Musi Mukriste a tshi dovha a vhinga, tshivhidzo tshi ḓo dzhia mbingano ya kale yo fhela nahone tshi ḓo dzhia mbingano ntswa i tshi mu vhofha. U itela u pfesesa uri ndi ngani ri tshi khou amba nga u ralo, kha ri thome nga u haseledza nga ha zwe Yesu a zwi amba nga ha munna ane a ṱala a dovha a vhinga.

Kha Mateo 19:9, Yesu o amba nga ha tshiitisi tshithihi fhedzi tshi re Maṅwaloni tshine tsha nga ita uri vhavhingani vha ṱalane. O ri: “Ane a ṱala mufumakadzi wawe, hu si ngauri o ḓifara luvhi nga zwa vhudzekani, a vhinga muṅwe u ita vhupombwe.” Kha zwe Yesu a zwi amba, ri guda uri (1) u ḓifara luvhi nga zwa vhudzekani ndi tshone tshiitisi tshi tshoṱhe tshi re Maṅwaloni tshine tsha tendela uri vhavhingani vha ṱalane na uri (2) munna ane a ṱala mufumakadzi wawe zwi siho Maṅwaloni a dovha a vhinga muṅwe, u vha a tshi khou ita vhupombwe. *

U ya nga zwe Yesu a zwi amba, naa Maṅwalo a a tendela uri munna a ḓifare luvhi nga zwa vhudzekani, a ṱale mufumakadzi wawe nahone a dovhe a vhinge? Hai! Arali muthu o ita vhupombwe, mufarisi wawe a si na mulandu ndi ene ane a nga dzhia phetho ya uri u ḓo mu farela kana ha nga mu fareli. Arali a songo mu farela nahone vha ṱalana nga lwa mulayo, vhuvhili havho vha nga vhingana na vhaṅwe vhathu.

Zwi nga itea uri mufarisi o khakhelwaho u khou ṱoḓa uri vha bvele phanḓa na mbingano yavho nahone o ḓiimisela u hangwela mufarisi wawe o khakhaho. Fhedzi hu itea mini arali mufarisi o ḓifaraho luvhi nga zwa vhudzekani a sa khou tenda u hangwelwa nahone a tshi khou ṱoḓa uri vha ṱalane nga lwa mulayo? Maṅwalo ha mu tendeli uri a dovhe a vhinge ngauri mufarisi wawe o vha o ḓiimisela u mu hangwela na uri vha bvele phanḓa na mbingano yavho. Arali a vhinga muṅwe naho Maṅwalo a sa mu tendeli u ita nga u ralo, u vha a tshi khou dovha a ita vhupombwe. Vhahulwane vha ḓo tea u dovha vha vhumba komiti ya khaṱhulo uri i senge eneo mafhungo.—1 Vhakor. 5:1, 2; 6:9, 10.

Musi munna o dovha a vhinga ngeno Maṅwalo a sa mu tendeli uri a ite nga u ralo, tshivhidzo tshi dzhia hani mbingano yawe ya kale na mbingano yawe ntswa? Naa u ya nga Maṅwalo mbingano yawe ya kale i vha i songo fhela? Naa mufarisi wawe o khakhelwaho wa mbingano ya kale u kha ḓi vha na tshibuli tsha uri a mu hangwele? Naa tshivhidzo tshi ḓo dzhia onoyo munna a tshi khou bvela phanḓa a tshi ita vhupombwe na mufumakadzi wawe muswa kha mbingano yawe ntswa?

Tshifhingani tsho fhiraho, tshivhidzo tsho vha tshi tshi dzhia yeneyo mbingano ntswa i ya vhupombwe arali mufarisi o khakhelwaho a tshi kha ḓi tshila, a siho mbinganoni nahone a songo ḓifara luvhi nga zwa vhudzekani. Fhedzi musi Yesu a tshi amba nga ha muthu o itaho vhupombwe we a ṱala mufarisi wawe a dovha a vhinga muṅwe, ho ngo amba tshithu nga ha mufarisi o khakhelwaho. Nṱhani hazwo, o amba uri munna ane a ṱala  mufumakadzi wawe zwi siho Maṅwaloni a dovha a vhinga muṅwe, u vha a tshi khou ita vhupombwe. Kha honovhu vhuimo, mbingano yawe ya kale i a fhela musi munna o khakhaho a tshi ṱala mufumakadzi wawe a dovha a vhinga muṅwe, naho a tshi vha a tshi khou ita vhupombwe.

Arali munna a ṱala mufumakadzi wawe a dovha a vhinga muṅwe, mufumakadzi wawe wa kale ha tsheena tshibuli tsha u mu hangwela. U vha a si tsheena muhwalo wa u ita phetho ya uri u ḓo farela munna wawe o khakhaho kana uri ha nga ḓo mu farela. Zwiṅwe hafhu, hu sa londwi uri mufarisi o khakhelwaho o ḓifara luvhi nga zwa vhudzekani, o dovha a vhingwa kana o lovha, a zwi shanduli nḓila ine tshivhidzo tsha dzhia ngayo mbingano ntswa ya mufarisi o khakhaho. *

Kha tsumbo ye ra amba nga hayo, munna o ita vhupombwe, a ṱala mufumakadzi wawe. Zwino hu pfi mini arali onoyo munna a songo ḓifara luvhi nga zwa vhudzekani fhedzi a ṱala mufumakadzi wawe a dovha a vhinga muṅwe? Kana hu pfi mini arali onoyo munna o ḓifara luvhi nga zwa vhudzekani vho no ṱalana nahone a dovha a vhinga muṅwe naho mufumakadzi wawe wa kale o vha o ḓiimisela u mu hangwela? Kha dzenedzo tsumbo dzoṱhe, musi munna a tshi ṱala, a dovha a vhinga, zwine zwa vha u ita vhupombwe, zwi mbo ḓi fhelisa mbingano yawe ya kale. Mbingano yawe ntswa i a mu vhofha nga lwa mulayo. Tshiingamo tsha Tshiisimane tsha 15 November 1979 tsho ri: “Zwino onoyo munna o no vha kha mbingano ntswa, a nga si ṱutshele mufumakadzi wawe muswa a vhuyelela kha mufumakadzi wawe wa kale. Mbingano yawe ya kale yo fhela musi a tshi ṱala, a tshi ita vhupombwe na u vhinga mufumakadzi muswa.”

U shandula nḓila ine ra pfesesa ngayo enea mafhungo a zwi ambi uri Vhakriste vha dzhia mbingano i si khethwa kana uri u ita vhupombwe a si tshivhi tshihulwane. Arali munna a ṱala mufumakadzi wawe Maṅwalo a sa mu tendeli a dovha a vhinga muṅwe, vhahulwane vha ḓo vhumba komiti ya khaṱhulo ngauri o ita vhupombwe. (Arali mufumakadzi wawe muswa e Mukriste, na ene u ḓo vhumbelwa komiti ya khaṱhulo ngauri u vha o ita vhupombwe.) Naho ri sa ḓo dzhia yeneyo mbingano ntswa i mbingano ya vhupombwe, munna o khakhaho a nga si wane ndugelo dzo khetheaho tshivhidzoni lwa miṅwaha minzhi arali hu tshi kha ḓi vha na vhathu vha songo fareaho zwavhuḓi nga nṱhani ha zwe a zwi ita na vhane vha pfa uri ho ngo tewa nga u ṱhonifhiwa. Musi a sa athu u ṋewa ndugelo, vhahulwane vha ḓo thoma vha humbula nga ha zwiimo zwa mufumakadzi wawe wa kale we a si fariwe zwavhuḓi na nga ha vhana vhawe vhaṱuku vhe khamusi a vha ṱutshela arali vhe hone.—Maḽ. 2:14-16.

Vhakriste vha sumbedza vhuṱali nga u edzisa Yehova na u dzhia mbingano i khethwa ngauri arali munna a ṱala Maṅwalo a sa mu tendeli, a dovha a vhinga muṅwe mufumakadzi, zwi na masiandoitwa.—Muh. 5:4, 5; Vhahev. 13:4.