silo libero pala i Biblia te lel pesche aver rromni. Dacă o rrom ci silo excluso, tha uștarel mai dur le principii biblico hai lel pesche aver rromni, chiar cana ci silo libero pala i Biblia, vo cherel pale adultero. Ande cadai situația, lesco phiraimos va îngărela pale ca iech comiteto judiciaro. (1 Cor. 5:1, 2; 6:9, 10)

Cana iech murș lel pesche iech aver rromni, chiar cana ci silo libero pala i Biblia, sar va dichela i congregația i căsătoria cai sas-les mai anglal hai i nevi căsătoria? Pala i Biblia, si i căsătoria cai sas-les mai anglal încă valabilo? Mai daștil te alosarel o partenero nedoșalo te iertil-les sau nici? Sili dichli sar adultero i nevi căsătoria?

Acana chichiva timpo, i congregația dichelas sar adultero i căsătoria nevi chichi timpo o partenero nedoșalo sas-lo andi viața, ci căsătorilas-pe pale hai ci cherelas-pe doșalo anda imoralitatea sexualo. Tha, cana dea duma anda o divorțo hai i recăsătorirea, o Isus ci dea duma anda o partenero nedoșalo, hai phendea claro că iech murș cai mechel pesca rromnia bi te avel-les iech motivo biblico hai lel pesche aver rromni cherel adultero. Ande cadai situația, o divorțo hai o fapto că lea pesche aver rromni – cai si sar o adultero,  cadea sar phendea o Isus – șiol șăro la căsătoriache cai sas-les mai anglal.

Cana iech căsătoria phandadiol-pe prin o divorțo hai i recăsătorirea, o partenero nedoșalo ci mai daștil te alosarel dacă iertil sau nici codoles cai lea pesche aver varecas. Cadea că, i rromni ci trebul te cherel o pharo alosarimos te iertil sau nici le rromes cai sas-la. Mai but, o modo sar dichel i congregația i nevi căsătoria ci va încărela catar o fapto dacă o partenero nedoșalo lel pesche aver varecas, cherel-pe doșalo anda imoralitatea sexualo sau merel. b

Ando exemplo sicado mai anglal, o rrom cărdea adultero hai i căsătoria phandadea-pe prin o divorțo. Tha dacă o rrom ci avileas te cherel adultero, numai te divorțil hai te lel pesche iech aver rromni? Sau dacă o rrom avileas te cherel imoralitatea sexualo numai pala o divorțo hai pala codoia te lel pesche aver rromni, bi te încărel conto catar o fapto că leschi rromni camlea te iertil-les? Ande cadal situații, o divorțo hai i recăsătorirea – cai si sar o adultero – șiol șăro la căsătoriache cai sas-les mai anglal. I nevi căsătoria si iech phanglimos valabilo legalo. Ande O Turno de veghe (engl.) anda 15 noiembria 1979, ca i pagina 32, phenelas-pe: „Les siles acana iech nevi căsătoria hai ci daștil te mechel-la numai cadea caște jial parpale ca i rromni cai sas-les mai anglal. I căsătoria de mai anglal phandadea-pe iechdata so sas dino o divorțo, cărdea-pe adultero hai lea pesche iech aver rromni”.

Cado nevo hachiarimos ci camel te sicavel că anda le creștini i căsătoria ci si sfânto sau că o adultero ci si iech buchi cadea de nasul. Iech murș cai mechel-pe pesca rromniatar bi te avel-les iech motivo biblico, cherel-pe doșalo anda adultero, hai lesco phiraimos va îngărela ca iech comiteto judiciaro cai le phrala va dichena atento leschi situația. (Cana leschi nevi rromni si vi voi iech Martora, va cherela-pe vi anda late iech comiteto judiciaro anda codoia că vi voi cherel-pe doșali anda adultero.) Chiar cana i nevi căsătoria ci sili dichli sar adultero, le rromes ci va daștila te aven-les privilegii de serviciu specialo andi congregația but bărșa, ji cana, prin lesco lașio phiraimos, va arachela respecto catar i congregația, hai so cărdea hai o baro lajiav cai andea-les cadaia ci va mai avena andi goghi le coaverenghi. Le phure va dichena mișto vi i situația la rromniachi cai sas-les mai anglal, cai sas-li athadi, prin iech plano cărdo de mai anglal, hai cana si i situația, vi le șiavenghi minori, cai daștil-pe că sas-le mechle catar o partenero doșalo. (Mal. 2:14-16)

Anda codoia că jianen so but duch anel o divorțo hai i recăsătorirea nebiblico, le creștini sicaven goghiaverimos hai dichen sfânto i căsătoria cadea sar dichela vi o Iehova. (Ecl. 5:4, 5; Evr. 13:4)