Na ini so wan situwâsi te a man trow nanga wan tra uma, dan a gemeente o si en leki a fosi trow kon na wan kaba èn den o si a nyun trow leki wan trow di e teri. Fu man frustan fu san ede wi e si a tori disi so, wi o luku san Yesus ben taki fu trow nanga broko trow.

Na ini Mateyus 19:9 Yesus sori san na a wan-enkri reide te wan sma mag broko trow èn trow baka nanga wan tra sma. A ben taki: „Efu wan man broko trow nanga en wefi, ma a wefi no du hurudu èn a man trow nanga wan tra uma, dan a du sutadu.” Sobun, den wortu fu Yesus e leri wi taki (1) te wan fu den patna du hurudu, dan Bijbel e gi pasi taki sma kan broko trow èn (2) te wan man broko trow nanga en wefi aladi Bijbel no e gi en pasi fu du dati èn a go trow nanga wan tra uma, dan a du sutadu. a

Ma san den wortu fu Yesus wani taki? A de so taki te wan man du sutadu èn a broko trow nanga en wefi, dan Bijbel e gi en pasi fu trow baka nanga wan tra uma? Dati no abi fu de so. Efu a masra du sutadu, dan a wefi di no fowtu kan bosroiti efu a wani gi en masra pardon noso efu a no wani en moro. Efu a no wani en masra moro èn den broko a trow na lanti, dan baka dati den ala tu fri fu trow nanga wan tra sma.

Na a tra sei, a kan tu taki a wefi di no fowtu no wani broko a trow èn a e taigi en masra taki a wani gi en pardon. Ma san o pasa efu a masra no wani en wefi moro èn a e go broko a trow na lanti aladi en wefi ben wani tan nanga en? Fu di en wefi wani gi en pardon èn a no wani broko trow, meki Bijbel no ben o gi a man disi pasi fu trow baka. Efu a no gi yesi na Bijbel èn a trow nanga wan tra sma aladi Bijbel no e gi en pasi fu du dati, dan a e du sutadu baka èn a o abi fu kon baka na fesi wan krutu komte.​—1 Kor. 5:1, 2; 6:9, 10.

Ma te wan man broko trow nanga en wefi èn a trow nanga wan tra sma aladi Bijbel no e gi en pasi fu du dati, dan fa a gemeente e si a fosi trow nanga a nyun trow fu en? Bijbel e teri a fosi trow fu en ete? A de so taki a fosi trowpatna fu en di no fowtu kan bosroiti ete fu gi en pardon noso taki a fosi trowpatna kan taki ete taki a no wani en moro? A gemeente ben o si en leki a man disi du sutadu fu di a trow nanga wan tra sma?

Fosi, a gemeente ben e feni taki efu wan man ben broko trow sondro taki Bijbel gi en pasi fu du dati, dan a no ben mag trow nanga wan tra uma solanga en wefi di no fowtu de na libi ete, solanga a wefi no trow nanga wan tra sma èn solanga a no du hurudu. Efu na ini so wan situwâsi a man ben go trow nanga wan tra uma, dan a gemeente ben o si en leki a du sutadu. Ma di Yesus ben taki fu broko trow èn fu trow baka nanga wan tra sma, dan a no taki noti fu a wefi di no fowtu. Na presi fu dati a ben sori taki te wan man broko trow sondro taki Bijbel e gi en pasi fu du dati  èn a go trow nanga wan tra uma, dan a e du sutadu. Sobun, di a broko trow èn a go trow nanga wan tra uma, dan a sani disi tyari wan kaba kon na a fosi trow fu en. Fu di a man trow baka, dan dati de a srefi leki te a du sutadu.

Te a masra di du sutadu broko trow èn a trow nanga wan tra uma, dan en fosi wefi di no fowtu no kan bosroiti moro efu a wani gi en pardon noso efu a no wani en moro. Sobun, a no abi fu teki a muilek bosroiti efu a o gi en pardon noso efu a no wani en masra moro. Boiti dati, a lasti trow fu a masra sa de a trow di e teri gi a gemeente, awinsi a fosi trowpatna di no fowtu de na libi ete, awinsi a no trow baka, èn awinsi a no du hurudu. b

Na ini na eksempre di wi gi wan tu paragraaf na fesi, a masra du sutadu èn den broko trow. Ma san ben o pasa efu a masra no ben du sutadu, ma a broko a trow èn go trow nanga wan tra sma? Èn san ben o pasa te a masra no ben du hurudu fosi den broko trow, ma a du hurudu baka dati èn a go trow nanga wan tra sma aladi en wefi ben wani gi en pardon? Fu di na ini ala den eksempre disi a masra broko a trow èn a trow nanga wan tra uma, meki a du sutadu èn dati tyari wan kaba kon na a fosi trow. A nyun trow e teri na lanti. A Bakratongo Waktitoren fu 15 februari 1980 bladzijde 32 e taki en so: „Fu di a trow nanga wan tra sma, meki a no man broko a nyun trow disi somarso èn drai go baka na en fosi wefi. Fu di a broko a trow, a du sutadu èn a trow nanga wan tra sma, dan dati tyari wan kaba na a fosi trow fu en.”

Ma aladi wi e si a tori disi tra fasi now, dan wi no musu denki taki a trowlibi no santa moro, noso taki sutadu no de wan seryusu sondu. Efu wan masra broko trow nanga en wefi èn a trow nanga wan tra uma aladi Bijbel no e gi pasi taki a du dati, dan den owruman o abi fu seti wan krutu komte fu di a sani disi na a srefi leki te a ben o du sutadu. (Efu a tra uma nanga san a trow na wan Kresten, dan wan krutu komte o abi fu luku a tori fu a sisa dati tu, fu di na sutadu a du di a trow nanga so wan brada.) Aladi a gemeente no o si a nyun trow fu den leki sutadu, toku so wan brada no ben o kisi spesrutu grani na ini a gemeente furu yari langa. A no o kisi den grani disi solanga sma no e denki na ogri moro di a ben du na ini a ten di pasa èn solanga a no abi a takru nen moro di a ben kisi fu di a ben du na ogri disi. Disi wani taki tu dati den owruman o luku fa a de nanga a fosi patna fu en di no ben abi fowtu èn di a bedrigi. Èn den o luku tu fa a e go nanga den yongu pikin fu a brada disi di a libi na baka.​—Mal. 2:14-16.

Te wan sma broko trow èn e trow nanga wan tra sma aladi Bijbel no e gi en pasi fu du dati, dan a o kisi takru bakapisi. Dati meki Kresten e leri fu denki leki fa Yehovah e denki èn den musu si a trowlibi leki wan santa sani.​—Preik. 5:4, 5; Hebr. 13:4.