La congregassion la ga de capir che el primo matrimònio l’è stà finio e che el novo matrimònio el ga valor de acordo cola lege dei òmini. Podemo capirlo meio se pensemo sora quel che Gesù el ga dito sora el divòrsio e sora maridarse nantra volta.

In Mateo 19:9, Gesù el ga spiegà che ghen’è solche un motivo par finir col matrimònio. Lu el ga dito: “Qualchedun che el se divorsia dela so dona, se no l’è par via de imoralità sessual, e el se marida con nantra dona, el fà adultèrio.” Alora, imparemo che (1) de acordo cola Bìblia, sol se pol finir un matrimònio col divòrsio se un dei due el ga fato imoralità sessual, e (2) el omo che el se divorsia dela so dona sensa un motivo che la Bìblia la dà e el se marida con nantra dona, el fà adultèrio. a

Sarà che un omo che el fà imoralità sessual e el se divorsia dela so dona el podaria maridarse nantra volta de acordo con quel che la Bìblia la dise? No l’è mia sempre cossita. La so dona, che no la ga mia colpa, la pol dessider se la ndarà perdonarlo o nò. Se la dona la desside che no la vol perdonarlo, e lori i se divorsia, tuti i due i ze lìberi par maridarse nantra volta dopo che i ga finio el divòrsio de acordo cola lege.

Ma pol esser che la dona la desside perdonarlo e seitar maridada con lu. Cossa che ndaria suceder se el omo no’l volesse restar maridà con ela e el rangiesse tuto lu sol par gaver el divòrsio? Lu no’l podaria maridarse nantra volta parché la so dona lo gavea perdonà e la volea restar maridada con lu. Cossita, se lu el desside maridarse con nantra dona, lu el fà ancora adultèrio. Par quela, i ansiani dela congregassion i gavarà de far nantra comission giudicativa par giulgar questo secondo adultèrio. — 1 Cor. 5:1, 2; 6:9, 10.

Cossa che la congregassion la ga de pensar sora el primo matrimònio e sora el secondo matrimònio de questo omo? Sarà che de acordo cola Bìblia, el primo matrimònio el ga ancora valor? Sarà che la prima dona la pol ancora scòlier perdonar el omo che la era maridada? Sarà che i fradei dela congregassion i ga de pensar che questo omo e la dona che lu el se ga maridà adesso i ze drio far adultèrio?

Nel passà, credeino che questo omo e la so seconda dona i seitaria a far adultèrio fin che la prima dona la morisse, la se maridesse o la fesse imoralità sessual. Ma quando Gesù el ga parlà del divòrsio e del novo matrimònio, lu no’l ga parlà sora la dona che no la gavea colpa. Lu el ga parlà che un omo che el fà un divòrsio sensa un motivo che la  Bìblia la dà, e el se marida nantra volta, el fà adultèrio. Alora, el divòrsio e el novo matrimònio i finisse el primo matrimònio.

Quando un omo el se divorsia dela so dona e el se marida nantra volta, la prima dona no la podaria pi scòlier perdonarlo o nò. Alora a questa dona no ghe ocore pi preocuparse con questa dessision. E cossa la congregassion la ga de pensar sora el novo matrimònio? La congregassion la ga de capir che el novo matrimònio l’è quel che el vale de acordo cola lege dei òmini, anca se la prima dona la ze ancora viva, no la se ga maridà, o no la ga fato imoralità sessual. b

Nel esémpio che ghemo parlà fin adesso, el omo el ga fato adultèrio e el se ga divorsià. Ma cossa sucede se el omo no’l ga fato adultèrio, e anca cossita, el se divorsia dela so dona e el se marida con nantra? Cossa sucede se el omo el fà imoralità sessual sol dopo del divòrsio e el se marida con nantra dona, anca se la so prima dona lo gavea perdonà? In questi due esempi, el divòrsio e el novo matrimònio, che l’è stà un adultèrio, i ga finio el primo matrimònio. El novo matrimònio l’è quel che el vale de acordo cola lege. La Sentinela de 1 de febraro de 1980 nela pàgina 32, la ga dito: “El omo che el se ga maridà nantra volta no’l pol finir con questo novo matrimònio e tornar al primo. El primo matrimònio l’è stà finio par via del divòrsio, del adultèrio e del novo matrimònio.”

Ghemo cambià la maniera de capir le parole de Gesù, ma no ghemo cambià quel che pensemo sora due verità importante: El matrimònio l’è sacro e el adultèrio l’è un bruto pecato. Quando un omo el se divorsia dela so dona sensa un motivo che la Bìblia la dà, e el se marida con nantra, i ansiani i ndarà far una comission giudicativa parché el ga fato adultèrio. Se el se ga maridà con una dona che la ze una serva de Geovà, i ansiani i ndarà far una comission giudicativa con ela parché anca ela la ga fato adultèrio. Anca se adesso lori no i ze drio far adultèrio, questo omo no’l podarà gaver privilegi spessiai de servìssio nela congregassion par tanti ani. Lu el podarà gaver questi privilegi sol dopo che i fradei i scominsiarà a rispetarlo e no i restarà pi disgustadi con quel che el ga fato. Vanti de darghe questi privilegi, i ansiani i ga de pensar sora quel che la prima dona la ga bio de infrontar dopo che lu la ga tradio. Se i ga bio fioi nel primo matrimònio, i ansiani i ga anca de pensar sora i fioi che i era ancora gióveni e che fursi el gàpia abandonà. — Mal. 2:14-16.

Sicuro che un divòrsio e un matrimònio che no l’è de acordo cola Bìblia ndarà far tante persone sofrir. Alora i servi de Geovà i mostra sabedoria quando i pensa come lu e i vede el matrimònio come una roba sacra. — Ecl. 5:4, 5; Ebr. 13:4.