Ga giemo gegi mutshadho nyo pheye kha wu thumi gambe, ganiolu owu nya wuvili wu ngu dzumeledwa guya khu nayo nya mufumo. Gasi hi pwisisa gwadi mahungu yaya hongoleni hi wona esi Jesu a ganedego khu gu tshula mutshadho ni gu tshadha gambe.

Omu ga Matewu 19:9, Jesu a gu tshamuseya gighelo gi hi dzumeleyago gu tshula mutshadho. Uye wari khuye: “Ni wevbini a tshulago mutshadho ni mwangadzi waye nasiri khu kotani nya wubhayi, a bwe a tshadha ni mumbe, a gu gira wubhayi.” Avba nya malito yaya ho hevbula gu khethu: 1) wubhayi khigyo gighelo gi seketedwago omu nya Bhibhiliya gasi gu tshula mutshadho ni 2) mwama a tshulago mutshadho ni mwangadzi waye na si dzi seketeyi omu nya Bhibhiliya a bwe a tshadha ni mumbe nyamayi a gu gira wubhayi. *

Ina malito ya Jesu ma gu tshamuseya gu khayo mwama a girago wubhayi a bwe a tshula mutshadho ni mwangadzi waye guya khu Bhibhiliya tshulegide gu tshadha gambe? Khandri kharato. A gu tshuka mwama a gira wubhayi, mwangadzi waye a gu mwalo nandru tshulegide gu hunga gu mu divaleya mwendro gu mba mu divaleya. A gu hunga gu mu divaleya, va bwe va tshula mutshadho, vavavili va tshulegide gu tshadha gambe hwane nya gu ba va vbedzide gu dongiseya madangaliya nya gu tshule mutshadho.

Ganiolu, si nga gira mwangadzi a gu mwalo nandru a vbweta gu simama ni mwama waye a bwe a ganeya gu khuye a dzi emisede gu mu divaleya. Ahati mwama waye a gu mba dzumeya gu simama naye a bwe a tshula mutshadho ke? Kha nga olu mwangadzi waye a nga ba a dzi emisede gu mu divaleya a bwe a simama naye, uye guya khu Bhibhiliya kha tshulega gu tshadha gambe. A gu hunga gu tshadha ni mumbe muthu ambari olu a nga mba tshulega, uye a gu gira gambe wubhayi. Ga giemo gegi, madhota libandlani si na lomba gu ma wumba gambe kometi nya wulamuli gasi gu lulamisa gighoho gegi. — 1 Kor. 5:1, 2; 6:9, 10.

Khu kharato, mwama a gu tshadha gambe na si dzi seketeyi omu nya Bhibhiliya, libandla li yede gu wu wona kharini mutshadho nyo pheye ni owu nya wuvili? Ina mutshadho nyo pheye wu ngo thuma guya khu Bhibhiliya? Mwangadzi a gu mwalo nandru ina a nga divaleya mwendro gu diga mwama waye wa gale? Ina libandla li yede gu wona mutshadho nya wuvili kha nga wubhayi?

Gale hi di gu pwisisa gu khethu mwangadzi a gu mwalo nandru a gu simama gu vbanya a si tshadhi gambe a bwe a si giri wubhayi, mutshadho nya wuvili wu di gu wonwa kha nga wubhayi. Ganiolu, Jesu kha ganeya khu mwangadzi a gu mwalo nandru tepo a nga ganeya khu gu tshula mutshadho ni mutshadho nya wuphya. Wulangani nya isoso, uye a di khuye mwama a gu tshula  mutshadho ni mwangadzi waye na si dzi seketeyi omu nya Bhibhiliya a bwe a tshadha ni mumbe a gu gira wubhayi. Khu kharato, gu tshula mutshadho ni mutshadho nya wuphya so gira gu owu nyo pheye wu si thumi gambe.

Mwama a gu tshula mutshadho ni mwangadzi waye a bwe a tshadha gambe, kha si kodzegi ga mwangadzi waye wa gale a gu mwalo nandru gu a mu divaleya mwendro gu mu bomba. Khu kharato, mwangadzi wule a gu mwalo nandru mwalo gighelo nyo garadzege khu gu khuye a na divaleya mwendro gu diga mwama waye wa gale. Gu diga isoso, gasi wu dzumeledwa mutshadho nya wuphya mahoni nya libandla kha dzi si setekeyi avba nyo khethu mwangadzi wule a gu mwalo nandru fude, tshadhide gambe mwendro giride wubhayi. *

Ga giyeyedzo hi nga bhula khigyo, mwama a di gira wubhayi, khu kharato patwa wu tshula mutshadho. Ganiolu, ahati mwama a gu mba gira wubhayi, ambari ulolo a hunga gu tshula mutshadho ni mwangadzi waye a bwe a tshadha ni mumbe nyamayi ke? Nigu ahati mwama a nga mba gira wubhayi na si tshuli mutshadho, ganiolu khu hwane a gira wubhayi a bwe a tshadha ni mumbe nyamayi ke, ambari na divaledwe khoyu nyo pheye? Ga siemo sesi satshavbo, gu tshula mutshadho ni mutshadho nya wuphya sa gu wonwa kha nga wubhayi. Nigu so gira gu mutshadho nyo pheye wu si thumi gambe. Mutshadho nya wuphya wu ngu dzumeledwa guya khu nayo nya wufumu. Mukhedziseyi nya 1 nya Fevereiro nya 1980, pajina 32, wa gu tshamuseya mahungu yaya, khuwo: “Uye olu tshadhide nigu kha na nga si kodza gu tshula mutshadho nya wuvili a bwe a bweleleya mwangadzi waye wa gale. Khu kharato, mutshadho nyo pheye wu tshudwe khu kotani nya wubhayi ni mutshadho nya wuphya.”

Guvbindrugedza gogu nya mapwisiselo yathu kha gu thuli gu khugo Mukristo kha yeli gu wona mutshadho kha nga gilo gi agidego mwendro gu wona wubhayi nasiri gighoho nya gikhongolo. Tepo mwama a tshulago mutshadho ni mwangadzi waye na si dzi seketeyi avba nya Bhibhiliya a bwe a tshadha gambe na si tshulegi gu gira isoso, madhota ma yede gu wumba kometi nya wulamuli gasi gu khathaleya mahungu yoyo. (Abari gu mwangadzi nya muphya Mukristo, uye nuye yede gu vbindra khavbo nya kometi nya wulamuli kholu uye giride wubhayi.) Ambari olu mutshadho nya wuphya wu gu mba wonwa kha nga wubhayi, mwama yoyo yede gu khala myaga nya yingi na si ninganedwi khu gu ningwa mithumo nyo hathege libandlani mwendro kamo kala a pheledza gu ningwa githawo khu vandriyaye libandlani. Na si ningwi yimbe mithumo, madhota gu vbwetega ma vega ngudzu gipima avba nya giemo gya mwangadzi waye wa gale ni ga sanana saye a nga si diga. — Mal. 2:14-16.

Na ma gu dundrugeya khu mihandro yi reswago khu gu tshula mutshadho ni mutshadho nya wuphya wu gu mba dzi seketeya avba nya Bhibhiliya, Makristo ma yede gu manega ni guti ma bwe ma pimedzeya Jehovha khu gu wona mutshadho nga gilo gi agidego. — Muh. 5:4, 5; Hebh. 13:4.