Eka xiyimo xexo, loko wanuna a tlhela a nghenela vukati vandlha ri ta teka vukati byakwe bya khale byi herile naswona ri ta teka vukati byakwe bya sweswi byi ri enawini. Leswaku hi yi twisisa kahle mhaka leyi, a hi kambisiseni leswi Yesu a swi vuleke hi ku dlaya vukati ni ku tlhela u nghenela byin’wana.

Hilaha swi tsariweke hakona eka Matewu 19:9, Yesu u boxe xivangelo xin’we xa le Matsalweni xo dlaya vukati. U te: “Loyi a tshikaka nsati wakwe a teka un’wana, handle ka loko a tikhome ku biha hi swa masangu u endla vuoswi.” Eka marito ya Yesu, hi dyondza (1) leswaku ku tikhoma ku biha hi swa masangu hi xona ntsena xivangelo xa le Matsalweni xo dlaya vukati (2) nileswaku wanuna loyi a tshikaka nsati wakwe ku nga ri hi xivangelo xa Matsalwa ivi a teka un’wana u endla vuoswi. *

Xana marito ya Yesu ma vula leswaku wanuna loyi a tikhomeke ku biha hi swa masangu kutani a tshika nsati wakwe, u tshunxekile ku ya hi Matsalwa ku tlhela a teka? A swi tano. Loko nuna a endla vuoswi, nsati wakwe loyi a nga riki na nandzu u ta endla xiboho xo n’wi rivalela kumbe doo! Loko nsati a ala ku n’wi rivalela ivi va dlaya vukati, hinkwavo se va tshunxekile ku nghenela byin’wana.

Mikarhi yin’wana nsati a nga hlawula ku nga byi dlayi vukati hi ku byela nuna wakwe leswaku u n’wi rivalerile. Ku vuriwa yini loko wanuna loyi a endleke vuoswi a sindzisa ku dlaya vukati hambiloko nsati wakwe a n’wi rivalerile? Leswi nsati wakwe a tiyimiseleke ku n’wi rivalela naswona a lavaka leswaku va ya emahlweni ni vukati bya vona, wanuna u ta va a nga tshunxekanga hi ku ya hi Matsalwa ku tlhela a teka. Loko a sindzisa ivi a ya emahlweni a nghenela vukati byin’wana hambileswi Matsalwa ma nga n’wi pfumeleriki, u va a endla vuoswi nakambe u ta vumberiwa komiti yin’wana ya vuavanyisi.—1 Kor. 5:1, 2; 6:9, 10.

Loko wanuna a tlhela a nghenela vukati hambileswi hi ku ya hi Matsalwa a nga tshunxekangiki, vandlha ri fanele ri byi languta njhani vukati byakwe bya khale ni bya sweswi? Xana vukati byo sungula bya ha ri kona hi ku ya hi Matsalwa? Xana nsati wakwe loyi a nga riki na nandzu a nga ha swi kota ku rivalela nuna wakwe wa khale kumbe a nga n’wi rivaleli? Xana vukati byakwe lebyintshwa byi ta va byi ri bya vuoswi?

Khale vandlha a ri languta wanuna loyi a nga nghenela vukati byin’wana a ri eku osweni loko nsati wakwe wo sungula loyi a nga riki na nandzu a ha hanya, a nga tekiwanga naswona a nga tikhomanga ku biha hi swa masangu. Loko Yesu a vulavula hi ku dlaya vukati niloko munhu a nghenela byin’wana, a nga n’wi katsanga munghana wa vukati loyi a nga dyoheriwa. Kambe u vule leswaku wanuna loyi a dlayaka vukati ku nga ri hi xivangelo xa Matsalwa ivi a teka un’wana u va a endla vuoswi. Eka xiyimo xo tano, vukati byo sungula bya hela hikuva u endle vuoswi loko a dlaya vukati ivi a nghenela byin’wana.

Loko wanuna a dlaya vukati ni ku tlhela a nghenela  byin’wana, a swi nge he koteki leswaku nsati wakwe wa khale loyi a nga riki na nandzu a n’wi rivalela kumbe a n’wi tshika. Hikwalaho a nga ha ri na xivangelo xo endla xiboho xa leswaku wa n’wi rivalela kumbe a nga n’wi rivaleli khale ka nuna wakwe. Vandlha ri ta teka vukati byakwe byi ri enawini hambiloko khale ka nsati wakwe a ha hanya, a nga se tekiwa kumbe ku tikhoma ku biha hi swa masangu. *

Eka xikombiso lexi hi buleke ha xona, nuna u endle vuoswi leswi nga endla leswaku va dlaya vukati. Kambe ku vuriwa yini loko nuna a dlaya vukati ivi a nghenela byin’wana kambe a nga endlanga vuoswi? Kumbe ku vuriwa yini loko wanuna a dlaya vukati ku nga ri na xivangelo xa Matsalwa ivi endzhaku ka sweswo a ya tikhoma ku biha hi swa masangu ni ku tlhela a teka nsati un’wana hambileswi khale ka nsati wakwe a tiyimiseleke ku n’wi rivalela? Eka swikombiso leswi hinkwaswo, vukati byo sungula bya hela hikuva loko nuna a dlaya vukati ni ku nghenela byin’wana u va a endla vuoswi. Vukati lebyi sweswi a nga eka byona byi le nawini. Xihondzo xo Rindza xa Xinghezi xa November 15, 1979, tluka 32, xi te: “Leswi a nga le ka vukati lebyintshwa, a swi nge he koteki leswaku a tlhelela eka vukati byo sungula hikuva byi hele loko a byi dlaya, a endla vuoswi ni ku nghenela lebyintshwa.”

Ku antswisiwa loku ka matwisiselo ya hina a ku vuli swona leswaku vukati a bya ha kwetsimi kumbe leswaku vuoswi a ka ha ri xidyoho lexikulu. Loko wanuna a dlaya vukati ku nga ri hi xivangelo xa le Matsalweni ivi a ya teka un’wana hambileswi Matsalwa ma nga n’wi pfumeleriki, u ta langutana ni komiti ya vuavanyisi hikuva u oswile. (Loko nsati loyi a ha ku n’wi tekaka a ri Mukreste, na yena u ta langutana ni komiti ya vuavanyisi hikuva u oswile.) Hambileswi vukati byakwe lebyintshwa byi nga riki bya vuoswi, wanuna yoloye a nge faneleki ku nyikiwa vutihlamuleri byo hlawuleka evandlheni malembe yo tala niloko van’wana va ha khunguvanyisiwa hi xiendlo xakwe naswona va nga n’wi xiximi. Loko a nga se nyikiwa vutihlamuleri byo karhi evandlheni, vakulu va ta rhanga va kambisisa ndlela leyi a dlayeke vukati hayona ni ndlela leyi sweswo swi n’wi khumbeke hayona khale ka nsati wakwe niloko a tshike ku hlayisa vana lavatsongo.—Mal. 2:14-16.

Hikwalaho ka vuyelo byo vava lebyi vaka kona loko munhu a dlaya vukati ni ku nghenela byin’wana ku nga ri hi xivangelo xa le Matsalweni, Vakreste va tikarhatela ku va ni langutelo leri Yehovha a nga na rona hi vukati leswaku bya kwetsima.—Ekl. 5:4, 5; Hev. 13:4.