Христиан кижи катап өгленип алырга, чыышка ооң баштайгы эвес, а чаа бадылгазы күштүг боор. Чүге ындыг түңнел үндүрүп болур? Ону билип алыр дээш, Иисустуң чарлыышкын биле катап бадыланыышкын дугайында сөстерин сайгарыптаалыңар.

Бурганның көрүжү-биле чарлып болур чаңгыс чылдагаан бар деп, Иисус айыткан. Ону Матфей 19:9-та: «Кадайының самыыраанындан өске, кандыг-бир чылдагаан-биле оон чарылгаш, өске кадай алган кижи ашак-кадайның шынчы чоруун үрээни ол болур» — деп бижээн. Бо сөстерден алырга: 1) чарлып болур чаңгыс библейжи чылдагаан дээрге самыырал-дыр, 2) эр кижи оон өске чылдагаан-биле кадайындан чарылгаш, өске кижиге өгленип алыр болза, ол кадайынга шынчы чоруун үреп турар a.

Ынчаарга кадайынга шынчы чоруун үрээш, ооң-биле чарлы берген эр кижиге Бурганның Сөзү катап өгленирин чөпшээреп турар дээни ол бе? Чок, албан эвес. Ашаа кадайынга өскерлип, шынчы чоруун үрээн болза, буруу чок кадайы ону өршээп азы өршээвейн-даа барып болур. Бир эвес ол ашаан өршээвес болза, олар чара бадылашкан соонда, кайызы-даа катап өгленип ап болур.

Ынчалза-даа кадайы өг-бүлезин кадагалап арттырып алыр дээш, ашаан өршээр деп турарын аңаа чугаалап болур. Бир эвес кадайы эптежип алыр дээш кызарга-даа, ашаа дөмей-ле ооң-биле чарлы бээр болза канчаар? Кадайы ону өршээп, өг-бүлезин кадагалаарын күзеп турар болганда, ашааның катап өгленир кандыг-даа библейжи чылдагааны чок. Бир эвес ол Библияда айтыышкынны өжегерээн херекке албайн, катап өгленип аар болза, ол катап база кадайынга шынчы чоруун үреп турар. Ынчап кээрге, удуртукчулар шүүгү комитединге ооң херээн катап сайгарар ужурлуг (1 Кор. 5:1, 2; 6:9, 10).

Христиан кижи библейжи чылдагаан чокка катап өгленип алырга, чыыш ооң баштайгы болгаш амгы бадылгазын канчаар көөр ужурлуг? Библиядан алырга, ол эр кижи бир дугаар кадайы-биле ам-даа чаңгыс мага-бот хевээр бе? Ашаан өршээринге белен кадайы өг-бүлезин кадагалап ап шыдаар бе? Ол эр кижиниң чаа кадайы-биле харылзаазын самыын садар чорук кылдыр санап болур бе?

Шынчы чоруун үрээн кижиниң кадайы дириг чорда, өгленмээнде азы самыын чорукка буруулуг апарбаан шаанда, чаа кадайы-биле харылзаазын самыыраашкын кылдыр санаар турган бис. Ынчалзажок Иисустуң Матфей 19:9-та сөстеринче эглип кээлиңер. Ында буруу чок таланың дугайында чүнү-даа биживээн. Иисус бо шүлүкте библейжи чылдагаан чокка кадайындан чарылгаш, өске херээжен кижиге өгленип алган кижини ашак-кадайның шынчы чоруун үрээни ол деп тайылбырлаан. Ынчап кээрге, Иисустуң өскерлир чорукка деңнээни чарлыышкын биле катап бадыланыышкын баштайгы бадылганы күш чок кылып турар.

 Бир эвес эр кижи баштайгы кадайындан чарылгаш, өске кижиге өгленип алган болза, ооң буруу чок баштайгы кадайы өг-бүлезин чеже-даа кадагалаарын күзеп турар болза, ол ам чүнү-даа кылып шыдавас. Оларның өг-бүлези бузулган, ынчангаш ашаан өршээр азы өршээвес деп айтырыг ону дүвүретпес ужурлуг. Оон ыңай чыыш ол эр кижиниң чаа кадайы-биле харылзаазын самыырал кылдыр санавас деп демдеглээри чугула b.

Бис ашааның кадайынга өскерилгеш, чарлы берген байдалды көрдүвүс. Ынчалза-даа мындыг база бооп болур: ашаа шынчы чоруун үревээн-даа болза, дөмей-ле кадайындан чарылгаш, өске кижи-биле катап өгленип алган. Азы ашаа кадайынга өскерилбейн, чарлып алган, а соонда самыын чорукту кылыпкан. Ооң баштайгы кадайы ону өршээринге белен турда-даа, ол өске кижиге өгленип алган. Бо шупту таварылгаларда ашак-кадай харылзаазының шынчы чоруун үреп турар чарлыышкын биле катап бадыланыышкын биеэги бадылганы күш чок кылып турар. Ынчап кээрге, чаа бадылга хоойлуга дүгжүп турар. 2006 чылдың сентябрь 15-тиң «Таңныыл суургазында» 30 дугаар арында ооң дугайында мынча дээн: «Ол эр кижи чарылгаш, самыын чорук кылган соонда катап өгленип алган болганда, ол ам база чарылгаш, дедир баштайгы кадайынче эглип шыдавас».

Бо эде көрген билиишкин өг-бүлениң ыдыктыын канчап-даа кудулатпайн турар база ашак-кадайынга шынчы чорукту үрээри шыңгыы эвес деп көргүспейн турар. Бир эвес Бурганның бараалгакчызы библейжи чылдагаан чокка чарлы бергеш, библейжи дүрүмнерни херекке албайн, катап өгленип алыр болза, кадайынга шынчы чоруун үрээни ол. Ынчангаш шүүгү комитеди ооң херээн сайгарар апаар. (Бир эвес ооң чаа кадайы Иегованың Херечизи болза, ашак-кадайның шынчы чоруун үрээни дээш, аңаа хамаарыштыр база шүүгү комитедин чыыр апаар.) Чаа кадайы-биле харылзаазын самыын чорук кылдыр санавас-даа болза, ол эр кижиге хөй чылдар дургузунда чыышка кандыг-даа харыысалгалыг даалгаларны бербес. Кайы хире үе дургузунда? Ол эки адын катап тургузуп албаан шаанда база ооң бужар херээн акы-угбалар утпаан шаанда. Ындыг акыйга кандыг-бир даалганы дагзырының мурнунда, удуртукчулар мындыг чүүлдерни херекке алыр ужурлуг: ол кара сагыштыы-биле кадайындан адырлып аарын бодаан бе? Ол назы-хар четпээн ажы-төлүн октапкан бе? Бир эвес ындыг болза, оларның амгы байдалы кандыгыл? (Мал. 2:14—16).

Библейжи чылдагаан чокка чарылгаш, катап өгленип алган кижи бодунга-даа, өскелерге-даа хөй аарышкыны чедирип турар. Ынчангаш Бурганның шупту бараалгакчылары өг-бүле тургузуун ыдыктыг деп санаар ужурлуг, чүге дээрге Иегова аңаа шак ындыг хамаарылгалыг болгай (Эккл. 5:3, 4; Евр. 13:4).